चोखा समचार का परचार बेई चेला न्अ खन्दाबो
10
1 ईसु खुदका बारा चेला न्अ सांकड्अ बलार, वान्अ दुष्टात्मा न्अ बारे नखाळबा को, अर सबळी चड़-पिड़ा न्अ मेटबा को अधिकार दियो। 2 वा बारा थरपेड़ा का नांऊ ये छा सबळा सुं पेली समौन, ज्यो पतरस खुवायो, अर उंको भाई अंद्रियास, जब्दी का छोरा याकूब अर यूहन्ना। 3 फिलिप्पुस, बरतुलमै, थोमा, चुंगी लेबाळो मत्ती, हलफई का छोरा याकूब अर तद्दै। 4 समौन जिलौती अर यहूदा इस्करियोती, ज्यो ईसु न्अ छळ सुं पकड़ायो छो।5 ईसु वा बारा न्अ या आज्ञा देर बारअ खन्दायो क वे “गेर यहूदया का परदेस मं कोन्अ जाव्अ अर कस्या बी सामरया का नगर मं कोन्अ घुस्अ। 6 पण वे इजरायल का कुटम्ब का लळ्डया की नांई गुमेड़ा मनखा कन्अ जाव्अ 7 अर वान्अ परबचन देओ क ‘सरग को राज सांकड्अ'ई छ।’ 8 रोगला न्अ नीका करो, मरया न्अ जीवता करो, कोढ़्या न्अ नीका करो अर दुष्टात्मा न्अ नखाळो। थान्अ सितमात मं परबु की ये सक्तया अर आसीर्वाद मल्या छ, ई बजेसुं यांन्अ सितमात मेई खुल्ला हाथा सुं दूसरा न्अ बांटद्यो। 9 सोना, चांदी या फेर तांबा का पिसा खुदका बटुवा मं मत लिज्यो। 10 aजात्रा बेई झोळी बी मतल्यो। कोई फालतु कुड़ता, चप्पला अर लखड़या या बेंत मत रखाणो। क्युं क मजुर को खुदकी रोठ्या प अधिकार छ।
11 “थे लोग ज्दया बी कोई नगर मं जावो तो तोल पाड़ो क उण्डअ बस्वासहाळो कुण छ। फेर ज्दया ताणी उण्डअ'ई रेवो ज्दया ताणी उण्डअ सुं जाबा कोन्अ लाग्यो। 12 ज्दया थे कोई घर मं जावो तो खेवो क ‘थान्अ सान्ति मल्अ।’ 13 अर ज्यो उं घरका मनख थांकी आवभगत करअ तो थांको आसीर्वाद वांकी लार रेवलो अर ज्यो वे मनख थांकी आवभगत कोन्अ करअ तो थांको आसीर्वाद थां कन्अ पाछो आजाव्अलो। 14 b कोई थांकी आवभगत कोन्अ करअ या फेर थांकी बाता कोन्अ सुण्अ तो उं घर न्अ या फेर उं नगर न्अ छोड़द्यो। अर खुदका पगा क लागी गार न्अ उण्डअ'ई झरकाड़द्यो। 15 cdम थान्अ सांची खेऊ छु क ज्दया न्याय होवलो तो उं दन उं नगर की दसा सुं सदोम अर अमोरा नगरा की दसा साऊटी चोखी होवली।”
खन्दायेड़ा न्अ ईसु चतायो
16 e“सुणो! म थान्अ अस्यान'ई बारअ खन्दार्यो छु ज्यान लळ्डया न्अ न्याळ्या क गाब्अ खन्दाव्अ छ। जिसुं सांप की न्याई चालाक अर कबुतर की न्याई भोळा बणो। 17 fमनखा सुं सावधान रिज्यो क्युं क वे थान्अ पकड़र यहूदी पंचायता मं सुंप देव्अला अर थान्अ खुदका धर्मसभा घरा मं कोड़ा सुं कुटवाव्अला। 18 थान्अ अधिकारयां अर राजा क साम्अ हाजर करअला, क्युं क थे म्हारा चेला छो। थान्अ मोको देव्अला क थे वान्अ अर बना यहूदया न्अ म्हारा बारा मं गुवाई देव्अ। 19 ज्दया वे थान्अ पकड़्अ तो चन्ता मत करज्यो क थान्अ कांई बोलणी छ अर कस्यान बोलणी छ। क्युं क उं बगत थान्अ बतायो जावलो क थान्अ कांई बोलणी छ। 20 याद रांखज्यो बोलबाळा थे कोन्अ पण थांका परम-पिता की आत्मा थांक्अ मेईन्अ बोल्अली।
21 g“भाई, भाई न्अ पकड़वार मार देव्अला, माई-बाप खुदकी ओलाद न्अ पकड़ावला अर ओलाद माई-बापा का बिरोध मं हो जाव्अली। अर वे वान्अ मरवा देव्अला। 22 hम्हारा नांऊ की बजेसुं लोगबाग थासुं बेर रखाण्अला पण ज्यो आखरी बगत ताणी बस्वास रखाण्अलो उंको'ई उद्धार होव्अलो। 23 ज्दया वे थान्अ एक नगर मं सताव्अ तो थे दूसरा नगर मं भाग जाज्यो। म थान्अ सांची खेऊ छु क थे इजरायल देस का सबळा नगरा का चक्कर पुरा कोन्अ करो बीसुं पेली मनख को छोरो पाछो आजाव्अलो। 24 i चेला खुदका गरूजी सुं बड़ा कोन्अ होव्अ अर नोकर बी खुदका मालिक सुं बड़ो कोन्अ होव्अ। 25 jचेला न्अ गरू क बरयाबर अर नोकर न्अ मालिक क बरयाबर होबा मेई सबर रखाण्णी चायजे। ज्दया वे घरका मालिक न्अ'ई बेल्जाबुल खेव्अ छ तो, उं घरका दूसरा मनखा की लार तो ओर बी बरो बुवार करअला।”
परबु सुं डरपो मनखा सुं न्अ'ई
26 k“जिसुं थे वासुं मत डरपज्यो पण ज्योबी लुखमल्यो छ, उघाड्यो जाव्अलो अर ज्यो चीजा छान्अ छ वे चोड्अ करी जाव्अली। 27 म थान्अ अंधेरा मं ज्योबी खेऊ छु म चाऊ छु क थे उन्अ उजाळा मं खेवो। म थान्अ ज्योबी कान मं खेऊ छु थे उन्अ ढागळा क उपरअ चढ़र हाक्का पाड़ो। 28 वांसु मत डरपो ज्यो थांकी काया न्अ नास कर सक्अ छ। वे थांकी आत्मा न्अ कोन्अ मार सक्अ। बस उं परमेसर सुं डरपो ज्यो थांकी काया अर आत्मा दोन्या न्अ'ई नरक मं पटकर नास कर सक्अ छ। 29 एक पिसा की दो चड़या मं सुं बी थांका परम-पिता क जाण्या बना अर उंकी मरजी क बना एकबी जमी क उपरअ कोन्अ पड़ सक्अ। 30 अर थांका माथा को एक-एक बाळ गणेड़ो छ। 31 जिसुं थे डरपो मतो थांको मोल तो वस्यान की घणी चड़या सुं बी साउटो छ।”
ईसु मं बस्वास
32 “ज्यो कोई बी मन्अ सबळा मनखा क साम्अ मान लेव्अलो, म बी उन्अ सरग मं बेठ्या म्हारा परम-पिता क साम्अ मानल्युलो। 33 lपण ज्यो कोई बी सबळा मनखा क साम्अ मन्अ कोन्अ मान्अलो तो म बी उन्अ सरग मं बेठ्या म्हारा परम-पिता क साम्अ कोन्अ मानुलो।”
ईसु का आबा को फळ
34 “या बच्यार मत करज्यो क म ई जमी क उपरअ सान्ति ल्याब्अ आयो छु। मं सान्ति ल्याब्अ न्अ'ई पण खान्ड़ा चलवाब्अ आयोm छु। 35 म छोरा न्अ वांका बाप का बिरोध मं, बेट्या न्अ वांकी माई का बिरोध मं, बू न्अ सासु का बिरोध मं करबा आयो छु। 36 थांका दुस्मन थांका घरहाळा'ई होव्अला। 37 ज्यो मंसुं साउटो खुदका माई-बापा सुं हेत रखाण छ वो म्हारो होबा जस्यान को कोन्अ। ज्यो खुदका बेटा बेट्या सुं मंसुं साउटो हेत रखाण्अ छ, वो म्हारो होबा जस्यान को कोन्अ। 38 nअर वो ज्यो खुदका सताऊ को करूस खुद उठा'र म्हारअ पाछ्अ कोन्अ होव्अ, वो म्हारो होबा जस्यान को कोन्अ। 39 oवो ज्यो खुदको जीव बचाबा की मनसा रखाण्अ छ वो खुदका जीव न्अ नास करअलो। पण ज्यो म्हारअ बेई खुदको जीव देव्अलो वो जन्दगी पाव्अलो।”
ईनाम
40 p“ज्योबी म्हारा नांऊ सुं थान्अ अपणाव्अ छ, वो मन्अ अपणाव्अ छ, अर ज्योबी मन्अ अपणाव्अ छ, वो मन्अ खन्दाबाळा न्अ बी अपणाव्अ छ। 41 ज्यो परमेसर की ओड़ी सुं बोलबाळा न्अ परमेसर की ओड़ी सुं बोलबाळो मानर अपणाव्अ तो उन्अ परमेसर की ओड़ी सुं बोलबाळा की न्याई को फळ मल्अलो। अर ज्यो धरमी मनख न्अ धरमी मानर अपणाव्अ तो उन्अ धरमी मनख जस्यो फळ मल्अलो। 42 अर कोई म्हारा एक चेला न्अ जिसुं सिळो पाणी पाव्अ क वो म्हारो चेलो छ तो म थान्अ सांची खेऊ छु क वान्अ उंको फळ मल्या बना कोन्अ रव्अलो।”