बारा चेला न्अ खन्दाबो
9
1 फेर ईसु बारा चेला न्अ एकलार बलायो। अर बान्अ दुष्टात्मा न्अ नखाळबा को अधिकार अर सक्ति दियो। वो बान्अ रोगला न्अ नीका करबा की सक्ति बी दियो। 2 फेर वो बान्अ परमेसर का राज को चोखो समचार सुणाबा अर रोगला न्अ नीका करबा बारे खन्दायो। 3 वो बान्अ खियो, “खुदकी जात्रा बेई वे कांई बी लारा कोन्अ लेवे; न्अ लकड़ी, न्अ झोळी, न्अ रोटी, न्अ चांदी अर न्अ कोई फालतु लत्ता। 4 थे जस्या बी घर मं जावो उण्डअ'ई रुको। अर जद्या ताणी बद्या कोन्अ हे जावो उण्डअ'ई रेवो। 5 abअर जण्ढ्अ मनख थांको सुवागत कोन्अ करअ तो जद्या थे बी नगर न्अ छोडो तो बाका बिरोध मं गुवाई हेबा बेई खुदका पगा की ग्यार न्अ झरकाड़द्यो।” 6 तो वे उण्डअ सुं चालर छाव जण्ढ्अई चोखा समचार को परचार करता अर मनखा न्अ नीका करता सबळा गांवा मं हेर जात्रा करबा लागग्या।हेरोदेस को भरम
7 cअब जद्या एक चोथाई देस को राजो हेरोदेस, ज्योबी हियो छौ बीका बारा मं सुण्यो तो वो चंता मं पड़ग्यो क्युं क एकात मनख खेर्या छा क “यूहन्ना न्अ मरया मंसुं जीवतो कर दिया।” 8 दूसरा खेर्या छा, “एलिय्याह प्रगट होयो छ।” कोई ओर खेर्या छा क “पराणा जमाना को कोई परमेसर की ओड़ी सुं बोलबाळा जीवतो होयो छ।” 9 पण हेरोदेस खियो, “म यूहन्ना को तो माथो कटवा दियो छो, फेर यो छ कुण जिका बारा मं म अस्यान की बाता सुणर्यो छु?” जिसुं हेरोदेस बीन्अ देखबा की जोरी करबा लागग्यो।
पांच हजार सुं सावटा मनखा न्अ जमाबो
10 फेर जद्या थरपेड़ा पाछा आया तो वे ज्योबी कर्या छा सब ईसु न्अ बताया। तो वो बान्अ लार लेर छान्असीक बेतसेदा नांऊ का नगर मं लेर चलग्यो। 11 पण भीड़ न्अ तोल पड़ग्यो अर वे बी बीक्अ पाछ्अ हेग्या। ईसु बाको सुवागत कर्यो अर परमेसर का राज का बारा मं बान्अ बतायो अर ज्यांन्अ दुवाई की जुरत छी बान्अ नीका कर्यो। 12 जद्या दन आथबा लाग्यो तो वे बारा चेला ईसु कन्अ आया अर खिया, “जळा न्अ बदया कर क वे सांकड्अ का गांवा मं अर खेता मं जार खाबा बेई लेले। क्युं क आपा अण्डअ सूनी ठोर मं छा।” 13 पण वो बान्अ खियो, “थेई यान्अ खाबा बेई कोई-कांई द्यो।” वे खिया, “म्हाखन्अ पांच रोठ्या अर दो मछ्या क अलावा ओर कांई बी कोन्अ। तु या तो कोन्अ छाव्अ न्अ क में जांवा अर या सबळा बेई रोठ्या मोल लेर आवां।” 14 उण्डअ अन्दाजन पांच हजार मोटयार छा। पण ईसु खुदका चेला न्अ खियो, “यान्अ पचास-पचास की पंगत मं बठाण द्यो।” 15 तो वे वस्यानई कर्या अर हरेक न्अ बठाण दिया। 16 फेर ईसु पांच रोठ्या न्अ अर दो मछ्या न्अ लेर सरग ओड़ी नाळर बा बेई परमेसर को धन्यवाद दियो अर फेर बाका टुकड़ा कर बान्अ खुदका चेला न्अ दियो क वे भीड़ का मनखा न्अ खाबा बेई दे। 17 जद्या सबळा मनख खार धापग्या अर बचया टुकड़ा सुं बीका चेला बारा टोकर्या भरया।
पतरस को बस्वास
18 अस्यान हियो क जद्या ईसु ऐकलो परातना करर्यो छो तो बीका चेला बी उंकी लार छा। तो ईसु बान्अ बुज्यो, “लोगबाग कांई खेव्अ छ क म कुण छु?” 19 dवे खिया, “बतिस्मा देबाळो यूहन्ना, कोई खेव छ एलिय्याह पण कोई दूसरा खेव छ क पराणा जमाना को कोई परमेसर की ओड़ी सुं बोलबाळा मरया मंसुं जीवतो हेग्यो।” 20 eईसु बान्अ खियो, “अर थे कांई खेवो छो क म कुण छु?” पतरस खियो, “परमेसर को मसी।”
21 पण ई बारा मं कोई न्अ बी कोन्अ बता बेई चतार ईसु बान्अ खियो।
दुख-भोगबा की भविष्यवाणी
22 “या जरूरी छ क मनख को छोरो घणा दुख भोग्अलो अर बुढ़ा यहूदी नेता, महायाजक अर धरम सखाबाळा बीक्अ बेई नट जाव्अला अर मरा देव्अला। अर फेर तीसरअ दन पाछो जीवतो कर दियो जावलो।”
खुदन्अ छोड़बा की जुरत
23 fफेर वो बा सबळा न्अ खियो, “कोई म्हारअ पाछ्अ चालबो छाव्अ तो बीन्अ खुदा-खुद बेई नटणो पड़ेलो अर बीन्अ रोजीना खुदको करूस उठाणी पड़ेली। जद्या वो म्हारअ पाछ्अ चाल्अलो। 24 gक्युं क ज्योबी खुदकी ज्यान बचाबो छाव्अलो वो बीन्अ गमावलो पण ज्योबी म्हारी बजेसुं खुदकी ज्यान देव्अलो वो बीन्अ बचावलो। 25 क्युं क बीम्अ कोई मनख न्अ कांई फायदो क वो सबळा जगत न्अ पाले अर खुदा-खुद न्अ खतम करदे या फेर भटक जावे। 26 ज्योबी म्हारी बजेसुं या म्हारा बचना की बजेसुं लज्जीत छ बी बेई मनख को छोरो बी जद्या खुदकी सयान, खुदका परम-पिता अर पवितर सरगदूता की स्यान मं प्रगट हेव्अलो तो बाक्अ बेई लज्जित हेव्अलो। 27 पण म थान्अ सांची खेऊ छु अण्डअ कोई अस्या बी उबा छ ज्यो जद्या ताणी कोन्अ मरेला जद्या ताणी परमेसर का राज न्अ कोन्अ देखले।”
ईसु को रुप बदलबो
28 ये बाता खेबा क आठ दन पाछ्अ वो पतरस, यूहन्ना अर याकूब न्अ लेर परातना करबा बेई डुंगर क उपरअ गिया। 29 फेर अस्यान हियो क ईसु परातना करर्यो छो जद्या बीका मुण्ढा को रुप न्यारो हेग्यो अर बीका लत्ता चलक भळक करता धोळा हेग्या। 30 उण्डअ बीसुं बाता करता दो मनख परगटया। वे मूसा अर एलिय्याह छा। 31 ज्यो खुदकी महमा की लार परगटया छा अर ईसु की मोत का बारा मं बाता करर्या छा जिन्अ वो यरूसलेम मं पूरी करबाळो छो। 32 पण पतरस अर ज्यो उंकी लार छा बान्अ नींद आरी छी। पण जद्या वे जाग्या तो ईसु की महमा न्अ देख्या अर वे बा दो जणा न्अ बी देख्या ज्यो उंकी लार उबा छा। 33 अर फेर अस्यान हियो क जस्यानई वे बीसुं बदया हेरया छा, पतरस ईसु न्अ खियो, “गरूजी यो चोखो छ क में अण्डअ छा, आपान्अ तीन छतर्या बणाणी छ; एक थारबेई, एक मूसा बेई अर एक एलिय्याह बेई।” वो कोन्अ जाण्अ छौ क कांई खेर्यो छ। 34 वो ये बाता खेईर्यो छो क एक बादळो आयो अर बान्अ खुदकी छाया मं समेट लियो। जस्यानई बाक्अ उपरअ बादळो चायो वे घबराग्या। 35 hiजद्या बादळा सुं आकासवाणी हेई, “यो म्हारो छोरो छ। ईन्अ म थरप्यो छु, ईकी सुणो।” 36 जद्या आकासवाणी हेगी तो वे ईसु न्अ ऐकलो पाया। वे ईका बारा मं छाना रिया। वे ज्योबी देख्या छा बीका बारा म बी बगत कोई न्अ कांई बी कोन्अ खिया।
दुष्टात्मा का रोगला छोरा न्अ नीका करबो
37 दूसरअ दन अस्यान होयो क जद्या वो डुंगर सुं तण्अ उतर्यो तो बीन्अ घणीसारी भीड़ मली। 38 जद्या भीड़ मंसुं एक मनख बळायो, “गरूजी म परातना करू छु क म्हारा छोरा प दीया कर। यो म्हारो एक'ई छोरो छ। 39 अण्याचुकी एक दुष्टात्मा बीन्अ पकड़ लेवे छ अर वो बळा उठ्अ छ। बीन्अ दुष्टात्मा अस्यो मरोड़े छ क बीका मुण्ढा मंसुं झागड़ा नखळबा लागजाव्अ छ। बा बीन्अ छोड़री कोन्अ छी अर दुख दिया जारी छी। 40 म थारा चेला सुं परातना कर्यो क वे बीन्अ बारे नखाळदे पण वे अस्यान कोन्अ कर सक्या।” 41 जद्या ईसु जुवाब दियो, “अरअ बस्वास कोन करबाळाओ अर भटक्या मनखवो म ओर कतरा दन थांकी लार रेऊलो अर कद्या ताणी थांकी से तो रेऊलो? खुदका छोरा न्अ अण्डअ लेर आ।” 42 हालताणी वो छोरो आईर्यो छो क दुष्टात्मा बीन्अ पटक दी अर मरोड़ दी। पण ईसु दुष्टात्मा न्अ दकाल्यो अर छोरा न्अ नीका कर बीका बाप न्अ पाछो सुंप दियो। 43 वे सबळा परमेसर की ई भलाई सुं चकीत हेग्या।
दुख-भोगबा की दुबारा भविष्यवाणी
ईसु ज्योबी करर्यो छो बीन्अ देखर जद्या लोगबाग अचम्बो करर्या छा तो ईसु खुदका चेला न्अ खियो, 44 “अब ज्यो म थान्अ खेर्यो छु बा बाता प चत लगावो। मनख को छोरो मनखा क हाथा पकड़ायो जावलो।” 45 पण वे ई बात न्अ कोन्अ जाण सक्या। या बात बासुं छान्अ छी जिसुं वे ईन्अ कोन्अ जाण सक्या अर वे ई बात का बारा मं बीन्अ बुजबा सुं ड़रप्अ छा।
बड़ो कुण
46 jएकबार ईसु का चेला क मेईन्अ ई बात प रयाड़ हेगी क बाम्अ सबसु बड़ो कुण छ? 47 ईसु जाणग्यो क बाका मन मं कांई बच्यार छ। तो वो एक बाळक न्अ लियो अर बीन्अ खुदक्अ सांकड्अ उबो कर, 48 kबान्अ खियो, “ज्योबी ई बाळक को म्हारा नांऊ सुं सुवागत करअ छ वो बीको सुवागत करअ छ ज्यो बीन्अ खन्दायो छ। जिसुं थाम्अ ज्यो सबळासु छोटो छ बोई सबळा सुं बड़ो छ।”
खुदको अर परायो
49 यूहन्ना खियो, “गरूजी! मे एक मनख न्अ थारो नांऊ लेर दुष्टात्मा न्अ नखाळतो देख्या छा, तो बीन्अ रोकबा की मनसा बणाया क्युं क वो म्हाकी न्याई थारअ पाछ्अ कोन्अ चाल्अ छो।” 50 ईसु खियो, “बीन्अ रोको मतो क्युं क ज्यो थांका बिरोध मं कोन्अ वो थांका पक्ष मेई छ।”
यरूसलेम की जात्रा की सरूवात
51 अब अस्यान हियो क जद्या बीन्अ सरग मं उठाबा की बगत सांकड्अ आई तो वो यरूसलेम जाबाको निस्चय कर चाल पड़यो।
सामरया सुं नरादर
52 वो खुदका दूता न्अ पेलीई खन्दा दियो छो वे चलग्या अर बी बेई तियारी करबा बेई एक सामरया का गांव मं पुच्या। 53 पण सामरी उण्डअ बाको सुवागत कोन्अ कर्या क्युं क वे यरूसलेम जार्या छा। 54 जद्या बीका चेला याकूब अर यूहन्ना या देख्या तो खिया, “परबु कांई तु छाव्अ छ क में आज्ञा देवा अर आम्बर सुं आग बरस्अ अर बान्अ भसम करदे?” 55 जद्या वो बांकाड़ी फरर बान्अ दकाल्यो, 56 फेर वे दूसरा गांव चलग्या।
चेला बणबा की सर्ता
57 जद्या वे गेला की कोर प जारया छा तो कोई बान्अ खियो, “तु जण्ढ्अ बी जावेलो म थारअ पाछ्अ चालूलो।” 58 ईसु बान्अ खियो, “लुंगत्या कन्अ गुफा हेव्अ छ। अर आम्बर की चड़या क बी घुस्याळा हेव्अ छ पण मनख का छोरा कन्अ माथो देबा बेई बी कोई ठोर कोन्अ।” 59 वो कोई दूसरा न्अ खियो, “म्हारअ पाछ्अ हे जा।” पण वो मनख खियो, “गरूजी मन्अ जाबाद्यो क म फेली म्हारा बाप न्अ गाढयाऊं।” 60 जद्या ईसु बीन्अ खियो, “मरया न्अ खुदका मुर्दा गाड़बा द्यो, तु जार परमेसर का राज को घोषणा कर।” 61 फेर कोई ओर बी खियो, “हे परबु म थारअ पाछ्अ चालूलो पण फेली मन्अ म्हारा घरका सुं बदया हियाबा द।” 62 बीप्अ ईसु बीन्अ खियो, “अस्यो कोई बी ज्यो हळ प हाथ मेलर पाछ्अ देख्अ छ परमेसर का राज क लायक कोन्अ।”