लूका 3

यूहन्‍ना बतिस्मा देबाळो को खुवाव

(मत्ती 3:1–12; मरकुस 1:1–8; यूहन्‍ना 1:19–28)

1 सम्राट तिबिरियुस कैसर का राज का पन्द्रवा बरस मं जद्‍या यहूद्‍या को राजपाल पिन्तुस पिलातुस छो अर उं परदेस का चोथाई भाग का राज मं हेरोदेस गलील को, उंको भाई फिलिप्पुस इतूरैया अर त्रखोनीतिस को अर लिसानियास अबिलेने क तळ्अ को राजो छो। 2 अर यूहन्‍ना अर कैफा महायाजक छा जद्‍या जकर्याह का छोरा यूहन्‍ना कन्अ उजाड़ थळा मं परमेसर को बचन पुच्यो। 3 जिसुं यरदन नन्दी क सांकड्अ की सबळी ठोर मं फर-फरर वो पापा की छमा बेई मन बदलबा का बतिस्मा को परचार करबा लागग्यो। 4 परमेसर की ओड़ी सुं बोलबाळा यसायाह का बचना की पोथी म जस्यान मण्ढर्यो छ, “राड़ी म एक हाक्‍को पाड़बाळा की आवाज आरी छ क ‘परबु बेई गेलो त्यार करो। अर उंक्अ बेई गेला न्अ सीधोसट्ट करो। 5 हरेक घाट‍्या भरी जाव्अली अर सबळा डुंगर अर डुंगर्या सपासट्ट हो जाव्अली केरी-बाकड़ी अर उबड़ खाबड़ गेला सपासट्ट कर दिया जावला 6 अर सबळा मनख परमेसर का उद्धार का दर्सण करअला!’”

7 यूहन्‍ना उसुं बतिस्मो लेबा आई भीड़ न्अ खेव्अ छ, “अरअ सांप का बच्याओ! थान्अ कुण चता दियो क थे आबाळा रोष सुं बचर नखळो? 8 पचतावा का सई फळ पैदा करो जिसुं लाग्अ क थांको मन बदल्यो छ। अर आमा-सामा या मत खेवो क अबराम आपणो बाप छ। मं थान्अ खेऊ छु क परमेसर या भाटा सुं बी अबराम बेई ओलाद पदा करा सक्अ छ। 9 रूंखड़ा की जड़ा प करबाड़यो मलचुक्यो अर वां सबळा रूंखड़ा न्अ ज्यो चोखा फळ कोन्अ देव्अ काटर पटक्यो जावलो अर फेर वान्अ आग मं बाळ दियो जावलो।”

10 जद्‍या वा भीड़ उन्अ बुजी, “तो म्हान्अ कांई करणी चायजे?”

11 जुवाब म वो वान्अ खीयो, “जी कन्अ दो कुड़ता छ, वो उन्अ वांकी लार बाटले ज्यां कन्अ कोन्अ। अर जी कन्अ रोटी छ वो बी अस्यान'ई करअ।”

12 थोड़ासाक चुंगी लेबाळा बी बतिस्मो लेबा आया छा। वे उन्अ बुज्या, “गरूजी, म्हान्अ कांई करणी चायजे?”

13 जद्‍या वो वान्अ खीयो, “जतरो चायजे उसुं सावटो भेळो मत करो।”

14 थोड़ासाक सपाई उन्अ बुज्या, “अर मान्अ कांई करणी चायजे?” तो वो वान्अ बतायो, “जोरीसुं कोई सुं धन मतल्यो। कोई प बी झूंटो दोष मत लगावो। खुदकी मजुरी म सबर रखाणो।”

15 भीड़ जद्‍या घणी आस की लार बाठनाळरी छी अर खुदका मन मं बच्यार कर'री छी क कढ्अ योई तो मसी कोन्अ छ। 16 जद्‍या यूहन्‍ना या खेर वान्अ जुवाब दियो, “मं तो थान्अ पाणी सुं बतिस्मो देऊ छु पण वो आर्यो छ, ज्यो मंसुं साउटो सक्‍तिसाली छ। मं उंकी जुत्या की ताणा खोल्बा जस्यो बी कोन्अ। वो थान्अ पवितर-आत्मा अर आग सुं बतिस्मो देव्अलो। 17 उंका हाथ मं फटकबा बेई छाजळो छ, जिसुं वो नाज न्अ कजोड़ा सुं न्यारो करर खुदका खलाणा म मेल्अ छ। पण वो कजोड़ा न्अ असी आग म बाळ्अलो ज्यो कद्‍या बी कोन बझअली।” 18 अस्यान'ई ओर घणासारा बचना सुं वो वान्अ समझार चोखो समचार सुणाब्अ करअ छो।

यूहन्‍ना न्अ पकड़बो

19 फेर जद्‍या यूहन्‍ना चोथाई परदेस क तळ्अ का राजा हेरोदेस न्अ उंका भाई की लुगाई हिरोदिआस की लार उंका बरा बुवार की बजेसुं अर उंका दूसरा बरा कामा की बजेसुं लड़यो अर दकाल्यो। 20 जिसुं हेरोदेस यूहन्‍ना न्अ पकड़र ज्यो बरा काम वो कर्यो छो वाम्अ एक बरो काम ओर जोड़ लियो।

परबु ईसु को बतिस्मो

(मत्ती 3:13–17; मरकुस 1:9–11)

21 अस्यान होयो क जद्‍या सबळा मनख बतिस्मो लेरया छा तो ईसु बी बतिस्मो लियो। अर जद्‍या वो परातना करर्यो छो तो आम्बर खुलग्यो। 22 अर पवितर-आत्मा एक कबुतर की न्याई की काया म होर उंक्अ उपरअ उतर्यो। अर आकासवाणी होई, “तु म्हारो लाड़लो छोरो छ मं तसुं राजी छु।”

बंसावली

(मत्ती 1:1–17)

23 ईसु तीस बरस को छो जद्‍या सेवा का काम सरु कर्यो। ईसु मनखा की नजरा म एली का छोरा यूसुफ को छोरो छो। 24 एली ज्यो मत्तात को, मत्तात लेवी को, लेवी मलकी को, मलकी यन्‍ना को, यन्‍ना यूसुफ को, 25 यूसुफ मतित्याह को, मतित्याह आमोस को, आमोस नहूम को, नहूम असल्याह को, असल्याह नोगह को, 26 नोगह मात को, मात मत्तित्याह को, मत्तित्याह सिमी को, सिमी योसेख को, योसेख योदाह को, 27 योदाह योनान को, योनान रेसा को, रेसा जरुब्बाबिल को, जरुब्बाबिल सालतियेल को, सालतियेल नेरी को, 28 नेरी मलकी को, मलकी अद्‍दी को, अद्‍दी कोसाम को, कोसाम इलमोदाम को, इलमोदाम ऐर को, 29 ऐर यहोसुआ को, यहोसुआ इलाजार को, इलाजार योरीम को, योरीम मत्तात को, मत्तात लेवी को, 30 लेवी समौन को, समौन यहूदा को, यहूदा यूसुफ को, यूसुफ योनान को, योनान इलयाकीम को, 31 इलयाकीम मेलिया को, मेलिया मिन्‍ना को, मिन्‍ना मत्तात को, मत्तात नातान को, नातान दाऊद को, 32 दाऊद यिसे को, यिसे ओबेद को, ओबेद बोअज को, बोअज सलमोन को, सलमोन नहसोन को, 33 नहसोन अम्मीनादाब को, अम्मीनादाब आदमीन को, आदमीन अरनी को, अरनी हिस्रोन को, हिस्रोन फिरिस को, फिरिस यहूदा को, 34 यहूदा याकूब को, याकूब इसहाक को, इसहाक अबराम को, अबराम तिरह को, तिरह नाहोर को, 35 नाहोर सरुग को, सरुग रऊ को, रऊ फिलिग को, फिलिग एबिर को, एबिर सिलह को, 36 सिलह केनान को, केनान अरफक्षद को, अरफक्षद सेम को, सेम नूह को, नूह लेमेक को, 37 लेमेक मथूसिलह को, मथूसिलह हनोक को, हनोक यिरिद को, यिरिद महललेल को, महललेल केनान को, 38 केनान एनोस को, एनोस सेत को, सेत आदम को, अर आदम परमेसर को छोरो छो।