Eleetar étiyar i yi Pool akiñje i bakate ku Korent
Béekinineŋe bu kaawiit konde ni kikiñjee
Pool akiñje fu eleetar yende bakate ku Korent *kéeyilene ku. Abinabina aja bo ti kátuki koone kúsooboriyan ku, abe n'ábajin bo emit ni kiim hutok ni hifeeneŋ. Kóŋkeyin n'awaaree fu keenooto ku Esuwif ayak abin áami kajoka bítim bite *Kiris.
Ésuk yendu eŋ'etoof naane kóŋkeyin: bisahar bu uŋu búnuutin tánotan beebin toko, éjulaata i uŋu hooniin híiit. Kiŋki kafurukato yooŋ iŋi kátumb kahooj bo, naane tu búsuk bómbokun bu fe. Ni kabin kátifen bakate ku Korent kéeyilene ku. Bondu nu bútumb bíhin Pool biyinoor asooñen n'akiñjiin eke eleetar étiyar (a̱juk 1 Korent 5.9), eeeniin itim kakol ni bakan kondu.
Mánoman bakate ku Korent yooŋ kakiñjokiñj. Bare beehooje ti b'arimiin bu, kawasawas bo. Bakaake ni kabin kasok Pool bike ti bakate ku Korent, abe butoofut. N'aane kame éesafiniin eleetar yi kabine i kakiñjo, abe n'arimiin yooŋ te yo.
Pool arimiinrim tu buroon úkaan, naane káwaajinoor kite Ekarjen i, nu bufurukato bu, ni biseño bu, ni kateŋu kite efuwa *yey'esarahee ti ñájiim ñu, n'Éhijiima yite Anahaan u, nu buroon bu Búwejet Beenabe bu bumbu buwun, ni bíriteina bite t'eket i.
Pool asaahasaaho tu boko tíŋ eesokiin b'awariin bu kasoku. N'áwufooriin yooŋ kaanuku kajoku kite Kiris taŋ nu sumoŋu súsuba kíyinie fu kafaju buroon bondu. N'aane yooŋ kámaŋi an ahaŋahaŋ doon areyi fe.
Iye i kaawiit konde kije fu:
1) Kasaafu ku (1.1-9)
2) Ekarjen i kawarut kalobu, kawarut yooŋ káwaajinoor (1.10-4.21)
3) Ekarjen i kawarut káhinoor meejakut (5.1-6.20)
4) Háyine hu, ni haare hooniin (7.1-40)
5) Atambatun aware fu kájeŋginee, ñúwisenum ñíiit (8.1-11.1)
6) Buŋ bi kéeyilene ku kaware fu káhinu ti bijaŋgu bu (11.2-14.40)
7) Buŋ bi Kiris aheeke fu eket i (15.1-58)
8) Káyokunan kite keebajut ku (16.1-4)
9) Pool ásitenasiten bija kátuki (16.5-12)
10) Karimu ku, ni kasaafu ku (16.13-24)