मत्ती को लख्यो चोखो समचार
पौथी को परिचय
या पौथी कोई अस्यान की जीवनी कोन छ, पण बस्वास का आधार प एक चोखो समचार छ। चोखो समचार यो बस्वास छ क परबु ईसु ई मनख ज्यात को मुक्ति देबाळो छ। यांका बारा मं परमेसर पराणा जमाना मं खियो छो क म एक अस्या मनख न्अ खन्दाऊलो जिका सायरा सुं म म्हारी सबळी परतिज्ञा न्अ पूरी करूलो ज्यो वो उंका खुदका इजरायली मनखा सुं कर्यो छो। परबु ईसु जनम सुंई यहूदी छो। वो पराणा इजरायल देस मं पैदा होयो छो। उंकी पूरी जन्दगी यहूदी समाज मं बीती छी। फेरबी परमेसर को यो चोखो समचार यहूदी जात्या बेई कोन्अ पण सबळी मनख ज्यात बेई छ। इजरायली मनख परमेसर का अपणा मान्या जाव्अ छा क पराणा धरम सास्तरा की मानत्या परमेसर का अमर परेम न्अ दखाबा बेई वाकी लार परतिज्ञा (बेवस्था, सोगन) कर्यो छो। ज्यां मनखा सुं परेम की परतिज्ञा की सोगन पूरी होव्अ छ उन्अ मसी मतलब थरपेड़ो मनख खेव्अ छ। परबु ईसु का चेला या गुवाई दीया छा क ईसु ई वो मसी छो। मत्ती का चोखा समचार मं ईसु न्अ एक महान गरूजी की न्याई दखाया छ। गरू ईसु कन्अ परमेसर की बेवस्था की बाता बताबा को अधिकार छ। वो परमेसर का परेम सुं भरया राज की सक्ष्या देव्अ छ। उंकी सांवटी सक्ष्या न्अ वांका विषय की ज्यान पांच हस्सा मं भेळी कर्या छ।
(1) डुंगर का परबचन- जिम्अ मनखा का बच्यार, करम अर सरग का राज मं रेबाळा की नित का बारा मं छ, पाठ 5-7।
(2) बारा चेला न्अ वांका काम की सक्ष्या, पाठ 10।
(3) सरग का राज का कस्सा, पाठ 13।
(4) मसी का चेला बणबा को मतबल, पाठ 18।
(5) आबाळा सरग का राज का बारा मं अर ई जुग को अंत होबा का बारा मं बताबो, पाठ 24-25।
रूप-रेखा
परबु ईसु को जनम अर बंसावली। 1:1—2:23
यूहन्ना बतिस्मा देबाळा की धरम-सेवा। 3:1–12
ईसु को बतिस्मो अर परक्ष्या। 3:13—4:11
परबु ईसु को गलील मं मनखा की सेवा करबो। 4:12—18:35
गलील परदेस सुं यहूदा का यरूसलेम नगर मं जाबो। 19:1—20:34
यरूसलेम अर उंक्अ अगल-बगल का गांवा मं ईसु की जन्दगी का आखरी सात दन। 21:1—27:66
परबु ईसु को मरया मंसुं जिन्दो होबो अर चेला न्अ दर्सण। 28:1–20