Setani n'aŋes káhinu Yesu eehoofoor
4
Yesu n'ánuutin inde kaayelu kite *Surdeŋ,
o káahoojin bib nu Búwejet Beenabe bu.
O ti biyeetu bu,
Búwejet bu ni bija ne o t'eramba i.
2 Setani n'aŋes káhinio bo eehoofoor kunak bakan bákasuba lám.
Kunak kondu kireyi fe,
Yesu áhinut doon fe ti haro.
Hi kihabanee hu,
bujoñjol nu bujoko.
3 Náami Setani eeeno:
—Kane arko múniyo awe a̱amo fu Añi ite Atambatun,
a̱sok ejuju yendu yeehosanooro,
yéeyemi humburu.
4 Yesu n'aano:
—Busokeesok ti *Míkiñjin mu kaanuku:
«Búñoofoiit barebare biyino fu kákinineŋ húŋgowulan n'aroŋa.»
—Íñje kawunii aduna i ereyi bif,
abe ebaj yendu fe n'eŋ'éyemi yúuwe.
Buroon bondu fe,
íñje i bisaanee fu,
abe íyinooni kawunu bo an eetoofam u.
7 Náami af'á̱sukaayam,
buroon bondu fe n'iŋi bíyemi búuwe bu.
8 Yesu n'aano:
—Busokeesok ti Míkiñjin mu kaanuku:
«Á̱sukaay Atemit Atambatun úuwe,
abe n'á̱jiŋgitan hágilao,
o unoono taŋb.»
9 Ahaban,
Setani n'aja ne o Serusalem.
N'asiiŋano t'ewulen ite *Enuuf ite Atambatun abe n'aano:
—Arko múniyo awe a̱amo fu Añi ite Atambatun,
a̱julan bija t'etaam;
10 ábuki busokeesok ti Míkiñjin mu kaanuku:
«Atambatun kasoku emalaka yeene keejukaric.»
11 Nu busooñ bikiñjee kaanuku:
«Boko kayitii tu sumoŋiiin kaanuku humuum kuwoti itim kíbiŋan t'ejuju n'a̱nufd.»
12 Yesu n'aano:
—Busokeesok ti Míkiñjin mu kaanuku:
«Atum'a̱jeeŋan Atemit Atambatun úuwee.»
13 Hi Setani ahabane hu bifehe bu fe kaanuku man Yesu n'ahoofoor,
n'aja akambo ti kaanu ni hikawo hike huroŋa.
Le diable tenta Jésus
Yesu n'ajab burok boone Gálile
14 Yesu n'abatuko bija *Gálile,
káahoojin bib ni sembe site Búwejet Beenabe bu.
Huruwu hoone ni hijamo ti Gálile,
nu tu músuk meeemo mu ne bo fe.
15 Aŋ'aliiken ésuk i ti *ñáalawum ñu,
abe kareyi fe iŋi kasok te o beejake.
Bakate ku Nasaret ni kateñeko Yesu
16 Yesu n'aja *Nasaret b'ahaate bu.
*Erimaas ite Esuwif i ereeŋa,
n'ayooso ti *báalawum bu naane aa afiy áhin.
N'arito kaanuku eejaŋga ti kaawiit kite Atambatun.
17 An u aa arok toko n'asaano kaawiit *k'Esayi *ayiŋana ite Atambatun akiñje ku.
N'áboyin kof,
abe n'aŋes ayak abin áami ajuka tu bonde bikiñjee du:
18 «Búwejet bite Atemit bondu t'íñje,
iŋ'ite ho h'ajifanam fu kaanuku iibin
isok keebajut ku doon fe Hirim Heetoofe hu.
Áboñinamboñin iisok keekulee ku kaanuku kawasanee,
n'íwufoor kéefuume ku kaanuku káyinooni kajuku,
kéehihinooree ku kaanuku boko karamiee,
19 abe n'íwufoor ésuk i kaanuku areeŋee,
Atemit eeja káwufooriin kajaku kooneg.»
20 Yesu ahabana bijaŋga bu,
n'aboon kaawiit ku.
N'abatikan ko an u aa arok toko,
abe n'ariiko kaanuku eeliiken ésuk i.
Kéeyemie ku ti báalawum bu fe,
ñíkiniin te o.
21 Náami Yesu eeeniin:
—Úmiye,
beesokee bee ti *Míkiñjin mu bibaja,
t'ewahatu y'arijame i bo yooŋ.
22 Kareyi fe,
abajut an i hikawo hutoofut te o.
Ni kajahale dómbokun ti kirim keetoofe ku kaŋk'asok ii.
N'iŋi kaane:
—Ake me t'arkut añi ite Siseef?
23 Yesu n'aaniin:
—Mánoman aruun kasokiam beekolofanee bonde:
«Asontena e,
a̱sontenooro.»
Aruun yooŋ kaaniam:
«Irijamajam b'á̱hine bu *Káfernawom fe;
á̱hin bo yooŋ beebe ti hikinu húuwe.»
24 Abe n'áwutiyen aane:
—Iisokuun bifeeneŋ bu:
ayiŋana ite Atambatun áyilenaariitee t'ésuk yeeniin.
25 Iisokuun bonde,
abe bite toko:
*Eli buroŋ,
etiir i énubinoot *Israyel simit síhaaji ni kiim hutok ni hifeeneŋ.
Bujoñjol bu nu bujok ésuk i ni sembe-sembe.
Kóŋkeyin,
abajeebaj haare bakate Israyel úkaan keehoke bákayiniinh;
26 bare Atambatun áboñinoot Eli ti mayet afeeneŋ tu boko.
Aaa.
Bare n'afin aboño t'ake anaare eehoke áyino,
ite Sarepita,
eke tu búsuk bite Sidoni.
27 N'abaj yooŋ Israyel bakan keehooje keebaje *yafot kóyin Elise ayiŋana ite Atambatun.
Bare mayet afeeneŋ tu boko aritanee éekoyi,
kane arko Naamaŋ ite u t'ésuk ite Sirij.
28 Hi kéeyemie ku ti báalawum bu kajame hu kirim kondu,
ni kayiŋat kahooj bib.
29 Ni karito,
abe ni kañakoo ayak abin áami kanuuta hikinu hu.
Hikinu hooniin húmoomi ti hirij heeliite jáŋgaraŋ.
Ni kaja ne o bija ti híraanna du kaanuku man ni káhalabino bo éeneyin.
30 Bare Yesu n'aŋaas t'etutiin,
abe n'aja.
Jésus proclama l'accomplissement des Ecritures
Ániine u e erab i ee élaaman
31 Yesu n'aja *Káfernawom,
t'ésuk ite *Gálile,
abe n'aŋ'aliiken ésuk i mite m'Atambatun hunak hite *erimaas ite Esuwif i.
32 Keejame ku ni kajahale kareyi fe,
ábuki aŋ'áhamin ayan faŋ.
33 Ake ániine ámoomi toko ti *báalawum bu eebaje erab.
N'ataŋk t'etiir aane:
34 —Híiña,
Yesu ite u *Nasaret,
kame baŋka úne?
Kame kátowutan uni k'a̱bine fu?
Ímoomi awe a̱amo fu aañ:
an eenabe u a Atambatun áboñina u!
35 Yesu n'akamoor t'erab i abe n'aane yo:
—A̱koowan,
abe n'a̱nuut t'ániine ondu!
Erab i n'éfiiten ániine u t'etaam hágila ésuk i fe,
abe n'enuut te o t'enufanuto.
36 Ésuk i ni kátumb kajahale dómbokun kayak iŋi kaanoor toko:
—Héyi!
Kame báhamin buŋ bondu?
Aŋ'áhamin ni birab bu ayan faŋ aane bo bunuut,
nu bunuut yooŋ!
37 Yesu n'ahaŋ bijamo tu búsuk beeemo bu ne bo fe.
Yesu n'aritan bakan keehooje kéesomute
38 Yesu n'ánuutin ti *báalawum bu,
abe n'aja t'enuuf ite Simoŋ.
Íñaay ite anaare Simoŋ toko,
bitiba bu bílaamanolaaman aa.
Ni kalaw Yesu kaano áyokunano.
39 Yesu n'áruŋgunan t'anaare u,
abe n'akamoor ti bitiba bu;
ni biraan,
abe anaare u n'áyemiiin ti katofotoor.
40 H'aamo hu taanak tu túlumaak,
keebaje ku tu boko bakan kéesomute fe,
saama náami kásomut,
ni kabin nu boko ti Yesu.
N'ásit tu boko kareyi fe sumoŋio,
abe ni kákoyi.
41 Sirab yooŋ nu sunuut ti bakan keehooje ku sujoke,
ti kataŋku t'etiir iŋi seene:
«Awe a̱amo fu Añi ite Atambatun!»
Bare Yesu n'aŋ'akamoor te so,
abe n'áhin so seekoowan,
ábuki súmoomi kaanuku akina aamo fu *Afakana ul.
Yesu n'awaare ti báalawum bu
42 Hi tifiite hu,
Yesu n'anuut ti hikinu hu,
abe n'aja t'eramba i.
Bakan keehooje-hooj ni káyemio ti hiŋes.
Hi kajuko hu,
ni kámaŋio kajoku kaanuku atum'aja.
43 Bare Yesu n'aaniin:
—Iwarawar kawaare Hirim Heetoofe hu hite *Jáyi jite Atambatun ti kaaku kikinu yooŋ,
ábuki bondu bíkinineŋe fu Atambatun n'áboñinam.
44 Abe n'aŋ'awaare ti *ñáalawum ñeeemo ñu *Súde fe.