कुलुस्सियों 2

1 म चाऊ छु क थान्अ ई बात को तोल पड़जाव्अ क म थांक्अ बेई, लौदीकिया सहर मं रेबाळा बेई अर वा सबळा बेई ज्यो खुद तो मंसुं कद्‍या बी कोन मल्या, कतरी मेनत करर्यो छु। 2 या खेबा को म्हारो योई मकसद छ क वांका मना न्अ जोस मल्अ अर वे आमा-सामा परेम मं बन्ध जाव्अ। जिसुं बस्वास को वो सबळो धन ज्यो सांचा ज्ञान सुं मल्अ छ, वो वान्अ मल जाव्अ अर वान्अ परमेसर को राजहाळो सांच मल्अ, वो राजहाळो सांच खुद मसी छ। 3 मसी का ज्ञान अर बुद्धि की सबळी बाता छान्अ छ। 4 अस्यान म जिसुं खेर्यो छु क कोई थान्अ मीठी-मीठी बेखाबाळी बाता सुं धोखो कोन देव्अ। 5 क्युं क काया का रुप सुं तो म थां कन्अ कोन्अ पण फेरबी आत्मा का रुप सुं म थां कन्अ छु। म थांकी जन्दगी का तरीका अर मसी मं थांका बस्वास की मजबुती न्अ देखर राजी छु।

मसी मं बण्यारेवो

6 जस्यान थे मसी ईसु न्अ परबु का रुप मं मान्या छो, वस्यान ई थे उम्अ बण्यारेवो। 7 थांकी जड़ा उम्अ'ई होव्अ अर थांकी बणावट उंप्अई होव्अ अर थे बस्वास मं गाढ़ा होता रेवो जस्यान थान्अ सखायो गियो छ। परमेसर को धन्यवाद देबाळा बणो।

8 साउचेत रेवो क थान्अ खुदका वां संसार का बच्यार अर फालतु प्रपंचा सुं धोखो कोन देव्अ ज्यो मनखा सुं मल्अ छ, या मसी की देन कोन्अ पण जगत मं राज करबाळी आत्मा की देन छ। 9 क्युं क परमेसर की सम्पुर्णता मसी की काया मं वास करअ छ। 10 अर उम्अ'ई बण्या रेर थे पुरा बण्या छो। वो हरेक राजा सुं अर अधिकारी सुं ऊंचो छ। 11 थांको खतनो बी उम्अ'ई होयो छ। यो खतनो मनखा क हाथा सुं कोन होयो, पण यो खतनो थान्अ थांकी पापहाळी मनख्याजुण का प्रभाऊ सुं छूटवाड़ो छ अर यो मसी सुं पूरो होयो छ। 12 यो जिसुं होयो क जद्‍या थान्अ बतिस्मा मं उंकी लारा गाढ़ दिया अर ज्यो परमेसर उन्अ मरया मंसुं जीवतो कर दियो छो, उं परमेसर का काम मं थांका बस्वास की बजेसुं, उंकी लारा थान्अ बी पाछो जीवतो कर दियो।

13 खुदका पापा अर खुदका बना खतना की काया की बजेसुं थे मर मेल्या छा पण थान्अ परमेसर मसी की लारा जन्दगी देदियो अर आपणा सबळा पापा न्अ खुला मन सुं छमा कर दियो। 14 परमेसर निमा का उं लेख न्अ आपण्अ साम्अ सुं हटा दियो ज्यो आपणा नांऊ सुं अर आपण्अ बिरोध मं छो। उन्अ कीला सुं करूस प ठोकर मटा दियो। 15 अर उं करूस सुं परमेसर बराई का आत्मिक राजा अर अधिकारयां न्अ बना साधनाळा कर दियो अर खुदका जीत का अभियान म बान्अ बन्दया की न्याय खुदक्अ पाछ्अ-पाछ्अ चलायो।

मसी की आजादी मं रेवो

16 जिसुं खाबा-पीबा की चीजा या फेर तुंवारा मं, नया चांद को तुंवार या फेर आरामहाळा दन न्अ लेर कोई थांकी बराई कोन करअ। 17 ये तो ज्यो बाता आबाळी छ वांकी छाया छ। पण उं छाया की सांची काया तो मसी की छ। 18 देखो कोई मनख ज्यो दखावा का काम सुं या फेर सरगदूता की पूजापाठ सुं थान्अ थांका फळ न्अ पाबा सुं आंतरअ कोन करदे। अस्यानको मनख सदाई अस्यान का दर्साव का झूंट बोलतो रेव्अ छ अर खुदकी संसार की सोच की बजेसुं झूंटा घमण्ड सुं भर्यो रेव्अ छ। 19 वो खुदन्अ मसी क अधीन कोन रखाण्अ ज्यो सबळी काया न्अ जोड़ अर नाड़ी सुं जोड़र सबळी काया को भलो करअ छ, अर जिसुं आत्मा को विकास परमेसर की मरजी की जस्यान मेसुस होव्अ छ।

20 क्युं क थे मसी की लारा मर चुक्या छो अर थान्अ संसार की सक्ष्या सुं छूटवाड़ो मलचुक्यो छ। तो थे ई संसार का मनखा की जस्यान को बुवार क्युं करो छो? अर अस्यान का निमा न्अ क्युं मानो छो जस्यान 21 “ईन्अ हाथ मं मतल्यो” “ईन्अ मत चाखो” या फेर “ईक्अ हाथ बी मत लगावो?” 22 ये सबळी चीजा तो काम मं आता-आता नास हो जाव्अली। क्युं क ये तो बस मनखा का बणाया निम अर सक्ष्या छ। 23 सांच्याई मनखा की बुद्धि का ये निम अर मनमर्जी सुं सरगदूता की पूजापाठ अर झूंटी दीनता अर खेई तरीका सुं खुदकी काया न्अ दुख देबो मनखा की काया बेई चोखा तो होव्अ छ। पण या निमा सुं वांका पापहाळा सुभाव न्अ रोकबा मं कोई फायदो कोन होव्अ।