लूका 24

पाछो जीवतो हेबो

(मत्ती 28:1–10; मरकुस 16:1–8; यूहन्‍ना 20:1–10)

1 सप्ताह का सरूवात क दन सुवारेई भागफाटया की वे बेरबान्या बी खुसबु हाळा सामान न्अ जिन्अ वे तियार करी छी कबर प लेर आई। 2 बान्अ कबर सुं भाटो हटयो मल्यो। 3 वे माईन्अ चलगी पण बान्अ परबु ईसु की ल्यास कोन्अ मली। 4 जद्‍या वे ई बात मं उळजरी छी क बाक्अ सांकड्अ चलक-भलक करता लत्ता फेरया दो मनख आर उबा हेग्या। 5 ड़र क मारअ वे जमी ओड़ी खुदका मुण्ढा लटका मली छी। वे दो मनख बान्अ खिया, “ज्यो जीवतो छ बीन्अ थे मुर्दा मं क्युं हेररी छो? 6 वो अण्डअ कोन्अ। वो जीवतो हेग्यो। याद करो जद्‍या वो गलील मंई छो, वो थान्अ कांई खियो छो?” 7 वो खियो छो क, मनख का छोरा न्अ पाप्या क हाथा मं सुप्यो जाबो जरूरी छ। फेर वो करूस प लटकायो जावलो अर तीसरअ दन नस्तेई बीन्अ फेर जीवतो करणी छ। 8 जद्‍या बा बेरबान्या न्अ उंकी बाता याद आगी। 9 वे कबर सुं पाछी आगी अर वे ये सबळी बाता बा ग्यारा अर ओर सबळा न्अ बताई। 10 वे बेरबान्या छी मरियम मगदलीनी, योअन्‍ना अर याकूब की माई, मरियम। वे अर बाकी लार की दूसरी बेरबान्या ये बाता थरपेड़ा न्अ बतारी छी। 11 पण बाकी बाता थरपेड़ा न्अ एक कस्सा की न्याय लागी अर वे बाको बस्वास कोन कर्या। 12 पण पतरस उबो होयो अर कबर ओड़ी भाग्योई आयो। वो तण्अ लळर देख्यो पण बीन्अ सण का चोखा तागा सुं बण्या कफन क अलावा कांई कोन्अ दिख्यो। फेर खुदका मन ई मन मं अचम्बो करतो-करतो वो पाछो चलग्यो।

इम्माऊस का गेला मं चेला न्अ दर्सण

(मरकुस 16:12, 13)

13 बी दन बीका चेला मंसुं दो, यरूसलेम सुं कोई सात मील आंतरअ बस्या इम्माऊस नांऊ का गांव मं जारया छा। 14 ज्यो बाता हेई छी बाप्अ वे आमा-सामा बतळार्या छा। 15 जद्‍या वे या बाता प बतळ्यावण अर बच्यार करर्या छा जद्‍या खुद ईसु उण्डअ आग्यो अर बाकी लार-लार चालबा लागग्यो। 16 पण बान्अ बीन्अ पचाणबा कोन्अ दियो, 17 ईसु बान्अ खियो, “चालता-चालता थे आमा-सामा ये कुणकी बाता की बतळ्यावण करर्या छो?” वे रुकग्या। वे घणा दुखी दिखर्या छा। 18 बाम्अ सुं किलयुपास नांऊ को एक मनख बीन्अ खियो, “यरूसलेम मं रेबाळो तूई ऐकलो अस्यो मनख हलो ज्यो पाछला दना मं होइ बाता का बारा मं कोन्अ जाण्अ।” 19 ईसु बान्अ बुज्यो, “कसी बाता?” वे बीन्अ खिया, “सब नासरी ईसु का बारा मं छ वो एक अस्यो मनख छो ज्यो खियो अर कर्यो बीसुं परमेसर अर सबळा मनखा क साम्अ या दखा दियो क वो एक महान परमेसर की ओड़ी सुं बोलबाळा छो। 20 अर मे ई बारा मं बाता करर्या छा क आपणा परमुख याजक अर राजो कस्यान बीन्अ मोत की सज्या बेई सुंप दिया अर वे बीन्अ करूस प लटका दिया। 21 मे आस रखाण्अ छा क यो बोई छ ज्यो इजरायल न्अ आजाद करवातो अर या सब क बारे या बाता न्अ हिया तीसरो दन छ। 22 अर म्हाकी टोळी की एकात बेरबान्या म्हान्अ अचम्बा म पटक दी। आज सुवारे भागफाटया की वे कबर प गई। 23 पण बान्अ उण्डअ ल्यास कोन्अ लादी। वे पाछी आई अर म्हान्अ बताई क सरगदूता का दर्सण पाई छ ज्यो खिया छ क वो जिन्दो छ। 24 फेर म्हाम्अ सुं एकात कबर प गिया अर जस्यान बेरबान्या बताई छी उण्डअ वस्यान ई पाया। वे बीन्अ कोन्अ देख्या।” 25 जद्‍या ईसु बान्अ खियो, “थे कतरा मुरख छो अर परमेसर की ओड़ी सुं बोलबाळा ज्योबी खिया, बीप्अ बस्वास करबा मं कतरा ढिला छो। 26 कांई मसी बेई यो जरूरी कोन्अ छो क वो या दुखा न्अ भोग्अ अर अस्यान खुदकी महमा मं घुस्अ?” 27 अर अस्यान मूसा सुं सरू कर सबळा परमेसर की ओड़ी सुं बोलबाळा सुं सरू करर सबळा सास्तरा मं बीका बारा मं ज्यो खिया छा, वो बान्अ चोखा खोलर समझायो। 28 वे जद्‍या बी गांव कन्अ आया, जण्ढ्अ जारया छा, ईसु अस्यान बुवार कर्यो, जाण्अ बीन्अ आग्अ जाणी छ। 29 पण वे बीन्अ जोरी कर खिया, “म्हाकी लार रूक जा क्युं क स्याम हेगी अर अब दन आथग्यो।” तो वो बाकी लार रुकबा माईन्अ आग्यो। 30 जद्‍या बाकी लार वो खाबा का पाटा प छो जद्‍या वो रोटी उठायो अर धन्यवाद कर्यो। फेर बीन्अ तोड़र बान्अ देर्यो छो 31 जद्‍या बाकी आंख्या खुलगी अर वे बीन्अ पेचाण लिया। पण वो बाक्अ साम्अ सुं अन्तरध्यान हेग्यो। 32 फेर वे आमा-सामा खिया, “गेला मं जद्‍या वो आपसुं बाता करर्यो छो अर आपान्अ सास्तर समझार्यो छो तो कांई आपणा मना मं आग सीक कोन्अ भभकी छी?” 33 फेर बेगासाक उबा हिया अर पाछा यरूसलेम ओड़ी चलग्या। उण्डअ बान्अ ग्यारा थरपेड़ा अर दूसरा मनख एकलार भेळा मल्या, 34 ज्यो खेर्या छा, “ह परबु सांच्याई जीवतो हेग्यो। वो समौन न्अ दर्सण दियो छो।” 35 फेर वे दोनी गेला म ज्योबी होयो छो बीको ब्योरो दिया अर बताया क “जद्‍या वो रोटी का टुकड़ा लियो छो तो वे ईसु न्अ कस्यान पेचाण्या छा।”

ईसु को घणा चेला न्अ दर्सण देबो

(मत्ती 28:16–20; मरकुस 16:14–18; यूहन्‍ना 20:19–23; थरपेड़ा का काम 1:6–8)

36 हालताणी वे बान्अ ये बाता बताईर्या छा क वो खुद वाक्अ गाब्अ आर उबो हेग्यो अर बान्अ खियो, “थान्अ सान्ति मल्अ।” 37 पण वे चमकर घबराग्या। वे बच्यार कर्या जाण्अ वे कोई भूत देखर्या छ। 38 पण वो बासुं बोल्यो, “थे अस्यान क्युं घबरार्या छो? थांका मना मं बहम क्युं उठर्या छ? 39 म्हारा हाथा अर म्हारा पगा न्अ देखो। म्हारअ हाथ लगावो, अर देखो क कोई भूत क हाड़-मांस कोन्अ हेव्अ अर जस्या थे देखर्या छो क वे म्हारअ छ।” 40 या खेर वो हाथ अर पग बान्अ दखायो। 41 पण खुदकी खुसी म्हारअ वे हालताणी बी बस्वास कोन करर्या छा। वे कळाचूक छा तो ईसु बान्अ खियो, “अण्डअ थां कन्अ खाबा बेई कोई-कांई छ क?” 42 वे रांदेड़ी एक मच्छी को टुकडो बीन्अ दिया। 43 अर वो बीन्अ लेर बाक्अ साम्अ ई खायो।

आखरी निर्देस

44 फेर वो बान्अ खियो, “ये बाता वे छ ज्यो मं थान्अ जद्‍या खियो छो जद्‍या मं थांकी लार छो क जतरी बी बाता मूसा की बेवस्था अर परमेसर की ओड़ी सुं बोलबाळा अर भजना की कताब मं म्हारा बारा मं मण्ढरी छ सबळी पूरी हेव्अ। 45 फेर पवितर सास्तरा न्अ समझबा बेई वो बाकी बुद्धि का गेला न्अ खोल दियो।” 46 अर वो बान्अ खियो, “या बाई छ ज्यो मण्ढर्यो छ क मसी दुख भोग्अलो अर तीसरअ दन मरया मंसुं जीवतो ह जावलो। 47 अर बीका नांऊ सुं पापा सुं छमा बेई मन फराबा को यो संदेसो यरूसलेम सुं सरू हर सबळा देसा मं फेलायो जावलो। 48 थे या बाता गुवा छो। 49 अर अब म्हारो परम बाप मंसुं ज्यो प्रतिज्ञा कर्यो छ, बीन्अ म थांक्अ बेई खन्दाऊलो। पण थान्अ ई नगर मं बी बगत ताणी रुकणी छ, जद्‍या ताणी थे सरग की सक्‍ती कोन्अ भरजावो।”

सरग मं चढ़बो

(मरकुस 16:19, 20; थरपेड़ा का काम 1:9–11)

50 ईसु फेर बान्अ बैतनिय्याह ताणी बाण्अ लेग्यो। अर वो हाथ ऊंचा कर बान्अ आसीर्वाद दियो। 51 बान्अ आसीर्वाद देता-देता ई वो बान्अ छोड़ दियो अर फेर बीन्अ सरग मं उठालिया। 52 जद्‍या वे उंकी आराधना कर्या अर घणा आण्द की लार वे यरूसलेम पाछा आग्या। 53 अर मन्दर मं परमेसर की महमा करता-करता वे बगत काटबा लागग्या।