Eleetar i yi Pool akiñje i bakate ku Galasi
Béekinineŋe bu kaawiit konde ni kikiñjee
Diye eleetar i yi Pool akiñje i bakate ku Galasi *kéeyilene ku. Abinabina aja bo kireeŋ kúsuba, eewaareiin Hirim Heetoofe hu. Esuwif i ni keenooto ku Esuwif ni kajok ho kéeyemi Ekarjen. Bi Pool awaareiin bu beemo fu káyilen ku ti Yesu taŋ kiyino fu kákinineŋ Atambatun n'ajokiin bakan kéejube. Bare abin afiyo, bakaake Esuwif ni kaja Galasi, kaane sifaaf site kéeyilene ku bakate ku Serusalem kaboñiin fu. Ni kajok bu Pool awaaree bu fe kábujaroor, kaane anooto *apotor ite nu múniyo, abe bamb'awaare yooŋ bíteiit toko. Ni kaaniin naane aamo i keenooto ku Esuwif káyilenayilen ti Yesu, kawarawar káhinu yooŋ naane *Eluwa yite Moyis esoke i. Abe bi kahaŋe bu kalitan te bo fe beemo fu *kateyi kite karam ku. Kaane ko kíyinie fu kákinineŋ Atambatun n'ajok ésuk i bakan kéejube.
Bakate ku Galasi ni katey yooŋ karam, abe Pool n'ajam bo. N'ayiŋat dómbokun, ábuki kájeŋgin kíteiit Eluwa yite Moyis kíkinineŋe fu Atambatun n'ajok ésuk i bakan kéejube. Ho hi Pool akiñje fee bakate ku Galasi, éewufooriin kaanuku Atambatun asokut iyu. Karam keesokee ku keemo fu búwejet bite an u buwarawar *kakuuru but. N'asokiin kaanuku *t'Aburaham eeemo u faaf ite Esuwif i ateyoorut karam t'Atambatun ajoko fu an éejube. Káyilen ku taŋ kíkinineŋe fu Atambatun n'ajok ésuk i bakan kéejube, abe ko yooŋ kíyinie fu kákinineŋ ni kabaj buroŋ beetoofo.
Iye i kaawiit konde kije fu:
1) Pool apotor ite nu múniyo, bamb'awaare yooŋ bite nu múniyo (1.1-10)
2) Atambatun ajifane fu Pool éeyemi apotor (1.11-24)
3) Naŋ ni Hirim Heetoofe hu husoke fu nu múniyo (2.1-21)
4) Káyilen taŋ kiyino fu kákinineŋ an n'afak (3.1-4.31)
5) Úmaŋioori, abe n'úwas Búwejet Beenabe bu beejoŋooran buroŋ bite b'úne (5.1-6.10)
6) Kasaafu kiraanu ku (6.11-18)