कुलुस्सियों का बस्वास्या की टोळी क नांऊ पौलुस को कागद
कुलुस्सियों
1
1-2 परमेसर की मन्सा सुं मसी ईसु को खास थरपेड़ो पौलुस अर आपणो भाई तीमुथियुस यो कागद, कुलुस्सियों नगर मं रेबाळा परमेसर का मनखा बेई ज्यो आपणा मसी का गठजोड़ सुं बस्वासी भाई छ वाक्अ नांऊ माण्ढ़र्या छा।आपणा परम बाप परमेसर की ओड़ी सुं थान्अ दीया अर सांति मल्अ।
धन्यवाद की परातना
3 ज्दया मे थांक्अ बेई परातना करां छा, तो सदाई आपणा परबु ईसु मसी का पिता परमेसर को धन्यवाद करां छा। 4 क्युं क मे मसी ईसु मं थांका बस्वास अर परमेसर का सबळा पवितर मनखा बेई थांका परेम का बारा मं सुण्या छा। 5 यो उं आस की बजेसुं होयो छ ज्यो थांक्अ बेई परमेसर का राज मं सुरक्षित छ। अर जिका बारा मं थे पेल्याई सांचा बचन मतलब चोखा समचार सुं सुणमेल्या छो, ज्यो थां कन्अ आयो छो। 6 जद थे बिन्अ सुण्या छो अर परमेसर की दीया सुं बीकी पूरी सांच समझ्या छो। बी बगत सुं लेर हालताणी बी जस्यान चोखो समचार थांकी जन्दगी मं काम करर्यो छ वस्यानई पूरा संसार मं बी फळ फुलर्यो छ। 7 aम्हाकी लार काम करबाळो लाड़ला इपफ्रास सुं थे परमेसर की दिया का बारा मं सींख्या छा। ज्यो म्हाकी ओड़ी सुं मसी को बस्वासहाळो सेवक छ। 8 वो म्हान्अ बी, ज्यो परेम पवितर-आत्मा थान्अ दियो छ बीका बारा मं बतायो छो।
9 जी दन सुं म्हे थांका बारा मं सुण्या छा बी दन सुं थांक्अ बेई परातना करबो कोन्अ छोड़या। म्हाकी परातना या छ क परमेसर बीकी मनसा का ज्ञान सुं पुरा आत्मिक ज्ञान अर समझ की लार थान्अ भर देव्अ। 10-12 जिसुं थे बीकी महमा भरी पूरी सक्ती सुं तगड़ा हो जाओ। अर सबळा चोखा कामा मं फळता अर परमेसर का ज्ञान मं बड़ता होया परबु क लायक जी सको। अर बिन्अ सब बाता मं राजी कर सको। जिसुं थे सबने सहन कर सको अर सब दसा मं धीरज रांख सको। अर राजी होर परमेसर बाप न्अ धन्यवाद दे सको। ज्यो थान्अ उजाळा का राज मं परमेसर का मनखा की लार वारिस क लायक बणायो छ।
13 परमेसर आपान्अ सेतान की सक्ती सुं छुड़ार खुदका लाड़ला पुत का राज मं लेर आग्यो। 14 bबी पुत सुंई आपान्अ छूटवाड़ो मल्यो छ मतलब आपणा पाप सुं छमा।
मसी सबसुं बड़ो छ
15 मसी कोन दिखबाळा परमेसर को दिखबाळो रुप छ। वो सबळी चीजा मं पहलो छ। अर सारी सृष्टी मं सबसुं बड़ो छ। 16 क्युं क बीसुं ई परमेसर सबळी चीजान्अ बणायो छ। चाये सरग की हो या फेर धरती की हो, चाये दिखबाळी हो या फेर कोन दिखबाळी हो, अर चाये सिंगासन हो, मालिक हो, राजा हो, या फेर अधिकारी हो। सबळा बीसुं रचेड़ा छ अर बीक्अ बेई रच्या गिया छ। 17 सबळी चीजान्अ बणाबा सुं पेली मसी छो। अर सबळी चीजान्अ सम्भाळबाळो बी वोई छ। 18 cबस्वास्या की टोळी रुपी काया को मुखियो मतलब माथो वोई छ। वोई सरूवात छ अर मरया पाछ्अ फेर जीवता होबाळा मं सुं पेलो बी वोई छ। जिसुं सबळी बाता मं पेली उन्अई ठोर मल्अ छ। 19 क्युं क या परमेसर की मरजी छ, क उंका सबळा गुण उंका पूत मं रेव्अ। 20 dपरमेसर करूस प मसी का बलिदान का लोई सुं सबळी चीजान्अ मलार खुद कन्अ पाछी ल्याबा को निरणे करलियो। छाव्अ वा धरती की हो या फेर सरग की।
21 एक बगत छी जद्या थे थांका बच्यार अर बरा कामा की बजेसुं परमेसर सुं आंतरअ अर उंका बेरी छा। 22 पण अब परमेसर काया मं मसी की मोत की बजेसुं थासुं मेलमिलाप करलियो। जिसुं वो थान्अ पवितर, बना कळंक का अर नरदोष बणार खुदक्अ साम्अ कर सक्अ। 23 यो जद होव्अ छ जद थे बस्वास मं अटल बण्या रेव्अला अर जी चोखा समचार न्अ थे सुण्या छा बीसुं मलेड़ी आस मं बना हाल्या-चाल्या बण्या रेवेला। म पौलुस बी उं चोखा समचार को सेवक बण्यो, जि चोखा समचार को परचार ई आम्बर क तळ्अ पूरी दुनिया मं होयो छ।
बस्वास्या की टोळी बेई पौलुस का काम
24 अब म थांक्अ बेई ज्यो दुख उठार्यो छु, बीसुं राजी छु अर मसी की काया, मतलब बस्वास्या की टोळी बेई मसी ज्यो दुख उठायो छ वाम्अ म लगतमार बीको पांतिदार बणर्यो छु। 25 परमेसर मन्अ बस्वास्या की टोळी को सेवक जिसुं बणायो छ क म थांका भला बेई परमेसर का बचन न्अ पूरो-पूरो परचार करू। 26 पाछला जुग की पीढ़ी मं परमेसर जी राज न्अ मनखा सुं लुखार रांख्यो छो। पण अब बीका पवितर मनखा माळ्अ खुलासो कर्यो छ। 27 परमेसर छाव्अ छ क ई महमा भरया राज न्अ सबळा मनख जाण लेव्अ। यो राज ओ छ क मसी थाम्अ छ मतलब महमा भरी आस मं थे सामिल छो। 28 ई बजेसुं आपा सबळा मनखा न्अ मसी का बारा मं परचार करां छा। अर म्हे हरेक न्अ मसी का गठजोड़ मं पाका बणार परमेसर क साम्अ पेस करबा बेई पूरा ज्ञान की लार सखावां अर चतावा छा। 29 ई बजेसुं म म्हारअ मायन्अ काम करबाळी मसी की सक्ती सुं अस्यान करबा बेई जोराई मेनत करर्यो छु।