10
Kújakuwe,
b'ímaŋie bu t'eholam íhabanein,
ni b'ilawe bu Atambatun beemo fu Esuwif i kafak.
2 Íyinooni kaseede kaanuku káhabaneinohabanein kaanuku kéejeŋgin Atambatun,
bare bíhabaneina bondu bite ni kámeyiaate.
3 Kánandinut buŋ b'Atambatun af'ajok ésuk i bakan kéejube,
bare kaŋesaŋes kasiiŋan bifehe booniin bite kájubu ku.
Iyu i kateñekee fu efehe yite Atambatun yey'éhin ésuk i kéeyemi bakan kéejube.
4 Ábuki Kiris ahabanoore fu *Eluwa yite Moyis,
kaanuku man kéeyilene ku te o fe,
Atambatun n'ajokiin bakan kéejube.
Atambatun kafakan kéeyilene ku te o kareyi fe
5 Bonde bi *Moyis asoke fu t'an éemaŋie kaŋaasu t'Eluwa i éejub t'Atambatun.
Aanaan:
«An af'áhin b'Eluwa i esoke bu bireyi fe,
o kabaju buroŋ bua.»
6 Bare ti bite káyilen ku man an u n'ájub t'Atambatun,
bonde busokee fu:
«Atum'a̱yinoor n'a̱ane:
aañ aja fu t'etiirb?»
kite awe á̱maŋie *Kiris áŋaabein úne t'etaam.
7 «Atum'a̱yinoor yooŋ n'a̱ane:
aañ aja fu búwaneina ti keekete ku kaamo du?»
kite awe á̱maŋie karitan Kiris t'eket i.
8 *Míkiñjin mu meenaan:
«Hirim hite Atambatun hikambuti,
hondu ti káalelufi,
nu tu búwejetic.»
Hirim hondu heemo fu báhamin bite káyilen ku kiŋk'iriwaare.
9 Af'a̱sok nu butumi tu buhooŋu ésuk i a̱ane Yesu aamo fu Anahaan u,
abe n'á̱yilen tu búwejeti kaanuku Atambatun aritanoritan t'eket i,
awe kafaku.
10 Ábuki an af'áyilen tu búwejeto,
Atambatun n'aŋ'ajoko an éejube,
abe an n'asok nu butumo tu buhooŋu ésuk i káyilen koone ti Yesu,
Atambatun kafakano.
11 Múniyo Míkiñjin mu meenaan:
«An af'áyilen te o,
at'awatanooro hikeed.»
12 Náami Asuwif u n'eenooto u Asuwif,
boko k'afeeneŋ ku.
Anahaan afeeneŋ i kabaje fu aa ásoniyan dómbokun kiŋki karuwo fe.
13 Ábuki Míkiñjin mu meenaan:
«An fe eeruwe Anahaan u,
o kafakue.»
14 Bare buŋ bi kaja fu karuwio ti káyilenut te o?
Buŋ bi kaja fu káyilen te o ti kajamut huruwu hoone?
Buŋ bi kaja fu kajamu huruwu hoone ti kabajut an eesokiin ho?
15 Buŋ b'an aja fu kasokiiin ho t'aboñutee?
Míkiñjin mu meenaan:
«Aŋ'atoof dómbokun kane kiŋki kawaare Hirim Heetoofe hu káreeŋinf!»
16 Bare ésuk íiit ereyi éjeŋgine fu Hirim Heetoofe hu.
Múniyo *Esayi aanaan:
«Atemit,
aañ áyilene fu báhamin bite b'unig?»
17 Náami káyilen ku iŋi kibin ti kajamatan kite báhamin bu,
abe báhamin bondu uŋu búnuutin ti kasoku kite hirim hite hu Kiris.
18 Hahiyu eene i:
bakate ku *Israyel kajamut fíya báhamin bu?
Áyine wala,
kajamajam bo!
Míkiñjin mu meenaan:
«Wuji wute kiŋki kawaare hirim hu
wujameejam t'etaam i ereyi fe,
abe báhamin booniin
bireeŋareeŋ tánotan t'etaam ih.»
19 Iisooñ íkandijen bonde:
bakate ku Israyel fíya kánandinut?
Wala,
kánandinanandin.
Ábuki kóyin Moyis,
Atambatun aanaan:
«Íñje káhinuuun ariihiñan baabu biheet.
Íñje káhinuuun ariiyiŋat ti bakan kéewesinateit kui.»
20 Atambatun atiŋgatiŋg yooŋ Esayi eeene:
«Keeŋesutam ku yéeni kajukam fu,
abe n'ifeeñ ti keeruwutam kuj.»
21 Bare ti bakate ku Israyel,
Atambatun aanaan:
«Bújom tujon iyitayit bakan kúuma emoŋu kaanuku keebin,
bare kájeŋginutam,
abe yooŋ iŋi kárahan t'íñjek.»