Eleetar i yi Pool akiñje i bakate ku Rom
Béekinineŋe bu kaawiit konde ni kikiñjee
Diye eleetar i *y'apotor u Pool akiñje i bakate ku *Rom *kéeyilene ku. Ámusut bija bo; ake awaaree fu bakate ku bo, abe n'asiiŋan bo hikarjenaate hu. Pool ámaŋamaŋi kéemeyi akina aamo fu aañ. Iŋ'ite ho h'akiñjiin fu eeeniin af'áyemi ti bija Esipañ, akina bifiito bo eeja eeyaŋgananiin kikaw ti bítim bite *Kiris. N'aaniin yooŋ kalaw bija te o man bítimo ni biŋaas.
Pool áwufooriinwufoor t'eleetar yende naŋ nihaŋe fu kajaku fe ti káyilen ku ti Kiris. Aane kúŋgowulan ku fe kahoofoore fu, abe ni kábuur kániku kite Atambatun. Bare hahiye káyinooni kabukan ne o ti káhinu ku t'afeeneŋ ni Yesu Kiris. Atambatun ajifanajifan Pool éeyemi apotor kaanuku aŋ'abin awaare Hirim Heetoofe hu. Pool aane Hirim Heetoofe hu, diyu sembe site Atambatun bija t'an fe éeyilene, abajut an onde Asuwif, man yooŋ anooto Asuwif. T'Atambatun, kéeyilene ku fe karare, an ahaŋut áwiyo. Ajokiinjok bakan kéejube, naane ti *Míkiñjin mu musoke du. Meenaan: «An éejube, buroŋ boone káyemi bite káyilen.» (Rom 1.17). Pool n'asok yooŋ aane kéeyilene ku fe kaware fu kajamoor, an awarut kahuufu áwiyo, atum'atinano, atum'ajoonano yooŋ hutoof biyinoor booniin bifeeneŋ bíiit.
Eleetar yende yi Pool akiñje i bakate ku Rom etoofatoof aa, abe huta hu kóŋkeyin Ekarjen i kajokajok yo nu múniyo.
Iye i kaawiit konde kije fu:
1) Pool n'asok Hirim Heetoofe hu (1.1-17)
2) Kúŋgowulan ku fe kahoofoore fu (1.18-3.20)
3) Buŋ b'Atambatun ajoke fu kúŋgowulan ku bakan kéejube (3.21-4.25)
4) Bakan kite Atambatun kabaju buroŋ bíyeni (5.1-8.39)
5) Atambatun awasawas *Israyel, bare híraaniiit (9.1-11.36)
6) Buroŋ bíyeni bite kámaŋioori (12.1-15.13)
7) Bi Pool ásitene bu, ni kasaafu ku (15.14-16.27)