ईसु की पिलातुस क साम्अ पेसी
27
1 ज्दया उजाळो होयो तो सबळा परमुख महायाजक अर यहूदी बुढ़ा नेता आमा-सामा बतळाया क ईसु न्अ मराद्या। 2 वे ईसु न्अ बांध्या अर राजपाल पिलातुस कन्अ लेग्या अर उन्अ उंका हाथां मं सुंप दिया।यहूदा को मरबो
3 aईसु न्अ पकड़ाबाळो यहूदो ज्दया देख्यो क ईसु न्अ अपराधी बणा दियो, तो वो घणु पस्तायो अर परमुख याजका अर बुढ़ा यहूदी नेता न्अ चांदी का वे तीस कल्दार पाछा देदियो। 4 वो खियो, “म एक नरपराध मनख न्अ मारबा बेई पकड़वार पाप कर्यो छु।” ज्दया वे खिया, “मान्अ इसुं कांई काम छ! तु जाण्अ।” 5 ज्दया यहूदो वां चांदी का कल्दारा न्अ मन्दर क मेईन्अ फाकर चलग्यो अर बारअ जार खुदक्अ फांसी लगा लियो। 6 परमुख याजक वा कल्दारा न्अ उठा'र खिया, “आपणा नियम मं ई धन न्अ मन्दर की दान-पेटी मं मेलबो चोखो कोन्अ, क्युं क ये लोई का दाम छ।” 7 ई बजेसुं वे बतळार वां कल्दारा सुं परदेस्या न्अ गाड़बा बेई कुम्हार को खेत मोल ले लिया। 8 जिसुं वो खेत आज दन ताणी बी “लोई को खेत” का नांऊ सुं जाण्यो जाव्अ छ। 9 अस्यान परमेसर की ओड़ी सुं बोलबाळा यिर्मयाह का खिया बचन पुरा होया - “वे चांदी का तीस कल्दार लिया, इजरायल का मनख ई रकम न्अ उंक्अ बेई देबा की थ्अपाई कर्या छा। 10 अर जस्यान परबु मन्अ आदेस दियो छो वस्यान ई वे वां कल्दारा सुं कुम्हार को खेत मोल लिया।”
पिलातुस ईसु न्अ सुवाल बुज्यो
11 अब ईसु राजपाल क साम्अ पेस होयो। राजपाल उन्अ बुज्यो, “कांई तु यहूदया को राजो छ?” ईसु जुवाब दियो, “थे खुद खेर्या छो।” 12 दूसरी बगल महायाजक अर बुढ़ा यहूदी नेता ज्दया उंक्अ दोष लगारया छा तोबी वो कोई जुवाब कोन्अ दियो। 13 ज्दया पिलातुस उन्अ बुज्यो, “तु कोन्अ सुणर्यो कांई क वे थारअ उपरअ कतरा दोष लगारया छ?” 14 पण ईसु पिलातुस न्अ कोई जुवाब कोन्अ दियो। पिलातुस न्अ ई बात को घणो अचम्बो होयो।
ईसु न्अ मारबा की आज्ञा
15 फसह का तुंवार का मोका प राजपाल को रुवाज छो क वो कोई एक केदी न्अ जिन्अ वा भीड़ छाव्अ छी वाक्अ बेई छोड़ देव्अ छो। 16 उं बगत बरअब्बाb नांऊ को एक बदनाम केदी बी उण्डअ छो। 17 तो ज्दया भीड़ भेळी होगी तो पिलातुस वान्अ बुज्यो, “थे कांई छावो छो क म थांक्अ बेई कुण न्अ छोड़ु बरअब्बा न्अ या फेर उं ईसु न्अ ज्यो मसी खुवाव्अ छ?” 18 पिलातुस जाण्अ छो क वे उन्अ बळ्या मरता पकड़ाया छा। 19 पिलातुस ज्दया न्याय का सिंहासन प बेठ्यो तो उंकी घरहाळी उकन्अ यो संदेसो खन्दाई क, “उं धरमी का मामला मं हाथ मत घालज्यो क्युं क उंकी बजेसुं मन्अ आज सपना मं घणो दुख होयो।”
20 पण परमुख याजक अर बुढ़ा यहूदी नेता उं भीड़ न्अ उकसाया क, वे पिलातुस सुं बरअब्बा न्अ छोड़बा बेई अर ईसु न्अ मारबा की सज्या मांग्अ। 21 जुवाब मं राजपाल वान्अ बुज्यो, “थे कांई छावो छो? दोन्या मंसुं कुण न्अ थां बेई छोड़ु?”
वे जुवाब दिया, “बरअब्बा न्अ!”
22 ज्दया पिलातुस वान्अ बुज्यो, “ज्यो मसी खुवाव्अ छ, म उं ईसु की लार कांई करू?” वे सबळा बळाया, “उन्अ सुळी प चढ़ाद्यो!”
23 पिलातुस बुज्यो, “क्युं वो कांई गुनो कर्यो छ?” पण वे ओर जोरसुं बळाया, “उन्अ सुळी प चढ़ाद्यो।”
24 पिलातुस देख्यो क अब कांई फायदो कोन्अ। पण लड़ाई होबाळी छ। तो वो पाणी मंगार उं भीड़ क साम्अ खुदका हाथ धोर खियो, “ई मनख का लोई सुं म्हारो कोई सरोकार कोन्अ। थे लोग ई जाणो।”
25 जुवाब मं सबळा खिया, “ईका लोई की जुवाबदारी म्हाकी अर म्हाका छोरा-छोरी माना छा।”
26 ज्दया पिलातुस वांक्अ बेई बरअब्बा न्अ छोड़ दियो अर ईसु क कोड़ा लगवार सुळी प चढ़ा बेई वान्अ सुंप दियो।
कांटा को टोपो
27 फेर राजपाल का सपाई उन्अ राजपाल का महल क मेईन्अ लेग्या। उण्डअ उंक्अ च्यारूमेर सपाया की पूरी पळटण भेळी होगी। 28 वे उंका लत्ता खोल दिया अर चटक लाल रंग को चोगो पेरार 29 कांटा सुं बण्यो टोपो उंका माथा प मेल दिया। उंका जीवणा हाथ मं एक कामड़ीc पकड़ा दिया अर उंक्अ साम्अ खुदका गोढ़ा टेकर उंकी हांसी करर अस्यान खिया, “यहूदया को राजो अमर रे।” 30 फेर वे उंका मुण्ढा प थुंक्या, लकड़ी कुस्का लिया अर उंका माथा प टोसा देबा लागग्या। 31 उंकी हांसी कर्या पाछ्अ वे उंका चोगा न्अ खोल लिया अर उन्अ उंका खुदका लत्ता पेरार सुळी प चढाबा बेई लेर चालया।
ईसु न्अ सुळी प चढाबो
32 ज्दया वे नगर क बारअ जाईरया छा तो वान्अ कुरेन को रेबाळो सिमौन नांऊ को एक मनख मल्यो। वे उन्अ बेगार मं पकड़या क वो ईसु को करूस उठा'र ले चाल्अ। 33 फेर ज्दया वे गुलगुता “जिको मतलब छ खोपड़या की ठोर” नांऊ की ठोर प पुच्या तो 34 वे ईसु न्अ पित मलेड़ी दारू पीबा बेई दिया। पण ज्दया ईसु उन्अ चाख्यो तो पीबा बेई नटग्यो।
35 तो वे उन्अ करूस प चढ़ा दिया अर उंका लत्ता न्अ गोळया गुड़ार आमा-सामा बांट लिया। 36 उंक्अ पाछ्अ वे उण्डअ बेठर उंकी चोकीदारी करबा लागग्या। 37 वे ईसु का माथा क उपरअ उंको दोष-पत्र लखर लटका दिया। वो अस्यान छो, “यो यहूदया को राजो ईसु छ।” 38 ईसु की लार वे दो डाकुवां न्अ करूस प चढ़ाया एक न्अ जीवणी अर दूसरा न्अ बांवळी बगल मं।
अपमान अर हांसी
39 सांकड्अ होर जाबाळा मनख खुदका माथा न्अ मटका-मटकार उंको अपमान करर्या छा। 40 dवे खेर्या छा, “अरअ मन्दर न्अ ढ़सार तीन दन मं पाछो बणाबाळा खुदन्अ तो बचा। अर ज्यो तु परमेसर को छोरो छ तो करूस क तळ्अ उतर्या।”
41 अस्यान'ई परमुख याजक धरम सखाबाळा अर बुढ़ा यहूदी नेता बी अस्यान खेर उंकी हांसी करर्या छा; 42 “दूसरा को उद्धार करबाळो खुदकोई उद्धार कोन्अ कर सक्अ! यो इजरायल को राजो छ। यो करूस प सुं अबार तळ्अ उतरअ तो मे ईन्अ मानल्या। 43 यो परमेसर मं बस्वास करअ छ। तो परमेसर छाव्अ तो अबार ईन्अ बचाले। क्युं क यो खेव छो, ‘म परमेसर को छोरो छु।’”
44 वे डाकु बी ज्यो उंकी लार करूस प चढ़ाया गिया छा वे बी अस्यान'ई उंकी हांसी कर्या।
ईसु की मोत
45 फेर सबळा देस मं दोपेर का बारा बज्या सुं तीन बज्या ताणी अंधेरो होग्यो। 46 दन का तीन बज्या की ईसु जोरसुं हाक्को पाड़र खियो, “इलोई, इलोई, लमा सबकतनी।” मतबल, “म्हारा परमेसर, म्हारा परमेसर, तु मन्अ क्युं छोड़ दियो?”
47 ज्यो ईसु क सांकड्अ उबा छा, वाम्अ सुं चन्याक मनख ज्दया या सुण्या तो वे खिया, “सुणो! यो एलिय्याह न्अ बलार्यो छ।” 48 ज्दया एक आदमी भाग्योई जार खाटी दारू मं भिज्यो रुई को फुवो एक लकड़ी म टांकर ल्यायो अर उन्अ ईसु न्अ पीबा बेई दियो।
49 अर खियो, “रुको, देखां छा क ईन्अ तळ्अ उतारबा बेई एलिय्याह आव्अ छ क कोन आव्अ।”
50 फेर ईसु जोरसुं बळायो अर मरग्यो।
51 ज्दया मन्दर को पड़दो उपरअ सुं तळ्अ ताणी फाठर दो लिरा होग्यो। धरती हालगी, डुंगर फाटग्या। 52 अण्डअ ताणी क कबरा खुलगी अर परमेसर का घणा मनख ज्यो मरग्या छा जीवता होग्या। 53 वे कबरा मं सुं नखळ्याया अर ईसु क जीवतो हेबा क पाछ्अ पवितर नगर मं जार घणा न्अ दिख्या।
54 रोम की सेना का नेता अर ईसु की रुखाळी करबाळा मनख धरती का हालबा न्अ अर वस्यान की दूसरी घटना न्अ देखर ड़रपग्या। वे खिया, “वो सांच्याई परमेसर को छोरो छो।”
55 eउण्डअ घणीसारी बेरबान्या उबी छी। ज्यो आंतरअ सुं देखरी छी। वे ईसु की सेवा करबा बेई गलील सुं उंक्अ पाछ्अ आई छी। 56 वाम्अ मरियम मगदलीनी, याकूब अर योसेस की माई मरियम अर जब्दी का छोरा की माई छी।
ईसु न्अ गाड़बो
57 स्याम की बगत अरिमतियाह नगर सुं यूसुफ नांऊ को एक भागवान मनख आयो। वो खुद बी ईसु को चेलो बणग्यो छो। 58 वो पिलातुस कन्अ जार ईसु की ल्यास मांग्यो अर पिलातुस आदेस देदियो क ल्यास उन्अ सुंप दी जाव्अ। 59 यूसुफ ल्यास ले लियो अर उन्अ एक नया मलमल का कफन मं लपेटर 60 अपणी खुदकी नुई कबर म मेल दियो जिन्अ वो पटापड़ा न्अ कटवार बणवायो छो। फेर वो कबर का बाण्णा प एक बड़ोसोक भाटो गुड़कार चलग्यो। 61 मरियम मगदलीनी अर दूसरी लुगाई मरियम उण्डअ कबर क साम्अ बेठी छी।
कबर की रुखाळी
62 दूसरअ दन मतलब सकरवार क पाछ्अ आराम का दन मं परमुख याजक अर फरीसी पिलातुस सुं मल्या। 63 fवे खिया, “माराज मान्अ याद छ क वो छळी ज्दया जीवतो छो, खियो छो क तीसरअ दन मं पाछो जीवतो हो जाऊलो। 64 तो आज्ञा द्यो क तीसरअ दन ताणी कबर की रुखाळी करी जाव्अ। जिसुं अस्यान कोन्अ होव्अ क उंका चेला आर उंकी ल्यास न्अ चोर'र ले जाव्अ अर मनखा मं खेव्अ क वो मरया मं सुं जीवतो होग्यो। यो दूसरो छळ पेली का छळ सुं बी सावटो बरो होव्अलो।”
65 पिलातुस वान्अ खियो, “थे रुखाळी बेई सपाई लेजा सको छो। जावो जस्यान रुखाळी कर सको छो करो।”
66 फेर वे चलग्या अर उं भाटा प छाप लगार रुखाळा न्अ उण्डअ बठाणर कबर न्अ सुरक्षित कर दिया।