यूहन्‍ना 19

1 जद्‍या पिलातुस ईसु न्अ पकड़वार कोड़ा मरवायो। 2 अर सपायी कांटा को टोपो गूंथर बीका माथा माळ्अ मेल दिया, अर बीन्अ राजा फरअ छा जस्यानका बेंगणी लत्ता पेरा दिया। 3 अर बी कन्अ आर खेबा लाग्या, “यहूद्‍या का राजा की जै हो!” अर बीक्अ लप्पड़ देबा लागग्या।

4 फेर पिलातुस दुबारा सुं नखळर लोगबागा न्अ बोल्यो, “देखो, म बीन्अ दुबारा सुं थां कन्अ ल्यार्यो छु, क थे जाणल्यो क मन्अ बीम्अ कांई बी दोष कोन्अ लाद्‍यो।” 5 फेर ईसु कांटा को टोपो अर राजा फरअ छा जस्यानका बेंगणी लत्ता पेरया बारअ आयो। अर पिलातुस बान्अ खियो, “देखो, यो रियो वो मनख।”

6 जद परमुख याजक अर मन्दर का रुखाळा बीन्अ देख्या तो जोरसुं बळाया, “बीन्अ करूस माळ्अ चढ़ा, करूस माळ्अ।”

पिलातुस बान्अ खियो, “थेई बीन्अ करूस माळ्अ चढ़ाओ, क्युं क मन्अ बीम्अ कोई दोष कोन्अ लाद्‍यो।”

7 यहूदी बीन्अ बोल्या, “म्हाकी एक बेवस्था छ ज्यो बताव्अ छ क यो मारबा क लायक छ क्युं यो अपणा-आपन्अ परमेसर को छोरो बतायो छो।”

8 जद पिलातुस या सुण्यो तो वो घणो डरपग्यो। 9 वो पाछो गढ़ मं गियो अर ईसु सुं पूछ्‍यो, “तु कढ्अ को छ?”

पण ईसु बीन्अ कांई बी जुवाब कोन्अ दियो। 10 पिलातुस बीन्अ बोल्यो, “तु म्हारसुं क्युं कोन्अ बोल्अ? तु जाण्अ कोन्अ कांई, क तन्अ छोड़बा को अर करूस माळ्अ चढाबा को अधिकार म्हारअ कन्अ छ।”

11 ईसु उन्अ खियो, “तन्अ म्हारअ माळ्अ अधिकार जिसुं छ, क्युं क परमेसर सुं तन्अ यो अधिकार मल्यो छ। ई बजेसुं ज्यो मनख मन्अ थारा हाथ मं पकड़वायो छ बीको पाप बड़ो छ।”

12 जद पिलातुस या सुण्यो तो वो ईसु न्अ छोड़बो छार्यो छो। पण यहूदी ओर बी जोरसुं खिया, “तु बीन्अ छोड़्अलो तो थारी भगती राजा कैसर की लार कोन्अ, ज्यो कोई अपणा-आपन्अ राजो बणाव्अ छ वो राजा कैसर को बिरोध करअ छ।”

13 ये बाता सुणर पिलातुस ईसु न्अ बारे ल्यायो, अर भाटा का चूतरा माळ्अ (ज्यो इब्रानी मं “गब्बता” खुवाव्अ छ) न्याय का सिंहासन प्अ बेठग्यो। 14 या फसह का तुंवार क पेली का दन की दोपेर पाछ्अ की बगत छी। पिलातुस लोगबागा न्अ बोल्यो, “यो थांको राजो छ!”

15 पण वे फेर जोरसुं बळाया, “बीन्अ करूस माळ्अ चढ़ा दे, बीन्अ मार नाख, बीन्अ मार नाख!”

पिलातुस बान्अ बोल्यो, “थे चावो छो कांई क म थांका राजा न्अ करूस माळ्अ चढाद्‍यूं?”

परमुख याजक बोल्यो, “कैसर न्अ छोडर म्हाको ओर कोई राजो कोन्अ!”

16 फेर पिलातुस ईसु न्अ करूस माळ्अ चढाबा क ताणी बाका हाथ मं सुंप दियो।

ईसु न्अ करूस माळ्अ चढाबो

(मत्ती 27:32–44; मरकुस 15:21–32; लूका 23:26–43)

अस्यान सपाई ईसु न्अ कबजा मं ले लिया। 17 अर ईसु करूस न्अ उठा'र बी ठोर ताणी गियो जिन्अ “खोपड़ी की ठोर” खेव्अ छा। जिन्अ इब्रानी मं “गुलगुता” बी खेव्अ छा। 18 उण्डअ वे ईसु न्अ अर दो ओर मनखा न्अ करूस माळ्अ चढ़ाया। एक न्अ एक ओड़ी अर दूसरा न्अ दूसरी ओड़ी अर बीच मं ईसु न्अ।

19 अर पिलातुस या लिखर एक तखती करूस माळ्अ लगा दियो क, “ईसु नासरी, यहूद्‍या को राजो।” 20 घणा यहूदी मनख ईन्अ बांच्या क्युं क जी ठोर माळ्अ ईसु न्अ करूस माळ्अ चढ़ाया छा बा नगर क सांकड़्अ छी। अर उं तखती प्अ इब्रानी मं, यूनानी मं और लातीनी भाषा मं मण्ढ मेल्यो छो।

21 फेर परमुख याजक बोल्यो, “अस्यान मत मांड क, ‘यहूद्‍या को राजो’ पण अस्यान मांड क, ‘वो खुद बोल्यो छ क म यहूद्‍या को राजो छु।’”

22 पिलातुस बोल्यो, “म ज्यो माण्ढ दियो, वो माण्ढ दियो।”

23 सपाई ईसु न्अ करूस माळ्अ चढ़ाया पाछ्अ बीका लत्ता न्अ लेर च्यार पांती कर लिया, एक-एक सपाई बेई एक-एक पांती दिया। वे चोगा न्अ उतार लिया पण चोगो उपरअ सुं लेर नीच्अ ताणी एक'ई छो, ई बजेसुं वे आमा-सामा बोल्या, “आपा ईन्अ कोन्अ फाड़ा, पण ईक्अ माळ्अ गोळा गुड़कावा क यो कुण न्अ मल्अलो।” 24 यो ई बजेसुं होयो क सास्तर की या बात पूरी हो जाव्अ क,

“बे म्हारा लत्ता आमा-सामा बांट लिया।

अर म्हारा लत्ता माळ्अ गोळ्या गुड़ाया।”

अर सपाई अस्यान'ई कर्या।

25 ईसु का करूस क सांकड़्अ बीकी माई अर बीकी माई की बेणा मरियम, क्लोपास की लुगाई, अर मरियम मगदलीनी ऊबी छी। 26 ईसु जद्‍या खुदकी माई न्अ अर प्यारा चेला न्अ सांकड्अ उबो देख्यो, तो वो खुदकी माई न्अ खियो, “यो थारो छोरो छ।” 27 फेर उं चेला न्अ बी खियो, “या थारी माई छ।” अर उंई बगत सुं वो चेलो बीन्अ खुदक्अ घरा लेगो।

ईसु को मरबो

(मत्ती 27:45–56; मरकुस 15:33–41; लूका 23:44–49)

28 ईक्अ पाछ्अ ईसु या जाणर क सबळी बाता पूरी हेगी, ई बजेसुं क सास्तर की सारी बाता पूरी होव्अ बोल्यो, “म तसायो छु।” 29 बड़्अ अंगूरा का खाटा रस सुं भर्यो एक बरतन धर्यो छो। वे रुई न्अ सिरका मं डबोर एक कामड़ा माळ्अ फसार बीका मूंडा क लगाया। 30 अर ईसु बीन्अ चाखर बोल्यो, “पूरो होयो।”

फेर नाड़ नीची करर मरगो।

31 अर ई बजेसुं क वो सबत का तुंवार की तियारी को दन छो, यहूदी पिलातुस सुं अरदास कर्या क बांका पग तोड़र बांकी लास नीच्अ उतारबा की आज्ञा देव्अ। क वे आरामहाळा दन करूस माळ्अ कोन्अ रेव्अ, क्युं क वो आबाळो दन सबत को पवितर दन छो। 32 ई बजेसुं सपाई आर ज्यो ईसु क सांकड़्अ करूस माळ्अ चढ़ाया छा पेला का अर फेर दूसरा का पग तोड़ नाख्या। 33 पण जद ईसु क सांकड़्अ आर देख्या क वो मरगो छो। ई बजेसुं बीका पग कोन्अ तोड़या। 34 पण एक सपाई ईसु की बगल मं भालो घूंस दियो अर बीम्अ सुं लोई अर पाणी नखळ्यो। 35 ज्यो या देख्यो छ बोई ईकी गुवाई दियो छ, अर वो जाण्अ छ क वो सांच बोल्अ छ, जिसुं क थे बी बस्वास करो। 36 यो ई बजेसुं होयो क सास्तर को यो लेख पूरो हेव्अ क, “बीको कोई बी हाड कोन्अ तोड़यो जाव्अलो।” 37 अर एक-दूसरा बचन मं मण्ढर्यो छ क, “जीक्अ वे भालो घुस्या छ, वे बीकी ओड़ी नाळ्अला।”

ईसु न्अ गाड़बो

(मत्ती 27:57–61; मरकुस 15:42–47; लूका 23:50–56)

38 ईक्अ पाछ्अ अरिमतियाह को रेबाळो यूसुफ, ज्यो ईसु को चेलो छो। पण यहूद्‍या का ड़र सुं अपणा-आपन्अ लुखार राख्अ छो। वो पिलातुस सुं अरदास कर्यो क ईसु की लास न्अ लेजाबादे। अर पिलातुस बीन्अ लेजाबा बेई खेदियो। अर वो बीन्अ लेर चलग्यो। 39 नीकुदेमुस बी ज्यो पेली ईसु कन्अ रात मं आयो छो, एक मण क अन्दाजन गन्धरस अर मलहम लेर आयो। 40 फेर वे ईसु की लास न्अ लेग्या। फेर यहूद्‍या की गाड़बा की रीत की जस्यान बीन्अ मसांला की लार कफन मं लपेट दिया। 41 जी ठोर ईसु न्अ करूस माळ्अ चढ़ाया छा, बी ठोर एक बाग छो अर बी बाग मं एक भाटा की नुई गुप्पारी छी, जिम्अ हालताणी कोई न्अ बी कोन्अ मेल्या छा। 42 क्युं क वो यहूदया का आरामहाळा दन क पेली की तियारी को दन छो, अर बा भाटा की नुई गुप्पारी सांकड़्अ ई छी। ई बजेसुं वे ईसु न्अ उंई भाटा की नुई गुप्पारी मं मेल दिया।