इफिसुस नगर मं रेबाळा बस्वास्या की टोळी क नांऊ पौलुस को कागद
1
1 aम पौलुस ज्यो परमेसर की मंसा सुं मसी ईसु को एक खास थरपेड़ो छु। इफिसुस मं रेबाळा परमेसर का पवितर मनख अर ईसु मसी प बस्वास रखाणबाळाओ 2 थान्अ आपणा परम-पिता परमेसर अर परबु ईसु मसी की ओड़ी सुं दीया अर सांति मल्अ।मसी का गठजोड़ सुं मलेड़ा आसीर्वाद
3 आपणा परबु ईसु मसी का बाप, परमेसर की महमा हो। क्युं क वो आपान्अ मसी सुं सरग मं सबळा भांत-भांत का आत्मिक आसीर्वाद दियो छ। 4 वो आपान्अ संसार न्अ बणाबा सुं पेली मसी सुं गठजोड़ कर थरप्यो छ। जिसुं आपा बीक्अ साम्अ परेम मं पवितर अर नरदोष होवां। 5 बीका परेम सुं वो आपान्अ ईसु मसी सुं झोळ्या आयेड़ा छोरा मानबा क ताणी पेल्या सुंई बच्यार करलियो। याई बीकी मंसा अर योई बीको उछ्याव छ। 6 बीकी महमा सुं भरेड़ी दीया की बढ़ाई होव्अ। जिन्अ बीका लाड़ला सुं गठजोड़ कर दियो छ। 7 bआपा बीसुं जुड़ेड़ा छा जिसुं ईसु मसी का लोई सुं आपान्अ छूटवाड़ो मल्यो छ। मतलब आपान्अ आपणा पापा सुं छमा मली छ। या परमेसर की बड़ी दीया छ, 8-9 जिन्अ वो आपण्अ माळ्अ उळ्ळाई सुं उन्दा दियो। अर बीकी मन्सा का राज न्अ सबळी अकल अर समझ सुं आपण्अ माळ्अ खुलासो कर्यो छ। जिन्अ मसी सुं पूरो कराबा क ताणी वो पेलीसुई उचम्बा सुं तय कर मेल्यो छो। 10 परमेसर को यो बच्यार छो क दन पुरा होता'ई सई बगत मं सृष्टी की सबळी चीजान्अ मसी क तळ्अ ल्याव्अ।
11 परमेसर सबळी बाता न्अ खुदकी योजना अर निरणे की जस्यान करअलो। अर परमेसर खुदका मकसद की जस्यानई ईसु मसी का गठजोड़ सुं म्हान्अ खुदकी परजा बणबा क ताणी थरप्यो छ। यो सरूवात सुंई परमेसर को निरणे छो। 12 जिसुं म्हेc ज्यो पेली मसी प आस रखाण मेल्या छा, बीकी महमा की बढाई करर्या छा।
13 ज्दया थे थान्अ उद्धार देबाळा सांचा अर चोखा समचार न्अ सुणर मसी प बस्वास कर्या छा, तो परमेसर बीकी पवितर-आत्मा की छाप थांप्अ लगायो छ। जिन्अ देबा को बचन परमेसर दियो छो। 14 परमेसर आपान्अ ज्यो देबा को बचन दियो छो, बीको पवितर-आत्मा गेण्अ छ, जद्या ताणी क वो खुदका मनखा न्अ छूटवाड़ो कोन्अ दे देव्अलो। जिसुं बीकी महमा की बढ़ाई होवे।
पौलुस की परातना
15 ई बजेसुं ज्दया सुं म परबु ईसु मसी मं थांको बस्वास अर परमेसर का सबळा पवितर मनखा क ताणी थांका परेम का बारा मं सुण्यो छु, 16 म थांक्अ ताणी परमेसर को धन्यवाद लगतमार करर्यो छु, म थान्अ खुदकी परातना मं याद करू छु। 17 म परातना करू छु क महमा का धणी परम-पिता मतलब आपणा परबु ईसु मसी को परमेसर थान्अ अकल अर खुलासो करबाळी आत्मा देव्अलो, जिसुं थे बिन्अ जाण सको। 18 म्हारी परमेसर सुं अरदास छ क थांका मन की आंख्या खुल जाव्अ जिसुं थे जाण सको क जी आस ताणी थान्अ वो बलायो छ अर जी पांती न्अ वो खुदका सबळा पवितर मनखा न्अ देव्अलो, बा कतरी महान अर अनमोल छ। 19-20 अर थे या बी जाण सको क आपा बस्वास्या ताणी बीकी सक्ती कतरी अणोती छ। मसी न्अ मरया मंसुं फेरू जीवतो करर बीका राज मं खुदकी जीवणी-बगल मं बठाण्बा मं ज्यो सक्ती काम करी छ बाई सक्ती आपा मं बी काम कर'री छ। 21 मसी सबळा बड़ा राजा, अधिकारी, सक्त्यां अर मालिक अर हरेक नांऊ क उपरअ छ। जिको ओहदो ई जुग मंई नही पण आबाळा जुग मं बी सबळा सुं उपरअ छ। 22 dपरमेसर सबन्अ मसी का पगा तळ्अ कर दियो अर बोई बिन्अ बस्वास्या की टोळी क ताणी सबळा क माळ्अ माथा की जस्यान परधान बणायो छ। 23 मसी की काया मतलब बस्वास्या की टोळी बीकी पुरणता छ। अर मसी सबळा न्अ भर्यो-पुरो करअ छ।