Bhoaji aramugabha Ruuti
4
Nho, Bhoaji akagya akeekara mukiita kya okusohera mumugi, ahasi hanú abhantu bheekumanʼyanga. Na omusaaja unú Bhoaji yaaringa agambiri ega, m-muhiiri waaye wa munda wa Erimereeki, akahita haryaharya. Bhoaji akamubhirikira akamukeerya ega, “Murikyaani, njo wikare hanu!” Omusaaja uyo, yaagya akeekara harya. 2 Kweki Bhoaji akabhabhirikira abhantu ekumi, okurwa mubhakaruka bha mumugi gurya, akabhakeerya ega, “Mwikare hanu.” Bhonse bhakeekara.3 Nho, Bhoaji akamukeerya omuhiiri waaye urya ega, “Naomi ahunjukiri okurwa mukyaro kya Moabhu, enú yaaringa amenyeri. Bhoono, areenda okugurya omugunda gwa omuhiiri weetu Erimereeki. 4 Oni nduuji ega, m-bujomu nkukeerye eringʼana rinu. Bhoono nyoore uuwe oreenda omugunda gwabho, orihe ogugege, na ogambe embere ya abhakaruka bhanu na abhantu bhanú bharingi hanu. Nawe nyoore otakugutungurya, ogambe bhoonwego, kwa okubha, uuwe nuuwe oreenderwa ogutungurye. Nyoore tuuwe nooni.” Wonse akakyukya ega, “Ndagurihira oni.”
5 Nho, Bhoaji akagamba ega, “Nawe m-bujomu omanye ega, nyoore nuuwe oraagure omugunda guyo ku Naomi, oramugabha na Ruuti Omumoabhu, omusino wa Mahironi. Hanú oraakore ego, omugunda guyo guratigara kuruganda rwaye.”
6 Omuhiiri uyo, akagamba ega, “Kubhwitegeereri bhwani oni, ntakunagya okuririhira, naho ntaaja okusarya engabho ya abhaana bhaani. Uuwe ogutungurye omwene, oni ntakunagya.” 7-8 Mbe, omuhiiri wa Bhoaji uyo, akakeerya Bhoaji ega, “Bhoono uuwe, gura omugunda guyo.” Kimwi, akaruusya enkeeto yaaye, akamuhaana Bhoaji. (Akare hayo, mukyaro kya Isiraeri eyo, hanú abhantu bheendanga okuguriranʼya kasi okuswenanʼya ebhintu, bhaarenganʼyanga enkeeto. Oumwi yaaruusyanga enkeeto yaaye, arahaana omurikyaye naho okumara ekikorwa kiyo.)
9 Nho, Bhoaji akabhakeerya abhakaruka na abhantu bhonsego bhanú bhaaringa harya ega, “Bheenyu reero, mubheeri abheemiririri bha okumanyiirirya ega, ngegeri okurwa ku Naomi, ebhintu bhyonsego bhya Erimereeki na abhaana bhaaye Kirioni na Mahironi. 10 Okutiga gayo, Ruuti Omumoabhu, omusino wa Mahironi, okurwa reero wonse mmugabhiri abheeri mkaani. Ameekiriranʼyo ganu, garaakore ebhintu na oruganda rwa omuku, bhitigare kubhantu bhaaye, mumugi gunu. Na bheenyu mbo abheemiririri bha gayo.”
11 Kimwi, abhakaruka hamwi na abhantu bhonsego bhanú bhaaringa hayo, bhakagamba ega, “Heene bheetu m-beemiririri. OMUKURU akore omukari unu, asohe owaaho abhe kya Raheri na Reya, abhabhiri bhayo, mbo obhusimuka bhwa abhantu bha Isiraeri. Na uuwe oniibhe kuruganda rwa Efurata, na omanyikane mumugi gwa Bhetereheemu.a 12 Okuhitira kubhaana bhanú OMUKURU arikuhaana okurwa kumukari omuhara uyo, abhahiiri bhaaho bhabhe kya abha Peresi, unú Tamari yeebhurira Yuda.”b
Orwibhuro rwa Bhoaji
13 Kwa ego, Bhoaji yaamugabha Ruuti, akabha omukari waaye. OMUKURU akamunonka Ruuti wonse akagega enda, akeebhura omwana wa ekimura. 14 Nho, abhakari bha mumugi guyo, bhakamukeerya Naomi ega, “Agungibhwe OMUKURU unú akuheeri omuhiiri wa munda wa okukutuga! Na omwana weenyu abhe omukuru, na amanyikane mukyaro kya Isiraeri kyonsego. 15 Omwana uyo, arikutuga hanú origota, kwa okubha yeebhwirwe na omukamwana waaho unú akuhanjiri bhukongʼu na owa obhwera bhukongʼu kuuwe, okukira abhaana bha ekimura muhungati.” 16 Mbe, Naomi akamugega omwana urya, akamuhagata na ngʼo akabha, omureri waaye. 17 Abhakari bhanú bhaaringa abhamenyani bhaaye, bhakagamba ega, “Naomi yaana omwana wa ekimura.” Bhakamutoga eriina ryaye Obhedi.
Kimwi, Obhedi akeebhura Yeese, na Yeese akeebhura Daudi.
18 Runu ndo orwibhuro rwa Peresi:
Peresi yeebhura Hejironi,
19 Hejironi yeebhura Raamu,
Raamu yeebhura Aminadabhu,
20 Aminadabhu yeebhura Nashoni,
Nashoni yeebhura Sarumoni;
21 Sarumoni yeebhura Bhoaji,
Bhoaji yeebhura Obhedi;
22 Obhedi yeebhura Yeese,
na Yeese yeebhura omukama Daudi.