आखरी दना मं
3
1 याद रखाणज्यो आखरी दना मं आपण्अ उपरअ घणीबरी बगत आवली। 2 लोगबाग लालची, स्वार्थी, अभिमानी, अपराधी, परमेसर की बराई करबाळा, माई-बाप की कोन सुणबाळा, बना दीया का, अपवितर 3 बना परेम का, बना छमा, बराई करबाळा, असंयमी, जंगळी, ज्योबी चोखो छ उंका बिरोधी, 4 बस्वासघाती, बना समझहाळा, अहंकार सुं भर्यो अर परमेसर का परेमी होबा की बेई सुखहाळा हो जाव्अला। 5 वे धरम को दखावो तो करअला पण उंक्अ माईन्अ की सक्ती बेई नट जाव्अला। वांसु सदा आंतरअ रिज्यो।6 क्युं क वाम्अ सुं एकात सखाबाळा अस्यान का छ ज्यो घरा मं उळर कमजोर इच्छा सक्ती की अर पापहाळा कामा की हरेक इच्छा प चालबाळी बेरबान्या न्अ काबु मं कर लेव्अ छ। 7 ये बेरबान्या वा सखाबाळा सुं सदाई सिखबा की जोरी तो करअ छ पण सांच कांई छ ईन्अ कोन पेचाण्अ। 8 ये सखाबाळा यन्नेस अर यम्ब्रेस जस्यानका छ, ज्यो मूसा को बिरोध कर्या छा, वस्यान ई ये मनख सांच का बिरोधी छ। या मनखा की बुद्धि भ्रष्ट छ अर ये बस्वास क पाछ्अ कोन चाल सक्या। 9 पण ये साऊटा आग्अ कोन चाल पाव्अला क्युं क जस्यान यन्नेस अर यम्ब्रेस की मुरखता साम्अ आगी छी, वस्यान ई यांकी बी आजाव्अली।
आखरी आदेस
10 कांई बी होव्अ तु म्हारी सक्ष्या न्अ मान्यो छ। म्हारा जीबा का लखण, जीबा को मतबल, म्हारो बस्वास, म्हारी सेनसीलता, म्हारो परेम, म्हारो धीरज 11 aम्हारा वां दुखा अर कळेसा मं म्हारो साथ दियो छ थे तो जाणोई छो क अन्ताकिया, इकुनियुम अर लुस्त्रा नगरा मं मन्अ कतरा जोरका दुख दिया छा ज्यांन्अ म सेन कर्यो छो। पण परबु वां सब मं म्हारी रक्ष्या कर्यो छ। 12 सांच्याई मसी ईसु की सेवा की भलाई मं ज्यो जीबो छाव्अ छ, सताया ई जाव्अला। 13 पण पापी अर ठग दूसरा न्अ छळता होया अर खुद छळ्या जाता होया बरा सुं बरा होता जाव्अ छ। 14 पण थे ज्यां बाता न्अ सिख्या अर बस्वास कर्या छो, वान्अ करता जावो। थे जाणो छो क यां बाता न्अ थे कुण सुं सिख्या छ। 15 अर मन्अ तोल छ क तु बाळपणा सुंई पवितर सास्तरा न्अ बी जाण्अ छ। मसी ईसु मं बस्वास सुं थन्अ वा समझ मली छ जिसुं पाप सुं छूटवाड़ो मल सक्अ छ। 16 सबळो सास्तर परमेसर की आत्मा की सक्ति सुं माण्ढ्यो गियो छ। यो मनखा न्अ सांच की सक्ष्या देबा बेई, वान्अ सुधारबा बेई, वान्अ वांकी बराई दखाबा बेई अर धार्मिक जन्दगी मं सिखबा का काम की छ। 17 जिसुं परमेसर को हरेक सेवा करबाळो सास्तरा न्अ काम मं लेता होया सब तरा का चोखा कामा न्अ करबा बेई समर्थ अर भर्यो पूरो होव्अलो।