तीमुथियुस क नांऊ पौलुस को दूसरो कागद
2 तीमुथियुस
तीमुथियुस क नांऊ
1
1 यो कागद पौलुस की ओड़ी सुं छ, ज्यो परमेसर की मन्सा सुं मसी ईसु को खास थरपेड़ो छ अर जिन्अ परमेसर उं जन्दगी का बारा मं परचार करबा बेई खन्दायो छ जिन्अ परमेसर मसी ईसु का गठजोड़ सुं देबा को वादो कर्यो छ। 2 aपरबु मं म्हारा प्यारा छोरा तीमुथियुस म थन्अ यो कागद माण्ढ़र्यो छु।थन्अ आपणा परम बाप परमेसर अर परबु मसी ईसु की ओड़ी सुं दीया, दीया अर सांति मल्अ।
धन्यवाद अर प्रोत्साहन
3 रयात दन खुदकी परातना मं थान्अ याद करता होया मं उं परमेसर को धन्यवाद करू छु अर उंकी सेवा आपणा आग्ला बढ़ा की न्याय पवितर मन सुं करू छु। 4 म्हारअ बेई तु ज्यो आंसु बुवायो छ वान्अ याद कर म तसुं मलर आण्द सुं भरबा बेई उत्यावळो होर्यो छु। 5 bमन्अ थारो वो सांचो बस्वास बी याद छ ज्यो पेली थारी नानी लोईस अर थारी माई यूनीके म छो। मन्अ बस्वास छ क वोई बस्वास थम्अ बी छ।
6 जिसुं मं थन्अ याद दुवार्यो छु क परमेसर का उं बरदान न्अ काम मं लेतो रेज्यो थन्अ जद्या मल्यो छो जद्या मं थारअ उपरअ हाथ मेल्यो छो। 7 क्युं क परमेसर आपान्अ ज्यो आत्मा दियो छ वो आपान्अ डरपण्या कोन बणाव्अ पण परेम, संयम अर तागत सुं भर देव्अ छ।
8 जिसुं तु आपणा परबु की गुवाई देबा सुं अर म ज्यो मसी बेई बन्दी बण मेल्यो छु म्हारअ बेई लाज मत खाव्अ। पण उं परमेसर की सक्ती की जस्यान उंका चोखा समचार बेई दुख झेलबा मं म्हारो साथ द्अ।
9 वोई आपणी रक्ष्या कर्यो छ अर पवितर जन्दगी बेई आपान्अ बलायो छ। आपणा खुदका कर्या करमा सुं नेई पण उंकी खुदकी मन्सा सुं अर दीया सुं ज्यो परमेसर सुं मसी ईसु म आपान्अ सरूवात सुंई सुंप दियो छो। 10 पण अब आपणा उद्धार करबाळा मसी ईसु क परगट होबा की लार-लार आपण्अ बेई चोड़्अ कर्यो गियो छ। वो मोत को अंत कर दियोc अर जन्दगी अर सदामेस की जन्दगी न्अ चोखा समचार सुं उजाळा मं कर दियो छ।
11 dई चोखा समचार न्अ फेलाबा बेई मन्अ एक परचार करबाळो खास थरपेड़ो अर सखाबाळा की न्याय बणाया छ। 12 अर याई बजे छ जिसुं म या बाता को दुख उठार्यो छु।e अर फेरबी सरमाऊ कोन्अ क्युं क जिप्अ म बस्वास कर्यो छु म उन्अ जाणु छु अर म या मानु छु क वो मन्अ ज्यो सुंप्यो छ वो उंकी रुखाळी करबा मं समर्थ छ जद्या ताणी वो पाछो आबा को दन आव्अ।
13 ज्यो खरी बाता तु म सुं सुण्यो छ वान्अ उं बस्वास अर परेम की लारा ज्यो मसी ईसु मं छ खुद बेई वान्अ आदर्स बणाया रखाण। 14 आपण्अ माईन्अ रेबाळी पवितर-आत्मा सुं तु उं अनमोल धरा की रुखाळी कर जिन्अ थन्अ सुंप्यो गियो छ।
15 जस्यान क तु जाण्अ छ क वे सबळा ज्यो एसिया परदेस मं रेव्अ छ मन्अ छोड़ग्या। फुगिलुस अर हिरमुगिनेस वाम्अ सुंई छ।
16 उनेसिफुरुस का परवार का प परबु दीया करअ। क्युं क वे घणा मोका प मन्अ सुख दिया छ। अर वो म्हारअ जैळ मं रेबा सुं सरमायो कोन्अ। 17 पण जद्या वो रोम सहर मं आयो छो तो जद्या ताणी म उन्अ कोन मल्यो वो मन्अ हेरतो रियो। 18 परबु करअ उन्अ उं परबु का पाछो आबा का दन मं परबु की ओड़ी सुं दीया मल्अ, वो इफिसुस नगर मं म्हारी ज्यो सेवा कर्यो छो वान्अ तु खुब चोखा जाण्अ छ।