तीतुस क नांऊ पौलुस को कागद
नमस्कार
1
1 भाया तीतुस! म ईसु मसी की ओड़ी सुं थरपेड़ो परमेसर को दास पौलुस थन्अ यो कागद माण्ढ़र्यो छु।म परमेसर का टाळेड़ा मनखा न्अ वांका बस्वास मं बड़ाबा बेई, अर सांच की सक्ष्या देबा बेई खन्दायो गियो छु, जिसुं वे भगती की जन्दगी मं जीव्अ। 2 जिकी निम सदामेस की जन्दगी की आस छ। परमेसर ज्यो कद्या बी झूंट कोन बोल्अ संसार की सरूवात सुं पेली ईको बचन देदियो छो। 3 अर सई बगत प परमेसर ई समचार न्अ उपदेसा सुं प्रगट कर्यो। वोई समचार मन्अ सुप्यो गियो छ। अर आपान्अ बचाबाळा परमेसर की आज्ञा सुं म ईको परचार करू छु। 4 aम्हाकी जस्यान को बस्वास रांखबा की बजेसुं तीतुस तु सांच्याई म्हारा छोरा जस्यान को छ अर यो बस्वास सबळा बेई छ। आपणा परम बाप परमेसर अर उद्धार करबाळा मसी ईसु की ओड़ी सुं थन्अ दीया अर सांति मल्अ।
क्रेते मं तीतुस का काम
5 म थन्अ क्रेते टापू मं जिसुं छोड़यो छो क उण्डअ ज्योबी काम आधो रेग्यो, तु उन्अ पूरो करदे अर म्हारा आदेस की जस्यान हरेक नगर मं बढ़ा-बुढ़ा न्अ थरप्अ अर जुम्मेवारी देद्अ। 6 bउन्अ जद्याई थरपज्यो जद्या उम्अ कोई दोष कोन्अ होव्अ। वो एक लुगाईहाळो होव्अ उंका छोरा-छोरी बस्वासी होव्अ अर वांक्अ उपरअ अनुसासन तोड़बा को दोष कोन लगायो जा सक्अ। अर वे बसम्अ रेबाळा होणी चायजे। 7 बस्वास्या की टोळी का मुखिया न्अ नरदोष अर सबळी बराई सुं अछुतो होणो चायजे। क्युं क जिन्अ परमेसर का मुनीम को काम सुंप्यो गियो छ, उन्अ घमण्डी, अडोक्ला अर दारू पिबाळो कोन्अ होणो चायजे। उन्अ रयाड़ करबाळो, पिसा को लोभी कोन्अ होणी चायजे 8 पण उन्अ तो आवभगत करबाळो, भलाई न्अ चाहबाळो, खुदन्अ बसम्अ रांखबाळो, धरमी, भगत अर कायदा मं रेबाळो होणो चायजे। 9 उन्अ उं बस्वास करबाळा संदेस न्अ मजबुती सुं पकड़या रेणी चायजे जिकी सक्ष्या उन्अ मली छ जिसुं वो लोगा न्अ खरी सक्ष्या देर वान्अ हिम्मत बन्धवा सक्अ। अर ज्यो वांका बिरोधी छ, वांका मुण्ढा बन्द कर सक्अ। 10 क्युं क घणा मनख बिरोधी होव्अ, घणा फालतु की बाता बणाबाळा अर घणा दूसरा न्अ धोखो देबाळा छ। म खास तो यहूदी बस्वासी मनखा बेई खेर्यो छु।c 11 वांको तो मुण्डो बन्द कर्यो जाणोई चायजे। क्युं क वे ज्यो बाता सखाबा की कोन्अ वान्अ ई सखार घरका घर उजाड़र्या छ। बराई का गेला सुं धन कमाबा बेई वे अस्यान करअ छ। 12 क्रेते मं रेबाळो एक बढ़ो मनख खुदका मनखा बेई खियो छ, “क्रेते का रेबाळा सदाई झूंट बोल्अ छ, वे जंगळी ज्यानबर छ, वे आळसी छ, खावड़या छ।” 13 या बात सई छ जिसुं तु वान्अ जोरसुं दकाल जिसुं वांको बस्वास पक्को हो सक्अ। 14 यहूद्या की मनघड़ी कहाण्या अर वां मनखा का आदेसा प, ज्यो सत सुं हटग्या कोई बी चत मत लगावो। 15 पवितर मनखा बेई सब पवितर छ, पण असुद्ध अर बस्वास कोन करबाळा मनखा बेई कांई बी पवितर कोन्अ। क्युं क वांका मन अर आत्मा दोनी असुद्ध कर्या गिया छ। 16 वे परमेसर न्अ जाणबा बेई खेव्अ छ पण वांका काम दखाव्अ छ क वे परमेसर न्अ कोन जाण्अ। वे बरा लाग्अ छ अर खियो कोन्अ मान्अ अर कस्या बी चोखा काम न्अ करबा जस्यानका कोन्अ।