बाळक अर माई-बाप
6
1 aओ बाळकाओ, परबु का गठजोड़ की बजेसुं थांका माई-बाप को खियो मानो, क्युं क योई सई छ। 2 “खुदका माई-बाप को आदर कर।” या पेली आज्ञा छ जिकी साथ वादो छ क 3 “जिसुं थांको भलो होव्अ अर थे धरती माळ्अ लाम्बी उमरहाळा होओ।” 4 bओ माई-बापओ, थे खुदका बाळका न्अ रोष मत दुवाओ पण परबु सुं मली सक्ष्या अर सई-गलत को फरक सखाता होया बांको पालण-पोषण करो।मालिक अर हाळी
5 cओ हाळीओ, जस्यान थे मसी की आज्ञा मानो छो वस्यानई थे संसार का मालिका की आज्ञा डरपता अर कांपता होया जीजान सुं मानो। 6 मनखा न्अ राजी करबाळा की जस्यान दखाबा क ताणी बांकी चाकरी मत करो पण मसी का दास की जस्यान मन सुं परमेसर की मरजी पूरी करो। 7 अर बी सेवा न्अ मनखा की नही पण परबु की जाणर चत लगार करो। 8 थे जाणो छो क, थाम्अ सुं हरेक छाव्अ वो हाळी होवे या फेर आजाद, दोन्या न्अ बांका भला कामा ताणी परबु ईनाम देव्अलो। 9 dओ मालिकओ, थे बी थांका हाळ्यां की लार बियान् को ई बुवार करो अर बान्अ डरपाबो छोड़द्यो। थे जाणो छो क बांको अर थांको मालिक सरग मं छ अर वो मुण्ढा देखर न्याय कोन करअ।
परबु का कवच न्अ पेरल्यो
10 आखरी बात या छ क परबु का गठजोड़ अर बीकी तगड़ी-तागत सुं मजबूत होता जावो। 11 परमेसर का सबळा कवचe न्अ पेरल्यो। जिसुं थे सेतान f की चाल को सामनो कर सको। 12 क्युं क आपणी लड़ाई मनखा सुं कोन्अ पण उपरली भाळ मं रेबाळा बरा राजा, अधिकारयां, काळी दनीया मं राज करबाळी अन्धेरा की सक्त्यां अर गन्दी आत्मा सुं छ। 13 जिसुं परमेसर का सबळा कवच न्अ पेरल्यो क थे बरा दन मं बीको सामनो कर सको अर आखरी ताणी लड्या पाछ्अ बी डट्या रे सको। 14 तो सांच को पट्टो कमर मं बान्धल्यो। अर झुल पेरल्यो, मतलब परमेसर क साम्अ सही करो। 15 अर जूता पेरल्यो, ज्यो मेळजोळ कराबाळा चोखा समचार को परचार करबा ताणी त्यार होबा जस्यान छ, 16 अर या सबळा की लार बस्वास की ढ़ाळ लेओ जिसुं थें बी सेतान की सबळी बळती तीरां न्अ बुझा सको। 17 अर उद्धार को टोप, अर पवितर-आत्मा की तलवार ज्यो परमेसर को बचन छ लेल्यो। 18 पवितर-आत्मा सुं सदाई हर तरा सुं परातना अर अरदास करबा ताणी जागता रेवो। सबळा परमेसर का पवितर मनखा ताणी लगतमार परातना करता रेवो। 19 अर म्हारअ ताणी बी अरदास करज्यो क जद्या म बोलु, बी बगत परमेसर मन्अ अस्यानको बचन देव्अ क हिम्मत रांखर चोखा समचार का राज न्अ बता सकुं। 20 म ई चोखा समचार का परचार करबा की बजेसुं साकळ्या मं बन्धेड़ो परमेसर को दूत छु। म्हारअ ताणी अरदास करो क जस्यान मन्अ परचार करणी चायजे, वस्यानई बना ड़र सुं परचार कर सकुं।
आखरी नमस्कार
21 ghम कस्यान छु अर कांई करर्यो छु, बा सबळी बाता थान्अ परबु को बस्वासहाळो सेवक अर आपणो लाड़लो भाई तुखिकुस बता देव्अलो। 22 म बिन्अ ई बजेसुं खन्दार्यो छु क म्हाका समचार थान्अ देव्अ अर थांकी हिम्मत बढ़ाव्अ। 23 ओ भायाओ, थां सबळा न्अ परम-पिता परमेसर अर परबु ईसु मसी सुं बस्वास की लार सांति अर परेम मल्अ। 24 आपणा परबु ईसु मसी सुं अमर परेम रांखबाळा सबळा क माळ्अ परमेसर की दीया होती रेव्अ।