Ruuti arabhoojererya mumugunda gwa Bhoaji
2
Yaaringa-ho omuntu oumwi Bhetereheemu. Omuntu uyo, yaaringa wa oruganda rwa Erimereeki, omusaaja wa Naomi, na eriina ryaye yaabhirikirwanga Bhoaji. Weeki yaaringa omuniibhi bhukongʼu na yaaringa amanyikeeni kubhantu bhonsego. 2 Orusiku rumwi, Ruuti Omumoabhu, yaakeerya ngʼinabhyara waabho Naomi ega, “Ndasabha reero ngende okubhoojererya amasaagyo ga obhuro mumugunda gwa omuntu wowonse unú yakanyikiririrye.” Naomi yaamwikiririrya akamukeerya ega, “Genda, muhara waani.”a3 Mbe, Ruuti akagya mumugunda nyabhurebhe, akaamba okubharwa enyuma abhagesi, arabhoojererya amasaagyo ga obhuro bhunú bhutigeeri. Na eriruguto rikabha ega, yaaringa mumugunda gwa Bhoaji, wa oruganda rwa Erimereeki.
4 Eribhaga ekego, Bhoaji akahika mumugunda harya, okurwa Bhetereheemu, akabhakeeranʼya abhagesi ega, “OMUKURU abhe na bheenyu.” Bhonse bhakamukyukya ega, “Uuwe wonse OMUKURU akunonke.”
5 Kimwi, Bhoaji akamubhuurya omwimiririri wa abhagesi ega, “Kana omuhara uyo, ngʼo wa ewawi?”
6 Wonse akamukyukya ega, “Omuhara urya m-Mumoabhu, unú yaaja hamwi na Naomi okurwa mukyaro kya Moabhu. 7 Yaansabhiri ega, abhoojererye, amasaagyo ga obhuro enyume ya abhagesi gati ya egintundaari. Weeki ahooyeeri mumugunda munu, okwambira nyenkyo okuhikira nyinga ginu bira okumuunya. Nho bhoono, agiiri okumuunya mukihuuna.”
8 Nho, Bhoaji akakeerya Ruuti ega, “Muhara waani nyitegeerera, otagya okubhoojererya amasaagyo ga obhuro mumugunda gwa omuntu oundi, naho obheere hanu. Wikare hanu na abhagaya bhaani abha ekikari bhanu. 9 Maaha omugunda gunú bharagesa, obhoojereryenga enyuma yaabho. Mbakanirye abhamura bhayo, bhatakunyankya. Na amanji ganú abhamura bhayo bhatahiri munsengo gyabho, hanú oreegwenga enyonta, ogye onywe.”
10 Hayo, Ruuti akamwigamira Bhoaji, akahiinya obhusu bhukahika hansi kwa okumusuuka, akamukeerya ega, “N-kwaki unyikiririrye, na unsereenerye oni omugeni?”
11 Bhoaji akamukyukya ega, “Neegwiri amangʼana gonsego ganú waamukorera ngʼinabhyara weenyu, okurwa omusaaja waaho akwe. Mmanyiri kya ego waatiga abheebhuri bhaaho, na ekyaro kyaho, na kya ego waaja okumenya gati ya abhantu bhanú otaaringa obhamanyiri okurwa akare. 12 OMUKURU, Waryubha wa ekyaro kya Isiraeri unú okenyeeri-ko, akuhaane omurembe kugonsego ganú okoreri. OMUKURU akunonke bhujomu.”
13 Kimwi Ruuti akamukeerya ega, “Omukuru waani, ndasabha ogendererye okunyikiririrya kwa okubha unhoorisirye bhukongʼu. Onyoora kora oni ntaringi kya oumwi wa abhagaya bhaaho. Osambaarukirye omutima gwani bhukongʼu.”
14 Eribhaga rya ebhyakurya hanú ryahika, Bhoaji akamukeerya Ruuti ega, “Geniha hanu, njoo turye omukaate hamwi, otongye mudivai.” Kimwi Ruuti akagya harya, akeekara hamwi na abhagesi, na Bhoaji akamuhaana obhuro bhunú bhukarangirwe, akarya, akeeguta, na akatamya. 15 Hanú bhaamara okurya, Ruuti akeemirira kweki, naho okwamba okubhoojererya amasaagyo ga obhuro. Bhoaji akabharagirirya abhantu bhaaye ega, “Mumutige asuntare abhooje kora kuntundaari kuyo, mutamukaanʼya. 16 Kweki hanú muragesa, mugesenga ebhigara ebhindi muratiga kuntundaari giyo, muramutigira arabhooja, mutamukaanʼya.”
17 Mbe, Ruuti akagendererya okubhooja amasaagyo ga obhuro okuhikira kumugoroobha. Akakumanʼya ebhigara bhinú yaaringa abhoojeri, akahuura, akeejurya ekitonga ekinene.b
Ruuti arahunjuka ku Naomi
18 Kimwi, Ruuti akeetiika obhuro bhuyo, akahunjuka mumugi. Hanú yaahika iika, akamoorokya ngʼinabhyara waabho obhuro bhunú abhoojeri. Na yaaringa agegeri na amasaagyo ga ebhyakurya bhinú yeeguta akatamya, akahaana ngʼinabhyara waabho.
19 Mbe, ngʼinabhyara waaye akamubhuurya ega, “Obhoojeri-ha reero? Obhoojeri mumugunda gwawi? Anonkwe omuntu unú akusereenerye!” Nho, Ruuti akamukeerya ngʼinabhyara waabho eguru ya unú akoreri emirimu mumugunda gwaye. Akagamba ega, “Omuntu unú nkoreri emirimu mumugunda gwaye arabhirikirwa Bhoaji.”
20 Kimwi, Naomi akamukeerya omukamwana waabho ega, “OMUKURU amunonke Bhoaji, kwa okubha, OMUKURU atatigiri okoorokya amajomu gaaye ga eginsiku gyonsego kubhantu abhahoru na abhaku.” Kweki akagendererya okugamba ega, “Omuntu uyo, m-muhiiri weetu wa munda, na ngʼo oumwi gati ya bhanú bheenderwanga okututuga.”
21 Kimwi, Ruuti akamukeerya ega, “Kora omuntu urya yaankeerya ega, ‘Ikara hanu na abhagaya bhaani, okuhikira hanú bharimara okugesa obhuro bhwani bhonsego.’”
22 Nho, Naomi akamukeerya Ruuti omukamwana waaye ega, “Muhara waani, m-bujomu okore emirimu hamwi na abhagaya bha ekikari mumugunda gwa Bhoaji, kwa okubha hanú oraakore mumugunda gwa omuntu oundi, oratura okunyankibhwa.”
23 Kwa ego, Ruuti akagya kubhagaya bha Bhoaji, yaabhoojereryanga okuhikira hanú bhaamara okugesa egishayiri na egingano. Na yaaringa areekara hamwi na ngʼinabhyara waabho.