यूहन्ना बतिस्मा देबाळा की मोत
14
1 वा दना मं गलील को राजो हेरोदेस ज्दया ईसु का बारा मं सुण्यो 2 तो वो खुदका नोकरा न्अ खियो, “यो बतिस्मा देबाळो यूहन्ना छ ज्यो मरया मंसुं जीवतो होग्यो। जिसुंई ये सक्तया उम्अ काम करअ छ। अर वो यां चमत्कारां न्अ करअ छ।” 3 aयो वोई हेरोदेस छो ज्यो यूहन्ना न्अ पकड़र स्याकळया सुं बान्धर जैळ मं पटक दियो छो। अस्यान वो हेरोदियास का खेबासुं कर्यो छो, ज्यो पेली उंका भाई फिलिप्पुस की घरहाळी छी। 4 यूहन्ना उन्अ खेव्अ छो क “खुदका भाई की घरहाळी न्अ रखाणबो थारबेई चोखो कोन्अ।” 5 जिसुं हेरोदेस यूहन्ना न्अ मारबो छाव्अ छो पण वो जनता सुं ड़रप्अ छो, ज्यो यूहन्ना न्अ परमेसर की ओड़ी सुं बोलबाळो मान्अ छा। 6 पण ज्दया हेरोदेस को जनम दन आयो तो हेरोदियास की छोरी हेरोदेस अर उंका पावणा क साम्अ नाचर हेरोदेस न्अ अतरो राजी करदी क वो 7 सोगन खार आधा राज ताणी वा ज्यो छाव्अ देबा को बचन देदियो। 8 खुदकी माई का सखाबा मं आर वा खेई, “ई घड़ी बतिस्मो देबाळा यूहन्ना को माथो थाळी मं मेलर मन्अ द।” 9 राजो घणो कळस्यो पण खुदकी सोगन की अर खुदका पावणा की बजेसुं उंकी मांग पूरी करबा की आज्ञा देदियो। 10 वो जैळ मं यूहन्ना को माथो काटबा बेई आदमी खन्दायो। 11 उंको माथो थाळी मं ल्यार उं छोरी न्अ देदिया। वा उन्अ खुदकी माई कन्अ लेगी। 12 ज्दया यूहन्ना का चेला आया अर उंकी लास न्अ लेजार गाढ़ दिया। अर फेर आर ईसु न्अ बताया।पांच हजार न्अ जीमाबो
13 ज्दया ईसु ये समचार सुण्यो तो उण्डअ सुं हटग्यो अर नावड़ा मं चढ़र एक सूनी ठोर मं चलग्यो। पण ज्दया भीड़ न्अ ईको तोल पड़यो तो वे खुदका नगर सुं पाळाई उंक्अ पाछ्अ होगा। 14 ईसु ज्दया नावड़ा मंसुं नखळर बारअ तीर प आयो तो वो घणीसारी भीड़ न्अ देख्यो। उन्अ वाक्अ उपरअ दीया आयी अर वो वांका रोगला न्अ नीका कर्यो। 15 दन आथ्या की उंका चेला उंक्अ सांकड्अ आर खिया, “या सूनी ठोर छ अर दन बी आथर्यो छ। जिसुं ई भीड़ न्अ बद्या कर, क ये गांवा मं जार खुद बेई खाबा बेई मोल लेले।” 16 पण ईसु वान्अ खियो, “यान्अ कढ्अ बी जाबा की जुरत कोन्अ। थे यान्अ खाबा बेई कोई-कांई द्यो।” 17 वे उन्अ खिया, “म्हाखन्अ पांच रोठ्या अर दो मछ्या न्अ छोड़र ओर कांई बी कोन्अ।” 18 ईसु बोल्यो, “वान्अ म्हारअ कन्अ लेर आवो।” 19 वो भीड़ का मनखा न्अ खियो क वे दोबड़ी मं बेठ जाव्अ। फेर वो वा पांच रोठ्या अर दो मछ्या न्अ लेर सरग की ओड़ी झाक्यो अर वा बेई परमेसर को धन्यवाद कर्यो। फेर रोठ्या का अर मछ्या का टुकड़ा तोड़र वान्अ चेला न्अ देदियो। अर चेला वा टुकड़ा न्अ भीड़ मं बांट दिया। 20 सबळा धापर खाया। उंक्अ पाछ्अ बच्या टुकड़ा सुं उंका चेला बारा टोकरा भरया। 21 बेरबान्या अर बाळका न्अ छोड़र उण्डअ खाबाळा कोई पांच हजार मनख छा।
ईसु को पाणी प चालबो
22 उंक्अ पाछ्अ ईसु खुदका चेला न्अ नावड़ा मं बठाण्यो क वे गलील की झील क पेलीपार चलजाव्अ जतरा मं वो उं भीड़ न्अ बद्या कर देव्अलो। 23 भीड़ न्अ बद्या कर वो ऐकलो परातना करबा बेई डुंगर प चलग्यो। दन आथ्या की ईसु उण्डअ ऐकलो छो। 24 ज्दया नावड़ो तीर सुं घणो आंतरअ चलग्यो छो अर सामली बाळ चालरी छी। अर लुरा का भचेड़ा सुं हलोळा खार्यो छो। 25 सुवारअ भागफाटया की ईसु झील क उपरअ चालर वाक्अ सांकड्अ आयो। 26 उंका चेला ज्दया उन्अ झील क उपरअ चालता देख्या तो घबराग्या अर आमा-सामा बतळाबा लागग्या क “यो तो कोई भूत छ!” वे ड़र क मारअ बळाग्या। 27 ईसु झटदाणीसीक वान्अ खियो, “हिम्मत रखाणो! मं छु! डरपो मतो।” 28 पतरस बोल्यो, “परबु, तु छ तो मन्अ पाणी प चालर थार कन्अ आबा बेई खे।” 29 ईसु बोल्यो, “चाल आजा।” पतरस नावड़ा मंसुं नखळर ईसु की ओड़ी चाल पड़यो। 30 ज्दया वो जोरकी भाळ न्अ देख्यो तो घबराग्यो। वो डुबबा लागग्यो अर बळायो, “परबु मन्अ बचा।” 31 ईसु झटदाणी उंका हाथ न्अ पकड़र उन्अ नखाळ लियो अर बोल्यो, “ओ कम बस्वासहाळा तु बेम क्युं कर्यो छ?” 32 अर वे नावड़ा म चढ़ग्या अर भाळ थमगी। 33 ज्यो चेला नावड़ा मं छा वे ईसु की महमा कर खेबा लाग्या, “तु सांच्याई परमेसर को छोरो छ।”
गन्नेसरत नगर का घणा रोगला न्अ नीका करबो
34 वे झील क पेलाड़ी गन्नेसरत नगर की तीर प उतरग्या। 35 ज्दया उण्डअ रेबाळा ईसु न्अ पचाणग्या अर आस-पास का गांवा मं ईको समचार फेला दिया। जिसुं ज्यो रोगला छा वान्अ लोगबाग ईसु कन्अ लेर आया 36 अर बीसुं अरदास कर्या क वो वान्अ उंका लत्ता की कोर क्अ हाथ लगाल्याबा दे। अर ज्यो उंक्अ हाथ लगा लिया, वे सबळा एकधम नीका होगा।