Ruuti na Bhoaji kukibhuga kya okuhuurira obhuro
3
Orusiku rumwi, Naomi yaakeerya omukamwana waaye ega, “Omuhara waani, m-bujomu nkutunire wa okukutuga, naho onyoore amajomu. 2 Bhoaji, unú waaringa orakora emirimu hamwi na abhagaya bhaaye bha ekikari, m-muhiiri weetu wa munda. Rora, reero kumugoroobha yakabhe areerura egishayiri kukibhuga harya. 3 Mbe, bhoono yooga omare wihake amaguta ga obhurange, wibhohe emyenda gyaho emijomu, ogende kukibhuga harya. Nawe, otaaja wiyorokye amanye ega, oringi harya. Otige okuhikira hanú yakamare okurya na okunywa. 4 Omaahe na okumanyiirirya bhwaheene ahasi hanú areeri. Na hanú yakehiribhwe, ogende okundukure kumaguru gaaye, oraare hayo. Weeki hanú yakabhuuke, yakakukeerye ekya okukora.”5 Ruuti akamukyukya ega, “Ndakora gonsego ganú ogambiri.”
6 Kwa ego, yaagya kukibhuga harya, akakora kya ego ngʼinabhyara waabho amukeererye. 7 Bhoaji hanú yaamara okurya na okunywa, akajomerwa. Akagya okuraara kubhuteero bhwa entundaari ya egishayiri. Ruuti akajobha ngʼorangʼora, akakundukura amaguru ga Bhoaji, akaraara embarika. 8 Mubhutiku gati, Bhoaji akeekyukya na okwitakya! Akanyoora omukari areeri orubhaara rwa amaguru gaaye.
9 Akamubhuurya ega, “Nuuwe owi?” Ruuti akamukyukya ega, “nooni Ruuti omugaya waaho. Ndasabha ungege mbe mukaaho,a kwa okubha uuwe nuuwe omuhiiri waani wa munda.”
10 Bhoaji akamukeerya ega, “Omuhara waani, OMUKURU akunonke! Amajomu gaaho ganú orakora bhoonwego, muruganda rwetu, garakira ga okwamba ganú waakorera Naomi, kwa okubha otatuniri abhamura, bhabhe abhatobhu kasi abhaniibhi mbo bhakutete. 11 Bhoono, otoobhoha, muhara waani. Ndakukorera ryoryonse oreenda, kwa okubha abhantu bha mumugi gunu bhamanyiri ega, uuna enteemo enjomu. 12 Onyoora m-maheene ega, oni m-muhiiri waaho wa munda. Nawe, ariho omusaaja oundi, weeki ngʼo omuhiiri waaho wa munda bhukongʼu, okunkira oni. 13 Bhoono uuwe nuubhe hanu obhutiku bhwa reero, ejo nyenkyo, twakamaahe nyoore yakeekirirye okukutuga, kasi-ha. Nyoore yakeekirirye m-bwaheene. Nawe hanú yakange, m-buheene ndakuriira emuuma embere ya OMUKURU, oni ndakutuga. Kwa ego, uuwe raara hanu okuhikira nyenkyo.”
14 Nho, Ruuti akaraara orubhaara rwa amaguru ga Bhoaji. Ruuti akeemuka hayo, nyenkyo juri, kwa okubha Bhoaji ateendanga omuntu wowonse amanye ega, omukari yaaringa kukibhuga harya. 15 Bhoaji akamukeerya ega, “Ruusya engibho yaaho obharye hansi.” Ruuti akakora ego. Hanú yaabharya, Bhoaji akahuma-ko shayiri njaaru, muna ebhikapo ebhibhiri,b akamwitiikya. Ruuti akahunjuka iika.
16 Mbe, Ruuti hanú yaahika iika, ngʼinabhyara waabho akamubhuurya ega, “Muhara waani, amangʼana gagiiri egaki eyo waari?” Nho, akamukeerya ngʼinabhyara waabho kira ekintu kinú Bhoaji yaamukoreri.
17 Akagendererya okugamba ega, “Bhoaji yangʼeeri shayiri njaaru, muna ebhikapo ebhibhiri, kwa okubha yaagamba ega, ‘Otakutura okuhunjuka kungʼinabhyaara waaho amabhoko masa.’ ”
18 Kimwi Naomi akagamba ega, “Bhoono muhara waani, ganya okuhikira omanye amangʼana gonsego kya ego garaabhe, kwa okubha omuntu uyo, reero atasimbiire, okuhikira hanú araamare amangʼana ganu gonsego.”