ईसु सूका हाथहाळा न्अ नीका कर्यो
3
1 एकबार फेर ईसु यहूदया का मन्दर मं गियो। उण्डअ एक मनख छो जिको एक हाथ सूको छो। 2 एकात लोगबाग ताकर्या छा क वो आरामहाळा दन उन्अ नीका करअ छ क कोन्अ करअ, जिसुं वान्अ उंक्अ उपरअ दोष लगाबा की बजे लाद्याव्अ। 3 ईसु उं डुंड्या मनख न्अ खियो, “यांक्अ गाब्अ उबो होजा।” 4 अर वान्अ बुजबा लागग्यो, “चोखो कांई छ? आरामहाळा दन क दन भलो करबो क बरो करबो? ज्यान बचाबो क मारबो?” पण वे सबळा छाना रिया। 5 फेर ईसु झळार च्यारूमेर देख्यो अर वांका मन की कळ्डाई सुं उंक्अ घणो कळेस होयो। फेर वो उं डुंड्या मनख न्अ खियो, “थारा हाथ न्अ आग्अ कर।” वो हाथ न्अ आग्अ कर्यो, अर उंको हाथ चोखो होग्यो। 6 फेर फरीसी उण्डअ सुं ढ़गरग्या अर राजा हेरोदेस का दल का मनखा की लार लागर ईसु न्अ कस्यान मारा ईकी जुगत बठाणबा लागग्या।घणा मनख ईसु की लार होया
7 ईसु खुदका चेला की लार गलील की झील ओड़ी ढ़गरग्यो। उंक्अ पाछ्अ घणी भीड़ आरी छी ज्यांम्अ गलील, 8 यहूद्या, यरूसलेम, इदूमिया, अर यरदन नन्दी क पेलाड़ी का अर सूर अर सैदा क अगल-बगल का मनख बी छा। या भीड़ ईसु का कामा का बारा मं सुणर उकन्अ आई छी ज्यांन्अ वो करअ छो। 9 aउं भीड़ की बजेसुं वो चेला न्अ खियो क वे उंक्अ बेई एक छोटो नावड़ो त्यार रखाण्अ जिसुं भीड़ वान्अ कोन्अ दाब सक्अ। 10 ईसु घणा मनखा न्अ नीका कर्यो छो ई बजेसुं वे मनख ज्यो रोगला छा उंक्अ हाथ लगाबा बेई उंकी ओड़ी उसर्र आर्या छा। 11 ज्यां मनखा मं दुष्टात्मा छी वे जद्या बी ईसु ओड़ी नाळ्अ छा तो वे उंक्अ साम्अ तळ्अ पड़जाव्अ छा अर वा वां मनखा मं सुं बळार खेव्अ छी, “तु परमेसर को छोरो छ!” 12 पण वो वान्अ दकाल्अ छो क मन जणावो मतो।
ईसु बारा चेला न्अ थरप्यो
13 फेर ईसु एक डुंगरी प चढ़ग्यो अर ज्यांन्अ छाव्अ छो, सांकड़्अ बलायो। अर वे उंक्अ सांकड़्अ आया। 14 ज्यांम्अ सुं वो बारा न्अ टाळ्यो अर वान्अ थरपेड़ा b खियो। वो वान्अ जिसुं टाळ्यो क वे उंकी लार रेव्अ अर वो वान्अ चोखा समचार न्अ परचार करबा खन्दाव्अ। 15 अर वान्अ दुष्टात्मा न्अ नखाळबा को अधिकार होव्अ। 16 जिसुं वो बारा मनखा न्अ थरप्यो। वे छा; समौन जिन्अ वो पतरस नांऊ दियो; 17 जब्दी को छोरो याकूब अर याकूब को भाई यूहन्ना जिको नांऊ वो बूअनर्गिस रखाण्यो, जिको मतलब छ “गाजबाळो छोरो”, 18 अंद्रियास, फिलिप्पुस, बरतुलमै, मत्ती, थोमा, हलफई को छोरो याकूब, तद्दी अर कनान को समौन अर 19 यहूदा इस्करियोती ज्यो आग्अ जार ईसु न्अ छळ सुं पकड़ायो छो।
ईसु अर दुष्टात्मा को राजो
20 फेर वे घरा चलग्या। जण्ढ्अ एकबार फेरू अतरी भीड़ भेळी होगी क ईसु अर उंका चेला रोटी बी कोन्अ खा सक्या। 21 जद्या उंका परवारहाळा लोगबाग या सुण्या तो वे उन्अ लेबा आया क्युं क लोग खेर्या छा क उंको चत ठकाण्अ कोन्अ। 22 cयरूसलेम सुं आया मूसा का निम न्अ सखाबाळा खेव्अ छा, “बीम्अ बेल्जाबुल मतलब दुष्टात्मा को राजो घुस मेल्यो छ। अर वो उंकी सक्ती सुंई दुष्टात्मा न्अ नखाळ्अ छ।”
23 ईसु वान्अ बलार कस्सा को सायरो लेर खेव्अ लागग्यो, “सेतान, सेतान न्अ कस्यान नखाळ सक्अ छ? 24 अर कोई राज मं फूट पड़जाव्अ तो वो राज कस्यान बण्यो रे सक्अ छ? 25 अर घरका मं ई फूट पड़जाव्अ तो वो घर कस्यान बस्यो रेवलो? 26 अस्यान'ई सेतान खुदको बिरोद करअ अर फूट पटक्अ तो वो कस्यान बण्यो रेवलो? उंको तो नास ह जावलो।
27 “कोई उं तगड़ा मनख का घर म घुसर उंका माल न्अ कोन लेर जा सक्अ जद्या ताणी वो उं तगड़ा मनख न्अ बान्ध कोन देव्अलो। अस्यान कर्या सुंई वो उं घर म लूट सक्अ छ।
28 “म थान्अ सांची खेऊ छु, मनखा न्अ सबळी बाता सुं माफी मल सक्अ छ, वांका पाप अर परमेसर की बराई ज्यो वो करअ छ, वे बी माफ ह सक्अ छ। 29 dपण ज्योबी पवितर-आत्मा की बेजती कर लो उन्अ कद्या बी छमा कोन्अ मल्अ पण वो जुगा-जुगा को पापी हो जाव्अलो।” 30 ईसु यान जिसुं खियो छो क उण्डअ घणा मनख खेर्या छा क ईक्अ मेईन्अ कोई दुष्टात्मा घुसमेली छ।
ईसु को सांचो परवार
31 जद्या उंकी माई अर भाई उण्डअ आया अर बारअ उबा होर ईसु न्अ बारे बलवाया। 32 ईसु क च्यारूमेर भीड़ बेठी छी। वे उन्अ खिया, “देख थारी माई अर भाई अर थारी बेणा थन्अ बाण्अ बलारया छ।”