यूहन्ना को तीसरो कागद
3 यूहन्ना
1
1 aम बस्वास्या की टोळी को मुखियो यूहन्ना यो कागद प्यारा भायला गयुस क नांऊ माण्ढु छु, जिसुं म सांचो परेम करू छु।2 म्हारा प्यारा भायला, म परातना करू छु क जस्यान तु आत्मिकता मं बढर्यो छ वस्यान ई तु सबळी बाता मं बढ्अ अर नीका रेव्अ। 3 क्युं क जद्या एकात भाई आर थारा उं सांच की गुवाई दिया, जिप्अ तु सांचमाच चाल्अ छ तो म घणो राजी होयो। 4 मन्अ या सुणबा सुं साऊटो आण्द ओर कांई मं बी कोन्अ आव्अ क म्हारा छोरा-छोरी सांच का गेला मं चाल्अ छ।
5 ओ म्हारा प्यारा भायला, वे मनख थारअ बेई अण्जाण होव्अ तोबी तु बस्वासी भाया का भला बेई ज्योबी कर सक्अ छ, उन्अ करअ छ। 6 वे बस्वास्या की टोळी क साम्अ थारा परेम की गुवाई दिया छा अर तु वान्अ अस्यान बद्या कर जस्यान परमेसर का मनखा बेई चोखो होव्अ छ तो चोखो लाग्अलो। 7 क्युं क वे मसी की सेवा करबा बेई नखळ्या छ, अर बना बस्वास्या सुं कांई बी कोन्अ लेव्अ। 8 जिसुं आपा बस्वास्या न्अ अस्यान का मनखा की सायता करणी चायजे। जिसुं आपा बी सांच न्अ फेलाबा मं पांतीआळा हो जावां।
9 म एक कागद बस्वास्या की टोळी न्अ बी माण्ढ्यो छो पण दियुत्रिफेस ज्यो वाम्अ नेतो बणतो फरअ छो। म्हे ज्योबी खेवां छा, उन्अ वो कोन्अ मान्अ। 10 जिसुं जद्या म आंउलो तो बताऊलो क वो कांई करर्यो छ। वो झूंट्याई म्हारअ उपरअ दोष लगाव्अ छ अर वा बाता सुंई वो राजी कोन्अ। अर वो आपणा भाया को आदरमान कोन्अ करअ पण ज्यो अस्यान करबो छाव्अ छ वान्अ बी रोक्अ छ अर वान्अ बस्वास्या की टोळी सुं नखाळ देव्अ छ।
11 ओ प्यारा भाई, बराई क नही पण भलाई क पाछ्अ चाल! ज्यो भलाई करअ छ, वो परमेसर को छ! अर ज्यो बराई करअ छ वो परमेसर न्अ कोन्अ जाण्यो।
12 दिमेत्रियुस का बारा मं सबळा चोखी गुवाई दिया छ अर यो सांच बी छ। म्हे बी उंका बारा मं गुवाई दिया छा। अर थे तो जाणो छो क म्हाकी गुवाई सांची छ।
13 थन्अ माण्ढबा बेई म्हारअ कन्अ घणी बाता छ, पण म थन्अ कलम अर स्याई सुं सब कोन्अ माण्ढबो चाऊ। 14 पण मन्अ तो आसा छ क म थासुं बेगोई मलुंलो। जद्या आपा आम्अ-साम्अ बतळाव्अला। 15 थान्अ सान्ति मल्अ।
अण्डअ का सबळा भायला थान्अ नमस्कार करअ छ। उण्डअ का सबळा बस्वासी भाया न्अ नांऊ ले-लेर नमस्कार खिज्यो।