मत्ती को लख्यो चोखो समचार
ईसु को वंस
1
1 अबराम की ओलाद, दाऊद की ओलाद ईसु मसी को खानदान अस्यान छ।2 अबराम सुं इसहाक होयो अर इसहाक सुं याकूब। फेर याकूब सुं यहूदा अर उंका भाई पैदा होया। 3 फिरिस अर जोरह यहूदा का छोरा छा। अर यांकी माई को नांऊ तामार छो। फिरिस, हिस्रोन को बाप छो। हिस्रोन अराम को बाप छो। 4 अराम, अम्मीनादाब को बाप छो। अम्मीनादाब, नहसोन को अर नहसोन, सलमोन को बाप छो। 5 सलमोन सुं बोअज जनम्यो बोअज की माई को नांऊ राहाब छो। बोअज अर रूत सुं ओबेद पैदा होयो, ओबेद ईसै को बाप छो।
6 अर ईसै सुं राजो दाऊद पैदा होयो। सुलैमान दाऊद को छोरो छो। ज्यो उं लुगाई सुं जनम्यो छो ज्यो पेली उरिय्याह की लुगाई छी। 7 सुलैमान रहबाम को बाप छो अर रहबाम अबिय्याह को बाप छो। अबिय्याह सुं आसा पैदा होयो। 8 अर आसा सुं यहोसाफात होयो। फेर यहोसाफात सुं योराम अर योराम सुं उज्जियाहa पैदा होयो। 9 उज्जियाह योताम को बाप छो अर योताम, आहाज को। फेर आहाज सुं हिजकिय्याह होया। 10 अर हिजकिय्याह सुं मनस्सेह होयो। मनस्सेह सुं आमोन अर आमोन सुं योसिय्याह होयो। 11 फेर इजरायल का लोगा न्अ बंदी बणार बेबीलोन ले जाती बगत योसिय्याहb सुं यकुन्याह अर उंका भाई पैदा होया। 12 बेबीलोन मं लेजाया पाछ्अ यकुन्याह सुं सालतियेल होयो। अर सालतियेल सुं जरूब्बाबिल पैदा होयो। 13 फेर जरूब्बाबिल सुं अबीहूद, अबीहूद सुं इल्याकीम अर इल्याकीम सुं अजोर पैदा होयो। 14 अजोर सदोक को बाप छो, सदोक सुं अखीम अर अखीम सुं इलीहूद पैदा होयो। 15 इलीहूद इलियाजार को बाप छो अर इलियाजार मत्तान को, मत्तान याकूब को बाप छो 16 अर याकूब सुं यूसुफ पैदा होयो ज्यो मरियम को घरहाळो छो। अर मरियम सुं ईसु जनम्यो ज्यो मसी खुवायो। 17 अस्यान अबराम सुं दाऊद ताणी चौदा पीढ्या होई। अर दाऊद सुं लेर बन्दी बणार बाबुल खन्दाबा ताणी चौदा पीढ्या, बन्दी बणार बाबुल खन्दाबा सुं लेर मसी का जनम ताणी चौदा पीढ्या ओर होई।
ईसु मसी को जनम
18 cईसु मसी को जनम अस्यान होयो; ज्दया उंकी माई मरियम की यूसुफ की लार सगाई होई तो बियाऊ होबासुं पेली तोल पड़यो क वा पवितर-आत्मा की सक्ति सुं पेटसुं छ। 19 पण उंको होबाळो घरको धणी यूसुफ एक भलो मनख छो। अर मरियम न्अ चोड़्अ करर मनखा मं बदनाम कोन्अ करबो छाव्अ छो। जिसुं वो छान्असीक सगाई छोड़बा की मनसा बणालियो। 20 पण ज्दया वो ईका बारा मं बच्यार कर'ईर्यो छो, तो सपना मं परबु को सरगदूत दर्साव देर खियो, “ओ! यूसुफ, दाऊद का छोरा, मरियम सुं बियाऊ करबा सुं मत ड़रप्अ क्युं क ज्यो बाळक उंका पेट मं छ वो पवितर-आत्मा की ओडीसुं छ। 21 dवा एक छोरो जण्अली। अर तु उंको नांऊ ईसु रखाणज्यो क्युं क वो खुदका मनखा न्अ वांका पापा सुं मुक्ति देव्अलो।” 22 यो जिसुं होयो छ क परबु, परमेसर की ओड़ी सुं बोलबाळा सुं ज्यो खुवायो छ, वो पूरो होव्अ, 23 “सुणो एक कुंवारी कन्या पेटसुं होव्अली अर छोरो जण्अली। अर उंको नांऊ इम्मानुएल रखाण्यो जावलो।” जिको मतलब छ, “परमेसर म्हाकी लार छ।”