ईसु को जनम
2
1 वा दना मं औगुस्तुस कैसर की ओड़ी सुं एक हुकम नखळ्यो क सबळा रोमी जगत की जनता की गणती करी जाव्अ। 2 या मनखा की पेलपेल की गणती छी। या वा दना मं होई जद्या सीरिया को राजपाल क्विरिनियुस छो। 3 सबळा मनख नांऊ मण्ढाबा बेई खुदका नगरा मं गिया।4 यूसुफ बी गलील का नासरत नगर सुं यहूद्या म दाऊद का नगर बैतलहम मं गियो, क्युं क वो दाऊद का परवार अर उंका बंस को छो। 5 वो नांऊ मण्ढाबा बेई मरियम की लार उण्डअ गियो जिकी लार उंकी सगाई हो मेली छी ज्यो पेटसुं छी। 6 हालताणी वे उण्डअ'ई छा अर अस्यान होई क मरियम क जापा की बगत आगी। 7 अर वा खुदका पहला छोरा न्अ जणी। क्युं क उण्डअ धर्मसाळा म वान्अ कोई ठोर कोन मली जिसुं वा उन्अ लत्ता म लपेटर लळ्डया की ठाण म सुवाण दी।
गुवाळा न्अ सरगदूत को संदेसो
8 जद्या उण्डअ मैदान म लळ्डया का गुवाळ छा ज्यो रयात की बगत म खुदका रेवड की रुखाळी करर्या छा। 9 उं बगत परमेसर को एक सरगदूत वाक्अ साम्अ परकट्यो अर वाक्अ च्यारूमेर परबु का तेज को उजाळो होग्यो। वे घबराग्या। 10 जद्या सरगदूत वान्अ खियो, “डरपो मतो, मं थांक्अ बेई चोखो समचार ल्यायो छु, जिसुं सबळा मनखा न्अ घणो आण्द होवलो। 11 क्युं क आज दाऊद का नगर मं थांका उद्धार करबाळा परबु मसी को जनम होयो छ। 12 अर उंकी पेचाण या छ क थान्अ एक बाळक लत्ता म लपटर ठाण म सुतो मल्अलो।”
13 उं बगत उं सरगदूत की लार ओर दूसरा घणासारा सरगदूत प्रगट्या। वे या खेर परमेसर की स्तुति करर्या छा,
14 “सरग म परमेसर की जै हो
अर धरती प वा मनखा न्अ सांति मल्अ ज्यांसुं वो राजी छ।”
गुवाळा को मलबो
15 अर जद्या सरगदूत वान्अ छोडर चलग्या तो वे गुवाळ आमा-सामा खेबा लाग्या, “आवो आपा बैतलहम चाला अर ज्यो बात होई छ अर जी बेई परबु आपान्अ खियो छ उन्अ देखां।”
16 तो वे झटदाणी चलदिया अर उण्डअ जार वे मरियम अर यूसुफ न्अ देख्या अर देख्या क एक बाळक ठाण म सुतो छ। 17 गुवाळ जद्या उं बाळक न्अ देख्या तो उं बाळक का बारा मं ज्यो खुवाव वान्अ मल्यो छो, उन्अ वे सबळा न्अ बता दिया। 18 ज्योबी या सुण्यो वे सबळा गुवाळा की बाता प अचम्बो करबा लागग्या।
19 पण मरियम या बाता न्अ खुदका मन म बसाली अर वांका बारा म बच्यार करब्अ करी। 20 उण्डी वे गुवाळ ज्योबी वे सुण्या छा अर देख्या छा, उं सब बेई वे परमेसर की महमा अर स्तुति करता-करता खुदक्अ घरा चलग्या।
ईसु को खतनो
21 aअर आठवां दन जद्या बाळक क खतनो करबा की बगत आई तो उंको नांऊ ईसु रखाण्या। उन्अ यो नांऊ उंकी माई का पेट मं आबासुं बी पेली सरगदूत बता दिया छा।
मन्दर म ईसु न्अ चढ़ाबो
22 मूसा की बेवस्था क ज्यान उंका सुध्दिकरण को दन आयो जद्या मरियम अर यूसुफ बाळक न्अ यरूसलेम नगर मं लेग्या क उन्अ परबु न्अ सुंप दे। 23 जस्यान परबु की बेवस्था मं मण्ढर्यो छ क “सबळा पेल-पेलका छोरा परबु बेई पवितर मान्या जाव्अ” 24 अर परबु की बेवस्था खेव छ क “एक जोड़ी कमेड़ी अर कबुतर का दो छोटा बच्या बळी चढ़ाणी चायजे”, जिसुं वे बेवस्था की ज्यान बली चढाबा लेग्या।
समौन को गीत
25 यरूसलेम मं एक समौन नांऊ को धर्मी अर भगत मनख रेव्अ छो। वो इजरायल का सुख-चेन की बाठ नाळ्अ छो। पवितर-आत्मा उंकी लार छो। 26 पवितर-आत्मा उन्अ बतायो छो क जद्या ताणी वो परबु का मसी का दर्सण कोन करले, मरअलो कोन्अ। 27 वो आत्मा की सीख पार मन्दर म आयो अर जद्या बेवस्था की ज्यान काम करबा बेई बाळक ईसु न्अ उंका माई-बाप मन्दर म लेर आया। 28 तो समौन ईसु न्अ गोदी म लेर परमेसर की स्तुति करर अस्यान खियो,
29 “परबु अब तु थारा बचन की ज्यान म्अ थारा दास न्अ सांति की लार आजाद कर।
30 क्युं क मं म्हारी आंख्या सुं थारा ई उद्धार का दर्सण करलियो।
31 जिन्अ तु सबळा मनखा क साम्अ तियार कर्यो छ।
32 यो बाळक दूसरी ज्यात का बेई थारो गेलो दखाबा को उजाळो अर
थारा इजरायल का मनखा बेई या महमा छ।”
33 उंका माई-बाप ईसु बेई खेई बाता सुं बच्यार म पड़ग्या। 34 फेर समौन वान्अ आसीर्वाद दियो अर उंकी माई मरियम न्अ खियो, “यो बाळक इजरायल म घणा का नास अर उद्धार की बजे बणबा अर एक अस्यो नसाण बणबा बेई थरप्यो गियो छ जिको बिरोध कर्यो जावलो। 35 अर तलवार सुं अण्डअ ताणी क थारा पराण बी तार-तार हो जावला जिसुं अणगणती का हीया का भाव चोड्अ आजाव्अ।”
हन्नाह परमेसर की ओड़ी सुं बोलबाळी की गुवाई
36 अर उण्डअ हन्नाह नांऊ की परमेसर की ओड़ी सुं बोलबाळी एक बुढ़ी लुगाई छी। वा असेर कबिला का फनुएल की छोरी छी। बियाऊ पाछ्अ खाली सात बरस ताणी वा अपणा घरका धणी की लार रेई छी। 37 अर फेर चुरासी बरस ताणी अस्यान'ई बिधवा रेई। वा मन्दर न्अ कद्या बी कोन छोड़ी अर बरत अर परातना करर वा रयात दन परमेसर की भगती करती रेव्अ छी। 38 उं बगत वा बाळक अर उंका माई-बाप कन्अ आई। वा परमेसर न्अ धन्यवाद देई अर ज्यो मनख यरूसलेम का छूटवाड़ा की बाठ नाळर्या छा वा सबळा न्अ उं बाळक का बारा मं बताई।
नासरत नगर मं ईसु को बाळपणो
39 bपरबु की बेवस्था की ज्यान सबळी विध्या पूरी करर वे गलील म खुदका नगर नासरत मं पाछा आया। 40 उण्डी वो बाळक बड़ो अर तगड़ो होतो गियो। वो घणो बुद्धिमान छो अर परमेसर की दीया उंक्अ उपरअ छी।
बाळक ईसु मन्दर मं
41 फसह का तुंवार प सालकाई उंका माई-बाप यरूसलेम जाव्अ छा। 42 जद्या वो बारा बरस को होयो तो सदा की न्याई वे तुंवार मं गिया। 43 जद्या तुंवार खतम होयो अर वे पाछा घरा जारया छा तो ईसु उण्डअ यरूसलेम मेई रेग्यो अर माई-बाप न्अ ईको तोल कोन्अ पड़यो। 44 या बच्यार करर क वो दल म कोई कढी हेलो वे सारअ दन यात्रा करता रिया। फेर वे उन्अ खुदका सगा मं अर भायला मं हेरबा लाग्या। 45 जद्या वो वान्अ कोन्अ मल्यो तो फेर वे उन्अ हेरता-हेरता यरूसलेम पाछा आग्या। 46 अर फेर अस्यान होयो क तीन दन पाछ्अ वो परचार करबाळा का बीच मं बेठ्यो वाकी सुण्तो अर वान्अ सुवाल बुजतो मन्दर मं मल्यो। 47 वे सबळा ज्यो उन्अ सुण्या छा, उंकी समझ अर सुवाल-जुवाबा सुं अचम्बा म पड़ग्या छा। 48 जद्या उंका माई-बाप उन्अ देख्या तो दंग रेग्या। उंकी माई उन्अ बुजी, “बेटा तु म्हाकी लार अस्यान क्युं कर्यो छ? थारो बाप अर मं थन्अ हेरता-हेरता घणाजोर सुं घबराग्या छा।”
49 जद्या ईसु वान्अ खियो, “थे मन्अ क्युं हेररया छा? थे कोन्अ जाणो कांई क मन्अ म्हारा बाप का घर मेई होणो चायजे?” 50 पण ईसु वान्अ ज्यो जुवाब दियो छो उन्अ वे समझ कोन्अ सक्या।