Eleetar i yi Pool akiñje i bakate ku Rom
Kasaafu ku
1
Íñje Pool aroka ite Yesu *Kiris ikiñje fee eleetar yende.
Atambatun aruwamruw kaanuku íiyemi *apotor,
abe n'ákajinam kaanuku iŋ'iwaare Hirim hoone Heetoofe hu.
2 Hirim hondu Heetoofe hu,
afiyee naane Atambatun atiŋge i *eyiŋana yeene keesok ti *Míkiñjin Meenabe mu kaanuku o káboñina úne hoa.
3-4 Husokasok bite bu Añi oone Yesu Kiris Anahaan ite úne.
Abukeebuk naane húŋgowulan tu noota nite áyi u *Dafitb,
bare h'aritanee hu t'eket i,
Búwejet Beenabe bu búwufoorawufoor ni sembe-sembe kaanuku akina Añi ite Atambatun. c
5 Akina ákinineŋe fu Atambatun n'ásoniyan uni éehin uni epotor,
kaanuku man n'írihin biheet bu fe béeyilen te o,
abe ni bíjeŋgino.
Iyu if'írihin huruwu hoone heehaŋ bijamo.
6 Aruun bokondu yooŋ ti bakan kondu,
aruun k'Atambatun aruwe ku kaanuku áriiyemi bakate ku Yesu Kiris.
7 Aruun keeemo ku *Rom k'íkiñjina fee,
aruun k'Atambatun ámaŋie ku arireyi fe,
abe n'aruwuun kaanuku áriiyemi bakan koone.
Atambatun Faaf úne,
n'Anahaan u Yesu Kiris kaja kásoniyanuun,
abe ni kawunuun káasuumaay.
Pool ámaŋamaŋi bija kájukina bakate ku Rom kéeyilene ku
8 Iijab eene Atambatun úuma eyeehen uŋu hoonuun hu arireyi fe,
iŋaasan bo ti Yesu *Kiris,
ábuki káyilen koonuun kijamajamo t'etaam i fe.
9 Atambatun,
akina ii irok íhabanein bija te o,
ti kawaare kite Hirim Heetoofe heesoke hu bite b'Añi oone,
ámoomi kaanuku ehelam eŋ'éyemi t'aruun
10 ko kireyi fe kane íyemi ti kalawu.
Íñj'endu ti kalawu Atambatun kaanuku af'ámaŋi,
n'áhin bítimam beeŋaas íitumb íyini bibin t'aruun.
11 Ábuki ítumbatumba ímaŋi kajukuuun iibinuun ni bike béenuutina tu Búwejet Beenabe bu,
man káyilen koonuun ni kihaŋ kayanu.
12 Bonde b'ímaŋie fu kasoku:
eene ímaŋamaŋi kaanuku núuhaŋ kayaŋgananoor kikaw íñje n'aruun ti káyilen k'úbaje ku.
13 Kújakuwe,
ímaŋamaŋi áriimeyi kaanuku kuhoojahooj iŋ'ijok hunak kaanuku iibin t'aruund,
bare bija t'úmiye bítimam biŋaasut.
Ímaŋamaŋi yéeni burok búuma beebukoor t'aruun naane bubukoore i yooŋ ti baabu biheet.
14 Íñje an eeware kawaare ésuk i fe:
kéeniyee ku ni kéeniyeit ku,
keejaŋgee ku ni keejaŋgeit ku.
15 Iŋ'ite ho h'ímaŋiuun fu yooŋ kawaare Hirim Heetoofe hu,
aruun keeemo ku *Rom.
Sembe site Hirim Heetoofe hu
16 Ifuñeit kawaare Hirim Heetoofe hu:
ho heemo fu sembe site Atambatun sans'afakan ne so an fe éeyilene,
éejabin t'Esuwif i,
abe n'ahabanooro ti keenooto ku Esuwif.
17 Múniyo Hirim Heetoofe hu húwufoorawufoor buŋ b'Atambatun af'ajok húŋgowulan an éejube:
ti káyilen ku taŋ.
Ti káyilen ku tu bondu bíjabina fu,
ni biraan yooŋ te ko,
naane busokee i ti *Míkiñjin mu.
Meenaan:
«An éejube,
buroŋ boone káyemi bite káyilene.»
Kúŋgowulan ku fe ehoofoora
18 Atambatun áwufoorawufoor huta hu t'etiir bufor bu kaanuku ayiŋatayiŋat tu kúŋgowulan ku iŋi naane ii kahoofoor,
abe ni káhin yooŋ meejakut.
Ni kinij kooniin keejakut ku n'ifi kahokan múniyo mu.
19 B'an áyinie kámeyi t'Atambatun bukuuriinkuur but,
ábuki akina humuumo áwufooriin fu bo.
20 Múniyo huta h'etaam i eŋ'ebin éwuwanee,
béejukaariitee bite b'Atambatun,
butum sembe soone séehabanaariit su,
ni naane aamo i akina humuumo Atambatun,
bondu fe uŋu bujukee féet kane újondoman tu buroon b'áwuwane bu.
Náami bakan kondu iŋkut kabaj bi kaware bukuuso te bo hágila Atambatun,
21 ábuki naane aamo i kámoomi fe kaanuku Atambatun abajabaj,
kájeŋginaariito.
Káanaariito yooŋ eyeehen naane kawaro i yéeni káhinu,
kasooñen biyinoor booniin buñunut,
siheliin seereeŋut su yooŋ ni síyemi t'ébaani.
22 Iŋi kaane boko káwesinatee,
bare kabajut kikaw.
23 Iŋi kateñeko kásukaay Atambatun éenike u abe yooŋ áketaariit,
keefin kéesukaay ñúwisenum ñite kúŋgowulan ku kiŋki kaket,
ajok ñite bilele bu,
ni ñite bíndakakureŋ bu,
ni ñite ñuroon ñúbuunaay ñuf.
24 Iŋ'ite ho h'Atambatun awasiin fu iŋi káhin buroon *beekuurut bi kámaŋie bu tu ñúwejet ñooniin,
kasooñen n'iŋi káhinoor ti siniiin buroon béefuñinanie.
25 Iŋi kawas múniyo mite Atambatun keejok ti haajuus hu.
Ni kásukaay buroon b'áwuwane bu,
abe ni katofotoor bo yooŋ,
keewaso akina Áwuwana u eeware u kasokorooree ko kireyi fe!
Amiin.
26 Iŋ'ite ho h'Atambatun awasiin fu iŋi káhin buroon béefuñinanie bu bimbi kayinoor ti kikawiin.
Haare hu kumuumiin iŋi kawas huŋotu hu ni háyine hooniin,
keeŋot anaare n'anaare,
abe bondu buwarut kabaju.
27 Háyine hu yooŋ iŋi kawas huŋotu hu ni haare hu,
kéemaŋioori ániine n'ániine,
kéehin buroon béefuñinanie.
Iyu ifi kajuk ti siniiin bajaam bite kunoŋk keejakut kiŋki kihiilaniin.
28 Naane aamo i kateñekateñeko kámeyi Atambatun,
Atambatun n'awasiin nu búwesinato booniin beeñunut bu kaanuku iŋi káhin buroon bi kawarut bu káhinu.
29 Ñúwejet ñooniin uŋu ñuhooj bib nu kunoŋk kánokan kéejubut,
ni meejakut,
ni bimero,
ni bánafut,
ni kahiñan,
ni kayoolu bakan,
nu sulob,
ni kabuutu bakan,
nu butuuko.
Iŋi kasok ti bakan,
30 ni kábuj kuruwu;
boko enatoora Atambatun,
kájamaariit t'an,
iŋi kayitooro,
burokiin jímak;
kahoojahooj ni bifehe bite káhinu meejakut m'an ámusut káhinu,
iŋi kárahan ti sifaafiin ni síñaayiin,
31 kabajut kikaw,
káhinaariit bimbi kasok,
kahirahir,
abe kámeyiit kayubiyen.
32 Kámoomi bare akuur but naane Atambatun aja i kajoonan kiŋki kanij naane iyu:
bokondu bakate kayooliee.
Bare naane kámeyie i bo fe,
karaanut ti káhinu kite buroon bondu;
kikawiin uŋu kutoof yooŋ ti bakaaku kiŋki káhin bo.