ईसु मसी का सांचा सपाई
2
1 परबु मं म्हारा छोरा तीमुथियुस, मसी ईसु सुं मलबाळी दीया सुं गाढो होजा। 2 घणासारा मनखा की मेजुदगी मं तु ज्योबी बाता मंसुं सुण्यो छ, उन्अ यां बस्वास करबाळा मनखा न्अ सुंपद ज्यो दूसरा न्अ सक्ष्या देबा क काबिल छ। 3 दुख झेलबा मं मसी ईसु का एक चोखा सपाई की न्याय म्हारी लारां आजा। 4 अस्यानको कोई बी, ज्यो सपाई की न्याय सेवा करर्यो छ, तो वो खुदका राज करबाळा अधिकारयां न्अ राजी करबा की जोरी करतो रेव्अ छ अर संसार का जंजाळा मं कोन पड़अ। 5 अर अस्यान'ई कोई, कोई दोड़ मं हस्सो लेव्अ तो उन्अ जीत को मुकुट उं बगत ताणी कोन मल्अ जद्या ताणी क वो निमा न्अ मानता होया उं दोड़ मं हस्सो कोन लेव्अ। 6 मेनती काम करबाळो कसाण ई पैदा को सबसु पेलो हस्सो लेबाको अधिकारी छ। 7 म ज्यो बताऊ छु उंप्अ बच्यार कर। परबु थन्अ सब समझबा की सक्ती देव्अलो।8 ईसु मसी न्अ याद करता रेवो ज्यो मरया मंसुं पाछो जीवतो होग्यो अर ज्यो दाऊद का बंस को छ। योई उं चोखा समचार को मतलब छ जिको मं उपदेस देऊ छु। 9 ई चोखा समचार बेई मं दुख झेलर्यो छु। अण्डअ ताणी क एक अपराधी की जस्यान मन्अ साकळ्या सुं बांध मेल्या छ। पण परमेसर को बचन तो बन्धना सुं आजाद छ। 10 जिसुं ई म परमेसर का चुण्या मनखा बेई दुख उठातो रेऊ छु क वान्अ बी मसी ईसु सुं मलबाळो उद्धार सदामेस की महमा की लारा मल सक्अ। 11 या बात बस्वासहाळी छ क,
“ज्यो आपा उंकी लारा मरग्या,
तो उंकी लारा जीव्अला बी।
12 aअर ज्यो दुख उठाया छा,
तो उंकी लारा राज बी करअला।
अर ज्यो आपा उन्अ छोड़ देव्अला,
तो वो बी आपान्अ छोड़ देव्अलो।
13 आपा छाव्अ बना बस्वासहाळा होवां,
पण वो सदामेस बस्वासहाळो रेव्अलो,
क्युं क वो खुदका खिया न्अ कोन नट सक्अ।”
एक चोखो काम करबाळो
14 लोगबागा न्अ यां बांता बेई चेताता रेवो अर परमेसर न्अ गुवा मानर वान्अ सावधान करता रेवो क वे सब्दा न्अ लेर लड़ाई झगड़ा कोन करअ। अस्यान का लड़ाई झगड़ा सुं कांई फायदो कोन होव्अ, पण यान्अ ज्यो सुण्अ छ वे बी नास हो जाव्अ छ। 15 खुदन्अ परमेसर क ग्रहण करबा जस्यान को बणार एक अस्यान का सेवा करबाळा की न्याय साम्अ ल्याबा की जोरी करतो रे, क कोई बात बेई सरमाबा की जुरत कोन होव्अ। अर ज्यो परमेसर का सांचा बचन न्अ चोखा काम मं लेतो होव्अ, 16 अर संसार की फालतु बाता सुं बच्यो रेव्अ छ। क्युं क ये बाता लोगबागा न्अ परमेसर सुं आंतरअ लेजाव्अ छ। 17 अस्यान का मनखा की सक्ष्या नासुर की न्याय फेल्अली। हुमिनयुस अर फिलेतुस अस्यान का ई छ। 18 ज्यो सच्चाई का गेला सुं भटकग्या। अर वांको खेबो छ क फेरू जीवतो होबो तो अब ताणी हो बी चुक्यो। ये एकात मनखा को बस्वास खतम करर्या छ। 19 कांई बी होव्अ परमेसर ज्यो नीव बणायो छ वा मजबुती सुं उबी छ। उंप्अ मण्ढर्यो छ, “परबु खुदका भक्ता न्अ जाण्अ छ।” अर “वो हरेक, ज्यो खेव्अ छ क वो परबु को छ, उन्अ बराई सुं बच्यो रेणी चायजे।”
20 एक बड़ा घर मं सोना-चांदी का ई बरतन-भाण्ड़ा कोन होव्अ, उम्अ ग्यार अर लकड़ी का बी बरतन-भाण्ड़ा होव्अ छ। एकात खास काम बेई होव्अ छ अर एकात सबळा कामा बेई होव्अ छ। 21 जिसुं कोई मनख ज्यो खुदन्अ बराया सुं सुद्ध कर लेव्अ छ तो वो खास काम को बण्अलो अर फेर पवितर बणर खुदका परबु बेई काम को साबित होव्अलो। अर कस्या बी चोखा काम बेई तियार रेव्अलो।
22 तु जुवानी की बरी मन्सा सुं आंतरअ रे। ज्यो सुद्ध मन सुं परबु को नांऊ लेता रेव्अ छ, धार्मिक जन्दगी, बस्वास, परेम अर सांति बेई वां सबळा की लारा रेबा की जोरी करतो रे। 23 मुरखता का अर फालतु का सुवाल-जुवाबा सुं सदा बच्यो रे। क्युं क थे जाणोई छो क यांसुं लड़ाई झगड़ा पदा होव्अ छ। 24 अर परबु की सेवा करबाळा न्अ तो झगड़ो करणी ई कोन चायजे। उन्अ तो सबळा प दीया करणी चायजे। उन्अ सक्ष्या देबा जस्यान को होणो चायजे। उन्अ सेन करबाळो होणो चायजे। 25 उन्अ खुदका बिरोध करबाळा न्अ बी ई आस सुं क परमेसर उन्अ बी मन फराबा की सक्ती देव्अलो, नरमाई सुं समझाणी चायजे। जिसुं वान्अ बी सांच को ज्ञान हो जाव्अ 26 अर वे सचेत होर सेतान का उं फन्दा सुं बचर नखळ जाव्अ जिम्अ सेतान वान्अ पकड़ मेल्यो छ, क वे सेतान की मन्सा सुं चाल सक्अ।