कुलुस्सियों का बस्वास्या की टोळी क नांऊ पौलुस को कागद
कुलुस्सियों
पौथी को परिचय
एसिया महाद्वीप का कुलुस्सियों नगर का बस्वास्या की टोळी न्अ यो कागद पौलुस माण्ढ्यो छो ई बस्वास्या की टोळी न्अ पौलुस कोन बणायो छो पण जि परदेस म या बस्वास्या की टोळी छी। उं परदेस बेई पौलुस गाढ़ी जुम्मेवारी समझ्अ छो। तो वो इफिसुस नगर सुं कुलुस्सियों नगर की बस्वास्या की टोळी न्अ धरम की सेवा करबाळा खन्दातो रेव छो। इफिसुस नगर अगूणी दसा म रोम का उपनिवेस आसिया परदेस की राजधानी छो।
पौलुस न्अ तोल पड़यो क कुलुस्सियों का बस्वास्या की टोळी म झूंट्याई का सखाबाळा घुस्याया। ये सखाबाळा बस्वास्या की टोळी न्अ जोरीसुं सखाव्अ छा क परमेसर न्अ जाणबा अर उद्धार पाबा बेई या जरूरी छा क “आधिपत्य अर अधिकार” नांऊ का आम्बर की सक्तया की पुजा करअ। ईक्अ अलावा ये सखाबाळा बस्वास्या की टोळी न्अ सखाव्अ छा क खतना जस्यानकी धार्मिक प्रथा को पालण करअ, अर भोजन सुं जुड़या दूसरा यहूदी निमा को पालण करअ। यांक्अ अलावा ओर बाता म ये कोन करबा की सीख देव्अ छा।
पौलुस यां भगंराबाळी सीख को बिरोध कर्यो अर ई कागद सुं एक सांचो, मसी चोखो समचार खन्दायो। वांका चोखा समचार को सार यो छो क परबु ईसु मसी कोई बी मनख न्अ पूरो उद्धार देबा जस्यान को छ। उपरहाळी सिक्षा म कळ्डा करमकाण्ड छ ज्यो बस्वासी न्अ आराम सुं मसी सुं आंतरअ ले जाव्अ। पण सृष्टी न्अ बणाबाळो परमेसर मसी म सबळी सृष्टी न्अ बणायो छ अर वो मसी मेई सृष्टी न्अ खुद म एकठार करर्यो छ। मसी म एकठार होर ई संसार खुदका उद्धार की आस कर सक्अ छ।
कागद माण्ढ़ती अर मण्ढवाती बगत पौलुस केद म छो अर तुखिकुस नांऊ को एक बस्वासी भाई ई कागद न्अ कुलुस्सियों नगर लेर गियो छो। ध्यान लगाबाळी बात छ क बीकी लारा सेवा करबाळो उनेसिमुस गियो छो जिकी बढ़ाई म पौलुस फिलेमोन क नांऊ कागद माण्ढ्यो छो।
रूप-रेखा
भूमिका 1:1–8
मसी को सुभाऊ अर काम 1:9—2:19
मसी मं नुई जन्दगी 2:20—4:6
उपसंहार 4:7–18