तीतुस क नांऊ पौलुस को कागद
पौथी को परिचय
जुवान तीतुस गेर यहूदी ज्यात सुं मसी को बस्वासी बण्यो छो। वो पौलुस की धरम परचार की यात्रा मं वांकी लारां सायता करबाळो छो।
पौलुस यो कागद तीतुस न्अ उं बगत माण्ढ्यो छो, जद्या तीतुस क्रेते टापू मं चोखो समचार सुणार्यो छो। पौलुस वान्अ उण्डअ छोड़र गियो छो क वे बस्वास्या की टोळी का कामा न्अ देख्अ। ई कागद मं तीन बाता स्याप छ।
1 माण्ढबाळो बस्वास्या की टोळी का अगुवा का चाल-चलण का बारा मं तीतुस न्अ बताव्अ छ क वांको चरित्र कस्यान को होणो चायजे, क्युं क क्रेते टापू का रेबाळा वांका बरा चरित्र की बजेसुं बदनाम छा।
2 माण्ढबाळो बस्वास्या की टोळी का बढ़ा-बुढ़ा अर जुवाना न्अ अर गुलामा न्अ धरम की सीक कस्यान देणी चायजे, उंका बारा मं सलाह देव्अ छ। बुढ़ी डोकर्या, जुवान छोर्या न्अ सक्ष्या देव्अली।
3 माण्ढबाळो आखरी मं मसी का बेवार बेई खेव्अ छ क मसी मनखा न्अ सान्ति अर भाईचारा की भावना सुं जन्दगी जीणी चायजे अर उन्अ रोष, फालतु सुवाल-जुवाब अर दल बणाबा सुं आंतरअ रेणो चायजे।
रूप-रेखा
भूमिका 1:1–4
बस्वास्या की टोळी का सेवा करबाळा 1:5–16
बस्वास्या की टोळी का डोकरा-डोकर्या अर जुवान छोरा-छोर्या का काम 2:1–15
चेतावणी अर समझाबो 3:1–11
उपसंहार 3:12–15