Bakate ku Nasaret ni kateñeko Yesu
6
Yesu n'anuut toko eebatuko ti hikinu hu t'ákuumanee dua.
Eriboora yeene ni kasao ti hiñaawu.
Mark 6.1-13
2 *Erimaas ite Esuwif i ereeŋa,
Yesu n'áyemi ti *báalawum bu ti kaliiken ésuk i mite m'Atambatun.
Hahooja héeyemie hu toko ti bajamatan bu ni hijahale dómbokun.
Iŋi kaane:
—Diin fíya t'af'ájamin ii?
Káwasi kondu haanen?
Buŋ b'af'áhin buroon bondu beehaŋe bu úne kikaw?
3 Kame ákinaiit af'arok wusan wu,
añi ite Mari?
At'úteiit Saakiin,
nu Soos,
nu Sud,
ni Simoŋ?
Bákaniino,
úneiit úkine fee beebe?
Abe ni kateñeko káyilen te o.
4 Náami Yesu eeeniin:
—*Ayiŋana ite Atambatun,
ésuk i fe iŋi kajoko nu sumoŋu súsuba,
abin aŋeñen t'ésuk yeeniin,
n'ebuke yeene,
nu tu butoŋ booniin.
5 Yesu ahaŋut áyini káhinu bo doon fe deehaŋiin kikaw,
kane arko kásitu sumoŋio ti bakaake kéesomute,
ni kákoyi.
6 N'ajahale naane káyilenut i te o.
Yesu n'aboñ eriboora i sumoŋu ni bákasuba ku
Yesu n'aja ti kaaku kikinu keeemo ku ne bo aŋ'aliikeniin mite m'Atambatun.
7 Náami éeruwin eriboora yeene sumoŋu ni bákasuba ku,
aŋ'aboñiin ni bákasuba.
N'awuniin sembe site kákutoor sirab.
8 N'aaniin:
—Atum'arija nu doon fe:
dóoniit dite buñoofo,
hísaakosiit,
síriremiit yooŋ tu kuboote koonuun;
ariyit kútaŋkaru barebare.
9 Arisol sikaku,
bare atum'arija nu wújufa wúsuba.
10 N'asooñ aaniin:
—T'arija du kawanan,
atum'arikañj t'ake bija naane ariyak i kanuutu ti hikinu hu.
11 Bare ni kafin kateñekouun tike tiŋ,
man yooŋ ni kateñeko kajamatanuun,
arihaŋk hafor heeemo hu tu wuwotuun feb,
abe n'arinuut toko,
keejuk ni ñíkiniin kaanuku Atambatun ondu ti kanahaniin.
12 Náami keeja.
Ni kawaare ésuk i iŋi kaaniin kawatanooro kinij kooniin keejakut ku.
13 Ni kákutoor yooŋ sirab úkaan,
abe n'iŋi kátis éluuliin t'ésomuta keehooje,
kéehiniin kéekoyic.
Eket ite Sambatiis
14 Áyi u *Erod n'ajam huruwu hite Yesu,
ábuki ho ti kahaŋu bijamo kep.
Bakaake iŋi kaane:
—Sambatiis fu áriteina fii t'eket i!
Iŋ'ite ho h'abaje fii sembe site káhinu buroon beehaŋe ésuk i kikaw.
Mark 6.14-29
15 Bakaaku ni kaane:
—*Eli fu.
Bakaaku ni kaane:
—*Ayiŋana fu ite Atambatun,
naane keebaje ku kóŋkeyin.
16 Bare h'Erod ajame hu bondu,
n'aane:
—An ondu Sambatiis!
Íñje inoŋke fu iiboñ keefaran hikawo,
bare áriteino t'eket i!
17 Múniyo Erod aboñaboñ keejok Saaŋ keekobo,
abe ni kaja kakul.
Áhinahin bondu iŋ'ite hu Erojad,
anaare ite at'o Filip a árutine u.
18 Ábuki Saaŋ aŋ'aane yéeni Erod:
«A̱warut kasayi anaare ite atii.
Eluwa i ewunuti bondud!»
19 Erojad n'átumb ayiŋat te o naane.
N'aŋes húkuuseima kaanuku man Saaŋ n'aket.
Bare ayinaat,
20 ábuki Erod ámaŋiit doon fe dibaj Saaŋ.
Aŋ'áhino kákoleyi,
ábuki ámoomi kaanuku Saaŋ an ite bifeeneŋ,
abe yooŋ an eenabe.
Saaŋ af'áyemi ti báhamin,
Erod ehelo ébebaariit tuf,
bare aŋ'ámaŋi naane kajamatano.
21 Areeŋ bare hike hunak,
Erojad n'abaj b'aware bukuuso te bo,
t'efeet ite hunak h'Erod abukee hu te ho.
Erod aruwaruw eseef i,
sifaaf site esulaan i,
ni bakan kómbokun ku bakate ku *Gálile kaanuku keebin keeñoofo te o.
22 Ásuŋgute ite Erojad n'ayooso t'esaal i abe n'ayokoñ.
Nu hutoof Erod dómbokun,
ni bakan k'aruwe ku fe.
Áyi u Erod n'aane ásuŋgute u:
—A̱lawam doon d'á̱maŋie du fe,
abe íñje kawunii do.
23 N'asooñ awaat aano:
—Doon d'a̱yakam du kalawu fe,
íñje kawunii do,
hutoof yooŋ n'a̱ane wáaruboor búsuk búuma.
24 Náami ásuŋgute u eenuut abe n'aane íñaayo:
—Naŋ n'á̱maŋie fu ilawo?
Íñaayo n'aano:
—Hikaw hite Sambatiis.
25 Ásuŋgute u n'amoken abatuko ahil jab bija t'áyi u abe n'aano:
—Ímaŋamaŋi a̱wunam hahiye hikaw hite Sambatiis ti kaafalaat!
26 Áyi u n'átaañian naane.
Bare makamu aheekaheek eewaat tu buhooŋu emoosoora yeene,
ámaŋiit biteñeko.
27 Náami eeboñ toko-toko asulaan,
aano aja áyitino hikaw hite Sambatiis.
Asulaan u n'aja t'ekulu i,
areeŋ,
n'afaran hikaw hite Saaŋ.
28 Ahaban,
n'abin ne ho ti kaafalaat abin asaan ásuŋgute u.
Ásuŋgute u n'afin asaan ho íñaayo.
29 H'eriboora yite Saaŋ kajame hu bondu,
ni kaja kayit ehunuŋ yeene kaja kahok.
Yesu n'awun háyine kaamo súñjune hutok keeñoofo
30 *H'epotor i kábatikeina hue,
ni kakuukanooro ti Yesu aamo du,
abe ni kasoko buroon bi káhine bu fe,
ni bi kaliikene bu ésuk i.
Mark 6.30-56
31 Kiŋki kabin ni kiŋki kabatuko kátumbatumba kahooj,
Yesu n'eriboora yeene kasooñen kabajut ejot ite buñoofo.
Náami Yesu eeene eriboora yeene:
—Aribin núuja tike tiŋ t'an anooto ariiyih dikee.
32 Ni kájufo tu busoona bu keeja t'an anooto.
33 Bare bakan keehooje ni kajukiin ti bija bu,
ni kakeetaniin.
Náami ésuk i iŋi kánuutin ti kikinu ku kireyi fe,
iŋi káteyin ayak abin áami kajaba kareeŋiin ti kaja du.
34 Hi Yesu awanee hu tu busoona bu,
n'ajuk hahooja hu;
n'átumb fu ayubiyeniin naane.
Ábuki kanokooranokoor naane bíkarniina beebajut ahaawaf.
Náami ásita kaliikeniin buroon úkaan t'Atambatun.
35 To ti bija kajonu,
eriboora yeene ni kátofin kálohino abe ni kaano:
—Tujona fu,
abe an akinut nere.
36 A̱aniin kabatuko ti mikinu mu nu músuk meeemo mu nere,
man ni káyini kajoohen doon dite buñoofo.
37 Bare Yesu n'aaniin:
—Ariwuniin keeñoofo aruun kumuumuun!
Ni kaano:
—Naŋ n'á̱maŋie fu?
Butum íriisik bajaam bite an bite kiim hutok ni kíhaaji t'ájoohennee kumburu,
abe n'irisaaniin keeteŋ?
38 Yesu n'aaniin:
—Kumburu kiyem k'aribaje fu?
Arija arijuk fee.
Ni kákandijenn abe ni kaano:
—Iribaja kumburu keemo hutok,
ni misaan músuba.
39 Náami Yesu eeeniin káwaajinoor ésuk i,
abe ni káhiniin keeriiko ti mahos meeleebejane mu.
40 Ni kariiko kareyi fe,
diye kaamo téemeer,
diya bakan bákasuba nu sumoŋu,
diye téemeer,
diya bakan bákasuba nu sumoŋu.
41 Yesu n'ayit kumburu ku hutok hu ni misaan músuba mu,
abe n'áheelin t'etiir.
N'aane Atambatun eyeehen.
Ahaban,
n'afiitar kumburu ku,
abe n'asaan ko eriboora yeene kéeruboor hahooja hu.
N'árubooriin yooŋ misaan mu.
42 Kareyi fe ni kateŋ kayak kabir bib.
43 Eriboora i ni kahoojan wutekel sumoŋu nu wúsuba ni mifiit mite kumburu ku meeŋeñene kug,
ni mite misaan mu yooŋ.
44 Ti bakan keeteŋe kii kumburu ku,
háyine hu kaamo súñjune hutok.
Naane Yesu añaahe i t'etiir móhujo mu
45 Bondu buwas,
Yesu n'anoŋkooran eriboora yeene kéejufo tu busoona bu,
kéegilano toko bija Betsayida,
ti yaayu eraab ite *han hu,
akina eefin eeyeetan hahooja hu.
46 H'aamo hu kawasoora,
n'asiro ti hike hirij kaanuku eelaw.
47 Hu tujone hu,
busoona bu t'etut han hu,
Yesu n'afin áyemi t'asuuje du unoono.
48 N'ajuk kaanuku eriboora yeene kálaama ti kákawuj ku,
ábuki eyam i ésokumiinsokum.
Nu hurabu hu,
n'aja asooñan nu booniin,
aŋ'añaah t'etiir móhujo mu.
N'ámaŋi yéeni kayuunu.
49 Hi kajuko hu ti kañaahu ku t'etiir móhujo mu,
n'iŋi kaane man atand.
Náami keejaŋg toko kep,
50 ábuki kareyi fe iŋi káheelin te o,
abe kákolakoleyi.
Bare Yesu n'áhamin toko-toko aaniin:
—Kikawuun kiyaŋg!
Íñje fu,
atum'árikoleyi!
51 Ahaban,
n'ájufo aŋaabeiin tu busoona bu,
eyam i n'ehaŋ ewano.
Ni kajahale fu dómbombokun,
52 ábuki kajokut bite kumburu ku bi Yesu áhine bu;
ñúwejet ñooniin ñiyinaat kánandin bo.
Yesu n'aritan bakan kéesomute bakate Senesaret
53 H'aamo hu Yesu n'eriboora yeene kakana *han hu,
ni kareeŋ t'ésuk i yiyi kaane Senesaret.
Bo bi kaye fu busoona booniin.
54 Hi káwaneina hu te bo kep,
ésuk i ni kahaŋ kakeetan Yesu.
55 Ni katey tu búsuk beeemo bu ne bo fe,
abe n'iŋi káyitin kéesomute ku ti bilal booniin bibin ti kajame du kaanuku ondu toko.
56 Ti Yesu aje fe,
tu búsuk bómbokun bu,
man yooŋ ti biŋgilij bu,
man yooŋ ti mikinu mandot mu,
iŋi káyitin kéesomute ku bibin ti sifiñjan su.
Iŋi káwasiyano kaanuku man n'awasiin kep keegor balis bite wañ woone;
abe keegore ku bo fe iŋi kákoyi.