फिलिप्पी नगर मं रेबाळा बस्वास्या की टोळी क नांऊ पौलुस को कागद
पौथी को परिचय
यो कागद पौलुस युरोप महाद्वीप म सबळा सुं पेली बणी बस्वास्या की टोळी का नांऊ सुं माण्ढ्यो छो। या बस्वास्या की टोळी पौलुस फिलिप्पी नगर म बणायो छो। यो नगर मकिदुनिया परदेस म रोम का राज को एक उपनिवेस छो। ई खास नगर का बस्वास्या की टोळी न्अ पौलुस यो कागद माण्ढ्यो छो। उं बगत पौलुस काळ कोटड़ी म बन्द छो। एक बात पौलुस न्अ आकतो कर मेली छी वा छी फिलिप्पिया नगर का बस्वास्या की टोळी म मेजुद झूंटी सिक्षा। पण फेरबी ई कागद म आण्द अर आत्मबस्वास का सूर खास छ, जिसुं यो तोल पड़्अ छ पौलुस को परबु ईसु म कतरो साऊटो बस्वास छो।
यो कागद माण्ढबा की एक बजे या बी छी क जद्या पौलुस न्अ पिसा की सायता की जुरत छी, तो फिलिप्पी नगर का बस्वासी भाई-बेण उन्अ पिसा की सायता खन्दाया छा। ई सायता को धन्यवाद देबा की मन्सा सुं पौलुस यो कागद माण्ढ्यो छो। ई मोका को फायदो उठाता होया पौलुस वान्अ धीरज बन्दातो, बस्वास दुवातो अर भरोसो दुवाव्अ छो क वे पौलुस का दुखा अर खुदका दुखा म बी सास अर आस रखाण्अ, कळेस म खुसी मनाव्अ, राजी रेव्अ। वो वांसु अरदास करअ छ क वे ईसु मसी जस्यानका नमर बण्अ अर स्वार्थ अर घमण्ड की भाऊना का बस म कोन होव्अ। वो वान्अ याद दुवाव्अ छ क मसी म वांकी जन्दगी परमेसर का अनुग्रह को बरदान छ, ज्यो वान्अ बस्वास सुं मल्यो छ न्अ की मूसा की बेवस्था की जस्यान करमकाण्ड कर्या सुं। ई कागद की खास बात या छ क ईसु मसी बस्वास अर जन्दगी म मेजुद आण्द, खुसी, भरोसो, एकता, थरचा की भाऊना दखाई गेई छ। इम्अ आपा एक साधारण यूनानी समाज का सज्जन-मनखा अर धरम म थरपेड़ा पौलुस क गाब्अ भाइचारो देख्अ छा।
रूप-रेखा
भूमिका 1:1–11
पौलुस की खुदकी दसा 1:12–26
मसी म जन्दगी 1:27—2:18
तिमोथी अर इपाफ्रुदीतुस की जुगत 2:19–30
करमकाण्ड करबाळा अर सास्त्रया सुं चेताबो 3:1—4:9
पौलुस का भायला 4:10–20
उपसंहार 4:21–23