ईसु को मरया मंसुं जीवतो हेबो
28
1 आरामहाळा दन क पाछ्अ सप्ताह का सरूवात क दन दितवार न्अ सुवारेई भागफाटया की मरियम मगदलीनी अर दूसरी बेरबानी मरियम कबर न्अ देखबा आई। 2 एकधम घणाजोर को भुकम्प आयो अर परबु को सरगदूत सरग सुं उतर्यो। वो कबर कन्अ आयो अर भाटा न्अ हटार उंक्अ उपरअ बेठग्यो। 3 उंको रुप आम्बर की बिजळी की ज्यान चलकर्यो छो अर उंका लत्ता बरफ की ज्यान धोळाफट छा। 4 वे सपाई ज्यो कबर की रुखाळी करर्या छा ड़र क मारअ धुजबा लागग्या अर बेसुध होग्या। 5 ज्दया सरगदूत वा लुगाया न्अ खिया, “डरपो मतो!, म जाणु छु क थे ईसु न्अ हेररी छो, जिन्अ करूस प चढ़ाया छा। 6 वो अण्डअ कोन्अ। वो खियो छो, जस्यान मरया पाछ्अ फेरू जीन्दो होग्यो। आवो उं ठोर न्अ देखो, जण्ढ्अ वो सुतो छो। 7 अर अब झटदाणी जावो अर उंका चेला न्अ खेवो, ‘वो मरया मं सुं जीवतो होग्यो अर अब वो थांक्अ पेली गलील ओड़ी जार्यो छ, थे उन्अ उण्डअ'ई देख्अला!’ ज्यो म थान्अ खियो छु उन्अ याद रखाणो।”8 वे लुगाया झटदाणी कबर न्अ छोड़र चलगी। वे ड़र अर खुसी सुं भरगी छी। फेर ईसु का चेला न्अ या बताबा बेई वे भागी गई।
बेरबान्या न्अ दर्सण
9 ईसु एकधम वा लुगाया न्अ गेला मं मल्यो अर खियो, “राजी रेवो!” वे ईसु कन्अ गेई अर उंका पगा न्अ पकड़र उंकी जैजैकार करी। 10 ज्दया ईसु वान्अ खियो, “डरपो मतो! अर म्हारा भाया न्अ जार यो संदेस द्यो क वे गलील परदेस मं जाव्अ। उण्डअ वे म्हारा दर्सण करअला।”
रुखाळा न्अ रिस्वत
11 हालताणी वे बेरबान्या गेला मं ई छी क एकात सपाई ज्यो रुखाळी मं छा, नगर मं गिया अर ज्योबी उण्डअ होयो छो, वो सब महायाजका न्अ जार सुणाया। 12 तो वे बुढ़ा यहूदी नेता सुं मलर राय-मसोरा सुं वा सपाया न्अ घणुसारो धन देर 13 खिया क वे लोगा न्अ खेव्अ क ज्दया मे सुता छा ईसु का चेला रयात मं आर उंकी ल्यास न्अ चोर'र लेग्या। 14 अर ज्यो थांकी या बात राजपाल ताणी पूंची तो उन्अ मे समझा देव्अला। अर थांक्अ उपरअ कांई बी बल्या कोन्अ आबा देवा। 15 रुखाळा धन लेर वस्यान ई कर्या जस्यान वान्अ खिया छा। अर या बात यहूदया मं आजताणी बी अस्यान की अस्यान फेलरी छ।
ईसु की सबसु बड़ी आज्ञा
16 aफेर ग्यारा चेला गलील मं उं डुंगर प गिया जण्ढ्अ जाबा बेई ईसु वान्अ खियो छो। 17 ज्दया वे ईसु न्अ देख्या तो उंकी उपासना कर्या। हालताणी एकात का मन मं बेम छो। 18 फेर ईसु वाक्अ सांकड्अ जार खियो, “सरग मं अर धरती प सबळा अधिकार मन्अ सुंप्या गिया छ। 19 bजिसुं, सात्यु-जात का मनखा न्अ म्हारा चेला बणावो। थे ई बतिस्मा का काम न्अ पिता का नांऊ मं, छोरा का नांऊ मं अर पवितर-आत्मा का नांऊ मं बतिस्मो देर पूरो करो। 20 वे सबळा आदेस ज्यो म थान्अ दियो छु वान्अ वाप्अ चालबो सकावो अर याद रखाणो ई जगत का आखरी ताणी सदाई म थांकी लार रेऊलो।”