इफिसुस 3

गेर यहूद्‍या म पौलुस को परचार

1 जिसुं म पौलुस थां गेर यहूद्‍या क ताणी मसी ईसु को दास छु अर ईकी बजेसुं म जैळ मं छु। 2 परमेसर दीया करर ज्यो काम थांका भला ताणी मन्अ सुंप्यो छ बीका बारा मं थे जरूर सुण्याला। 3 अर परमेसर मन्अ बीका राज की गुप्त बाता को खुलासो कर्यो छो, जिन्अ म थान्अ छोटा रुप मं ई कागद मं माण्ढ्यो छु। 4 थे बी कागद न्अ पढ़्अला तो जाण जाव्अला क म मसी का राज न्अ कतरो जाणु छु। 5 यो राज पाछली पीढ़ी का मनखा प परगट कोन्अ कर्यो गियो छो जस्यान अबार परमेसर अपणा पवितर खास थरपेड़ा अर बीकी ओड़ी सुं बोलबाळा न्अ आत्मा सुं बतायो छ। 6 वो राज यो छ क, मसी ईसु का गठजोड़ सुं अर चोखा समचार सुं यहूदया की लार गेर यहूदी बी वारीस, एक'ई काया का अंग, अर परमेसर का बचन का सीरी होव्अ। 7 परमेसर की दीया का वरदान सुं म चोखा समचार को हाळी बणग्यो। ज्यो बीकी काम करबाळी सक्‍ती सुं मन्अ मल्यो छ। 8 म परमेसर का सबळा पवितर मनखा मं सबसुं छोटो छु। पण मन्अ या दीया मली छ क मसी का अनमोल धन का बारा मं बताबाळा चोखा समचार न्अ गेर यहूदया म परचार करू। 9 अर बी लुखेड़ी योजना न्अ सबळा मनखा प खुलासो करू। ज्यो सबका बणाबाळा परमेसर मं सरूवात सुंई लुखेड़ी छी। 10 जिसुं अब बस्वास्या की टोळी सुं परमेसर को सबळी समझ, उपरली भाळ का राजा अर अधिकारयां प खुलासो कर्यो जाव्अ। 11 परमेसर ईन्अ खुदका सदामेस मकसद की जस्यान कर्यो छो, जीन्अ वो आपणा परबु मसी ईसु सुं पूरी कर दियो। 12 मसी का गठजोड़ अर बीप्अ आपणा बस्वास सुं नरभे होर आपान्अ परमेसर क सांकड्अ जाबाको भरोसो छ। 13 जिसुं, म अरदास करू छु क थांक्अ ताणी म ज्यो दुख भोगर्यो छु, बांकी बजेसुं आस मत छोड़ज्यो क्युं क यासुं थांकी महमा छ।

मसी को परेम

14 ई बजेसुं म परम-पिता क आग्अ गोढ़ावाण्या बेठर परातना करू छु। 15 बी सुंई सरग अर धरती का सबळा परिवारा न्अ गोत मल्अ छ। 16 परमेसर बीका महमा का धन की जस्यान, खुदकी आत्मा सुं थांकी अन्तरात्मा न्अ तगड़ी होबा क ताणी तागत देव्अ। 17 अर मसी थांका बस्वास सुं थांका हीया मं रेवे। थांकी जड़ां अर निम परेम मं धस जावे। 18 जिसुं थान्अ परमेसर का सबळा पवितर मनखा की लार या समझबा की सक्‍ती मल्अ क मसी को परेम कतरो चोड़ो, लाम्बो, ऊंचो अर उण्डो छ। 19 हां, थे मसी ईसु का बी परेम न्अ जाणल्यो ज्यो सबळा ज्ञान सुं परे छ, जिसुं थे परमेसर का सबळा गुणा सुं भरजावो। 20 परमेसर आपण्अ माईन्अ बीकी काम करबाळी सक्‍ती सुं आपणा मांगबा सुं अर बच्यारबा सुं बी बत्तो काम कर सक्अ छ। 21 सबळा बस्वास्या की टोळी क माईन्अ परमेसर की महमा मसी ईसु सुं जुग-जुग होती रेव्अ। अस्यान'ई हो जाव्अ!