ईसु को मरया पाछ्अ जिन्दो हेबो
16
1 आरामहाळा दन बित्या सुं मरियम मगदलीनी, सलोमी अर याकूब की माई मरियम ईसु की ल्यास क लगाबा बेई खसबूहाळा सामान मोल ली। 2 दितवार क दन सुवारे दन उगता'ई वे कबर प गी। 3 वे बतळाती जारी छी क, “आपण्अ बेई कबर को भाटो कुण हटावलो?” 4 फेर जद्या वे नजरा उठा'र नाळी तो देखी क वो भाटो उण्डअ सुं हट मेल्यो छो। वो भाटो घणु बड़ो छो। 5 फेर जद्या वे कबर क माईन्अ गी तो वे देखी क एक मनख धोळाफट लत्ता पेर उंकी जीवणी-बगल म बेठ्यो छ। अर वे ड़रप गी। 6 फेर वो मनख वान्अ खियो, “डरपो मतो, थें जी ईसु न्अ ज्यो नासरत नगर को रेबाळो छ हेररी छो, जिन्अ करूस प लटकाया छा, वो जिन्दो हेग्यो! वो अण्डअ कोन्अ। ई ठोर न्अ देखो जण्ढ्अ उन्अ मेल्या छा। 7 aअब थें जावो अर उंका चेला न्अ अर पतरस न्अ खिज्यो क वो थासुं पेलीई गलील म जार्यो छ। जस्यान वो थान्अ खियो छो, वो थान्अ उण्डअ'ई मल्अलो।” 8 जद्या ड़र अर अचम्बा म हेर वे कबर म सुं बारे नखळर भागगी। वे कोई न्अ कांई बी कोन बताई क्युं क वे घणाजोर सुं घबरागी छी।bमरियम मगदलीनी न्अ ईसु का दर्सण
9 दितवार क दन सुवारेई जिन्दो हेबा क पाछ्अ वो सबसु पेली मरियम मगदलीनी क साम्अ प्रगटयो, जिम्अ सुं वो सात दुष्टात्मा न्अ नखाळ्यो छो। 10 वा ईसु की लाराळा न्अ, ज्यो कळेस म पड़र, रोवणा पिटणा करर्या छा, जार बताई। 11 जद्या वे सुण्या क ईसु जिन्दो छ अर वा उन्अ देखी छ, तो वे बस्वास कोन कर्या।
ईसु चेला क साम्अ प्रगटयो
12 ईक्अ पाछ्अ वा चेला म सुं दो क साम्अ, ईसु दूसरा भेष म प्रगटयो, जद्या वे यरूसलेम सुं खुदक्अ गांव जारया छा। 13 वे पाछा आर दूसरा न्अ बी ईका बारा म बताया, पण वे वांको बी बस्वास कोन कर्या।
14 फेर जद्या उंका ग्यारा चेला रोटी खार्या छा, तो वो वाक्अ साम्अ प्रगटयो अर वान्अ वाका मनां की कळ्डाई अर बेबस्वास बेई लड़यो क्युं क जिन्दो हेबा क पाछ्अ वे वाका समचार को बस्वास कोन कर्या, ज्यो ईसु न्अ जिन्दो हेबा क पाछ्अ देख्या छा। 15 cफेर वो वान्अ खियो, “जावो अर सबळी दुनिया का सबळा मनखा न्अ चोखो समचार द्यो।” 16 ज्योबी चोखा समचार म बस्वास करअ अर बतिस्मो लेव्अ, उंको उद्धार होवलो अर ज्यो बस्वास कोन करअ, वे परमेसर क साम्अ दोषी मान्या जावला। 17 “ज्यो म्हारअ उपरअ बस्वास करअ ला, वांन्अ ये अचम्बा का काम करबा की सकत्यां मल्अली; वे म्हारा नांऊ सुं दुष्टात्मा न्अ नखाळ्अला, वे नुई नुई बोल्या बोल्अला, 18 अर ज्यो वे खुदका हाथा सुं सांप-ढिण्ढवा न्अ पकड़ ले अर जैर बी पी जाव्अ तो वाक्अ कांई बी कोन हेवलो। वे बिमारा क माथ्अ हाथ मेलेला अर वे नीका हे जावला।”
ईसु न्अ बादळा मं उठाबो