Eleetar ésooboriyan i yi Pool akiñje i bakate ku Korent
Béekinineŋe bu kaawiit konde ni kikiñjee
Diye yooŋ eke eleetar yi Pool akiñje bakate ku Korent *kéeyilene ku. T'eleetar yeene yaayu, aaniinyen ámaŋamaŋi bija kájukinaiin. N'aaniin yooŋ te yo kateg, bateg bondu beebin beeboñee bakate ku Serusalem kéeyilene ku, abe akina humuumo aja fu káseina kite te bo. Bare abinut aja bija bu bo. Abe kajaate koone iye i kije fu: Timote ámoomi ti bija Korent, n'ajam ti bítim bu buŋ bi bakate ku bo kéeyilene ku kaamo fu ariike. Abe butoofut tuf. Ajamajam kaanuku bakaake Esuwif kajaja Korent, abe n'iŋi kawaare bo bike beewayee ni Hirim Heetoofe hu, hu Pool afiye hu awaare bo. N'iŋi kaaniin yooŋ Pool anooto *apotor ite nu múniyo ite *Kiris. N'abatuko ayeet abe n'asok bo Pool. Pool n'átaañian dómbokun. Ho h'aane fu eekiñjiin eesokiin beeemo bu ti hikawo, ni béekinineŋe bu h'ajeit hu kájukina kooniin.
Pool asokasok t'eleetar yende aane akina apotor ite Kiris, bare burok boone naane aa áhin bo, aŋ'awayee ni bite bu bakaaku kiŋki kaliiken ésuk i bítim bu. Bondu bíkinineŋe fu ni kahuufo. Asaboorasaboor yooŋ aane ámaŋamaŋi kajamoor akina ni bakate ku Korent. N'asooñ aaniin káñiŋkaan ti bateg bu kéeyokunan bakate ku Serusalem kéeyilene ku. N'áwutiyen aane ámaŋamaŋi bija kájukinaiin, éeyini kasoku bifeeneŋ bu keewasut ku wuhoofoor wu.
Hi Pool ajoke hu alit tip ti kaanu ku akina apotor, am ámaŋie ésuk i émeyi Hirim Heetoofe hu, abe ni kánandin yooŋ kaanuku Yesu aamo fu Anahaan u.
Iye i kaawiit konde kije fu:
1) Pool n'asaafiin, abe n'aane Atambatun eyeehen (1.1-11)
2) Burok bite apotor ti kéeyilene ku (1.12-2.17)
3) Kámaŋi an naane Kiris ámaŋie i úne (3.1-7.16)
4) Káyokunan kite keebajut ku (8.1-9.15)
5) Pool aane akina apotor ite nu múniyo (10.1-13.10)
6) Kasaafu kiraanu ku (13.11-13)