मोत सुं जन्दगी की ओड़ी
2
1 aएक बगत छी ज्दया थे लोग बा अपराधा अर पापा की बजेसुं आत्मिक रुप सुं मर मेल्या छा 2 थे पेलीई संसार का बरा निमा प चाल्अ छा मतलब आम्बर मं राज करबाळा सेतान का खिया मं चाल्अ छा। अर अब बाई आत्मा बा मनखा मं काम कर'री छ ज्यो परमेसर को खियो कोन्अ मानर्या। 3 एक बगत आपा सबळा बी बांकी जस्यान काया की सुगली मंसा न्अ पूरी करअ छा। मन अर काया की मनसा न्अ पूरी करअ छा, अर संसार का दूसरा मनखा जस्यान परमेसर का रोषा का काम का छा।4 पण परमेसर दीया को धणी छ। अर आपण्अ ताणी बीको परेम घणो लूंठो छ। 5 अपराधा की बजेसुं आपा आत्मा का रुप सुं मरमेल्या'ई छा, मसी की लार-लार वो आपान्अ जन्दगी दियो। परमेसर खुदकी दीया सुंई थान्अ बचायो छ। 6 आपणो मसी ईसु सुं गठजोड़ छ जिसुंई परमेसर आपान्अ मसी की लार पाछा जीवता करर अपणा राज मं बीकी जीवणी-बगल मं बठाण्यो। 7 जिसुं वो आबाळा हरेक जुग मं खुदकी दीया का अपरम्पार धन न्अ दखाव्अ जिन्अ वो मसी ईसु का गठजोड़ सुं आपण्अ माळ्अ दीया सुं दखायो छ। 8-9 परमेसर बीकी दीया सुं अर थांका बस्वास की बजेसुं थान्अ बचायो छ। यो तो परमेसर को बरदान छ। यो थांका करमा को फळ कोन्अ क थे ई बात सुं घमण्ड कर सको। 10 क्युं क परमेसर आपान्अ बणाबाळो छ। मसी ईसु का गठजोड़ सुं वो पेलीसुंई तियार करेड़ा चोखा काम करबा क ताणी आपान्अ बणायो छो।
मसी मं एको
11 जिसुं याद रखाणो क जनम सुं थे यहूदी कोन्अ छा। काया मं मनखा का हाता सुं खतना करेड़ा यहूदी मनख, बांका खतना माळ्अ घमण्ड करअ छ अर ब थान्अ बना खतनाळा खेव्अ छ। 12 बी बगत थे मसी न्अ कोन्अ जाण्अ छा। थे परदेसी छा, मतलब परमेसर का चुणेड़ा इजरायली कोन्अ छा। अर परमेसर का दियेड़ा करार का बचन मं थांकी कोई पाती कोन्अ छी। अर ई संसार मं बना आस अर परमेसर क बना जन्दगी जीव्अ छा। 13 पण थे ज्यो पेली परमेसर सुं घणा आंतरअ छा, अब मसी ईसु खुद बली होबा की बजेसुं अर बीकी लार आपणा गठजोड़ सुं परमेसर क सांकड्अ ल्याया गिया छो। 14 बोई यहूदी अर गेर यहूदया न्अ आमा-सामा मलार एक कर दियो अर खुदकी काया की बली चढ़ार आंतरअ रांखबाळी डोळी न्अ ढ़सा दियो मतलब बेर न्अ। 15 bईसु मसी बा दोन्या न्अ एक'ई परजा बणाबा ताणी करूस प खुदकी मोत सुं मूसा का कायदा कानूना न्अ बीकी सबळी निमा अर आज्ञा की लार हटा दियो। अर बाको मेलमिलाप करर बांका बीच मं सांति ल्यायो। 16 cअर करूस प खुदकी मोत सुं बेरभाव को नास करर बा दोन्या को एक काया मं गठजोड़ करर परमेसर सुं फेरू मला दियो। 17 वो आर, थां गेर यहूदया न्अ, ज्यो परमेसर सुं घणा आंतरअ छा अर यहूदया न्अ, ज्यो बीक्अ सांकड्अ छ, मेळजोळ कराबाळो चोखो समचार सुणायो। 18 क्युं क आपा दोनी मसी की बजेसुं अर पवितर-आत्मा सुं परम-पिता क सांकड्अ पूंच सका छा। पवितर-आत्मा एक'ई छ।
19 ईको यो नतिजो नखळ्यो क थे अब नतो परदेसी अर न्अ पराया रिया। पण थे परमेसर का पवितर मनखा की लारअ परमेसर का राज मं रेबाळा अर बीका घरका होग्या। 20 थे अस्यान की हेली छो जिकी नीमा खास थरपेड़ा अर परमेसर की ओड़ी सुं बोलबाळा छ, अर बीको नासीक खुद मसी ईसु छ। 21 बीम्अ'ई हेली की सबळी चीजा एकलार जुड़र परबु ताणी एक पवितर मन्दर बणती जारी छ। 22 मसी का गठजोड़ सुं आपा सबळा, आत्मा सुं परमेसर की रेबा की हेली बणाया जारया छा।