यहूदा क हाथा माण्ढेड़ो कागद
नमस्कार
1
1 aयहूदा की ओड़ी सुं ज्यो ईसु मसी की सेवा करबाळो अर याकूब को भाई छ, थां बेई ज्यांन्अ परमेसर बलायो छ अर ज्यो पिता परमेसर का परेम मं अर ईसु मसी की छतर छाया मं जीवता छ।2 थान्अ दीया, सांति अर परेम खुब मलतो रेव्अ।
पापी डण्ड पाव्अला
3 प्यारा भायाओ म तो घणो चायो छो क थान्अ उं उद्धार का बारा मं माण्ढु, जिम्अ आपा बरयाबर का पांतिदार छा। कागद माण्ढर थाम्अ उछ्याव जगाबा की मन्अ जुरत लागी, जिसुं क थे उं बस्वास बेई जोरी करता रेवो, जिन्अ परमेसर खुदका मनखा न्अ सदामेस बेई देदियो छो। 4 क्युं क थांकी टोळी मं एकात अस्यान का मनख आ घुस्या। ज्यां लोगबागा की सज्या बेई सास्तरा मं घणो पेलीसुंई परमेसर की ओड़ी सुं बोलबाळा खे दिया छा। ये लोगबाग बना परमेसर का छ ये लोगबाग परमेसर की दीया न्अ कुकर्म करबा बेई छूट मानलिया अर ये आपणा परबु अर मालिक ईसु मसी न्अ कोन्अ मान्अ।
5 थे यां बाता न्अ तो जाण्अ छो पण फेरबी म थान्अ याद दुवाबो चाऊ छु क परबु एकबार खुदका मनखा न्अ मिसर सुं बचार कस्यान नखाळर ल्यायो छो। पण वाम्अ सुं घणासारा बस्वास सुं हटग्या, तो परबु वांको नास कर दियो छो। 6 म थान्अ या बी याद दुवाबो चाऊ छु क ज्यो दूत खुदका ओहदा न्अ कोन्अ सम्भाळ सक्या, पण परमेसर का घर न्अ छोड़र भागग्या। आग की भट्टी मं न्याय होबा बेई, वान्अ न्याय का दन ताणी सदामेस का अन्धेरा मं बांधर रखाण मेल्या छ। 7 वस्यान ई म थान्अ याबी याद दुवाबो चाऊ छु क सदोम अर अमोरा अर आस-पास का नगर का मनख ज्यो बेगड़ो बेवार कर्या अर गलत तरीका सुं बेगड़ा कामा क पाछ्अ भागता रिया। वान्अ कद्या बी कोन्अ बझबाळी आग मं पटकबा की सज्या मली छी। आपान्अ चेताबा बेई वे एक खेणात की न्याई छ।
8 एकधम वस्यान ई थांकी टोळी मं आबाळा ये लोगबाग अपणा बेगड़ा कामा क पाछ्अ भागता होया खुदकी काया न्अ बगाड़रया छ। अर खेव्अ छ क अस्यान करबा बेई परमेसर वान्अ सपना मं खियो छ अस्यान वे परबु की सक्ति न्अ उठा'र ताक मं मेल देव्अ छ अर महमाळा सरगदूता क बिरोध मं बोल्अ छ। 9 cपरमुख सरगदूत मीकाईल जद्या उपरली भाळ का राजा (सेतान) की लार कहासुणी करता होया मूसा की लास बेई बहसबाजी करर्यो छो पण वो उंका बिरोध मं अपमानहाळा बोल काम म्अ कोन्अ लियो। वो बस अतरोई खियो क, “परबु थन्अ दकाल्अ।”b 10 पण ये मनख तो वां बाता की बराई करअ छ, ज्यांन्अ ये समझ्अई कोन्अ। अर ये लोगबाग बेबुद्धिहाळा ज्यानबरा की न्याई छ ज्यो बना कांई बच्यारयाई हरकांई करअ छ। ज्यांसुं वांको नास होबाळो छ।
11 वां लोगबागा बेई यो घणु बरो क वे कैनd की जस्यान को गेलो पकड़या छ। धन कमाबा बेई वे खुदन्अ वस्यान ई गलती का हाथा मं सुंप दिया जस्यान बिलाम कर्यो छो। जिसुं वेई नास हो जाव्अला जस्यान परमेसर का बिरोध मं होबाळो कोरह अर उंकी लार लागबाळा न्अ नास कर दिया छा।
12 ये लोगबाग बस्वास्या की टोळी का जीम्बा मं थांकी लार खाता-पीता, समून्दर मं लूक्या वा पटापड़ा की जस्यान अर बेधोक्अ खुदको पेट भरबाळा गुवाळ्या छ। ये बना बरसबाळा बादळा जस्या छ, ज्यो बाळ सुं उड़ता फरअ छ। ये बना फळा का रूंखड़ा छ ज्यांन्अ उपाड़ मेल्या छ। 13 ये समून्दर की जोरदार लूरा जस्यान खुदकी बेसर्मी का झागड़ा उछाळ्अ छ। ये टुट्या तारा छ ज्यां बेई घणाजोर को अन्धेरो सदामेस बेई छ।
14 आदम क पाछ्अ सातवी पीढ़ी को हनोक बी या लोगबागा बेई अस्यान भविष्यवाणी कर्यो छो, “देखो वो परबु अपणा हजारू सरगदूता की लार 15 सबळा मनखा को न्याय करबा बेई आर्यो छ। क ज्यो लोगबाग बरा काम कर्या छ वाक्अ बेई अर वे ज्यो परबु बेई बराई का बोल बोल्या छ वान्अ सजा देव्अ।” 16 ये लोगबाग बड़बड़ करबाळा छ अर दोष हेरबाळा छ। ये खुदकी मंसा का गुलाम छ अर खुदका मुण्ढा सुं घमण्ड की बाता बोल्अ छ। खुदका फायदा बेई ये दूसरा की चम्मचागीरी करअ छ।
चेताबो अर परबचन
17 पण प्यारा भायलाओ, वा बचना न्अ याद रांखो ज्यो आपणा परबु ईसु मसी का थरपेड़ा पेलीसुंई खे चुक्या। 18 eवे थान्अ खेव्अ छा क “आखरी का दना मं अस्यान का लोगबाग होव्अला ज्यो परबु अर उंका मनखा की हांसी उड़ाब्अ करअला। अर वे सुगली मंसा क पाछ्अ-पाछ्अ चाल्अला।” 19 ये लोगबाग वेई छ ज्यो थाम्अ फूट पटकाव्अ छ। वे बस ई दुनिया की जन्दगी का बारा मंई सोच्अ छ, ज्यांम्अ पवितर-आत्मा कोन्अ।
20 पण प्यारा भायलाओ थे थांका घणा पवितर बस्वास मं बढ़ता होया अर पवितर-आत्मा मं परातना करता होया। 21 खुदन्अ परमेसर का परेम मं बणाया रखाणो अर सदामेस की जन्दगी पाबा बेई आपणा परबु ईसु मसी की दीया की बाठनाळता रेवो।
22 अर ज्यो बेम मं छ वाप्अ दीया करो। 23 आग्अ बड़र दूसरा न्अ आग मं सुं झपटर नखाळल्यो। पण दीया दखाती बगत सावचेत रेवो अर वां लत्ता सुं बी नफरत करो ज्यांप्अ वांका पाप का सुभाव का दाग लागमेल्या छ।
परमेसर की महमा