Eleetar i yi Pool akiñje i bakate ku Efees
Béekinineŋe bu kaawiit konde ni kikiñjee
Diye eleetar i yi Pool akiñje i bakate ku Efees *kéeyilene ku. Mánoman bare akiñjutiin yo boko unooniin, ábuki tu wuwiit weehooje wútiyar wu, «Efees» enooto t'eferse étiyar i. Áyinooni káyemi Pool akiñjakiñj yo bakan bakate tu búsuk beehooje bite Asi kéeyilene kaanuku iŋi kasawoor yo. Eleetar yende akiñjakiñj yo akina *Rom t'ekulu i.
Kóŋkeyin, Efees ehaŋe fu búsuk bite bu Rom beeemo bu Asi fe katoofu. Keehooje-hooj ti bakate ku bo burokiin kájula. Kanutanut enuuf yéewarie-wari bija t'atambatun ooniin ii kaane Artemis ti *kigerekaay; bakate ku Rom ni kafin kaano Jiyana. Artemis ondu búwisenum, abe anaare. T'enuuf yendu yéewarie yii t'ifi kaja kalawu koone. Bakate ku bo kareyi fe káyilene fu búwisenum bondu, abin aŋeñen t'Esuwif i n'Ekarjen i.
Hi Pool abine hu aja Efees ti kátuki koone kúsooboriyan ku, n'awaare Esuwif i bakate ku bo t'erimaas yeeniin. Abe n'abatuko, ábuki ayinaat bo bifiyo, bare aaniinyen o bibin kasooñu. H'abine fu asooñ bo ti kátuki koone kíhaajiyan ku, n'ábajin bo simit síhaaji ti kawaare ésuk i kep (a̱juk Epotor i 19-20).
Pool áwufoorawufoor úne bonde t'eleetar yende: Atambatun áhinahin úne núumeyi béenuusee bu b'afiye bu asiiŋan ti kajaku koone. Aamo fu o kakuukan doon fe deeemo t'etiir bufor bu, ni t'etaam i, Yesu *Kiris éeyemi aseef u. N'asok yooŋ buŋ bu húŋgowulan ayino fu kafaku ariike. N'áwutiyen aane Ekarjen i kawarawar kajamoor, abe ni kajokoor naane baatiaay; abajut kaanu an onde Asuwif, an onde anooto Asuwif. Anatoora ooniin afeeneŋ taŋ, o aamo fu Setani. Náami kawarawar iŋi kalawu t'afeeneŋ, Setani atum'abin ahaŋiin sembe. Pool n'asooñ asok buŋ b'ániine aware fu kajokoor n'anaar'o, buŋ bi biñi bu kaware fu kajoku sifaafiin, buŋ bu búsukateen bu yooŋ kaware fu kajoku kéekiniiin ku. Aane kéeyilene ku kawarawar káhinu t'afeeneŋ ni Kiris.
Iye i kaawiit konde kije fu:
1) Kasaafu ku (1.1-2)
2) Kiris ásoniyana úne nu Búwejet Beenabe bu (1.3-3.21)
3) Úbaj buroŋ bíyeni t'afeeneŋ ni Kiris (4.1-6.20)
4) Kasaafu kiraanu ku (6.21-24)