Ekitabho kya
Ruuti
Erimereeki na abhantu bhaaye bharagya Moabhu
1
Akare hayo, abhabhuturi bha ekiina hanú bhaaringa bharatunga ekyaro kya Isiraeri, yeebhuka-mo enjara enduru. Yaaringa-ho omuntu oumwi, okurwa mumugi gwa Bhetereheemu mukyaro kya Yuda. Weeki yaaringa hamwi na omukari waaye na abhaana bhaabho bhabhiri bha ekisaaja, bhaagya okumenya mukyaro kya Moabhu na bhaamenya kwa eribhaga ekego muna abhageni. 2 Omuntu uyo, yaabhirikirwanga Erimereeki na omukari waaye yaabhirikirwanga Naomi. Na amariina ga abhaana bhaabho abhabhiri bhayo bha ekisaaja, gaaringa Mahironi na Kirioni. Bhonsego bhaaringa bha oruganda rwa Efurata bha mumugi gwa Bhetereheemu mukyaro kya Yuda. Hanú bhaahika mukyaro kya Moabhu, bhakaamba okumenya eyo.3 Mbe, Erimereeki, omusaaja wa Naomi akakwa, Naomi akatigara omusino na abhaana bhaaye bhabhiri. 4 Abhaana bha ekisaaja bhayo, bhakateta abhahara bha Ekimoabhu, na amariina gaabho gaaringa Oripa na Ruuti. Hanú bhaamara okuteta, bheekarana na bhamukaabho kwa emyaka ekumi ego, 5 Mahironi na Kirioni bhonse bhakakwa. Kwa ego Naomi akabha akwiriirwe omusaaja waaye na abhaana bhaaye bhonsego bhabhiri.
Naomi arahinda Bhetereheemu hamwi na Ruuti
6 Naomi akeegwa ega, OMUKURUa yaaringa abhanonkeri abhantu bhaaye bha Isiraeri, abhaheeri ebhyakurya. Mbe, weeki akaamba okuseemya orugendo okurwa Moabhu okuhunjuka mukyaro kya Yuda, hamwi na abhakamwana bhaaye bhabhiri. 7 Akarwa harya yaaringa amenyeri, akaamba orugendo okuhunjuka mukyaro kya Yuda na abhakamwana bhaaye.
8 Hanú bhaaringa kunjira, Naomi akabhakeerya abhakamwana bhaaye bhayo ega, “Bhoono, bheenyu kira oumwi ahunjuke kungʼinawaabho. Ndabhasabhira ku MUKURU abhakorere amajomu, kya ego bheenyu mwaringa murankorera oni na abhaana bhaani. 9 OMUKURU abhanonke, kira oumwi weenyu anyoore omusaaja oundi, mugye mwikarane bhwaheene iika owaaye.” Kimwi, Naomi akabhahumbata, akabharaga. Bheeki bhakaamba okukuura kwa eriisi erinene 10 na bhakamukeerya ega, “Tiigo-ha! Turagya bhonsego kubhantu bha ekyaro kyaho.”
11 Naomi wonse akabhatongera ega, “Bhahara bhaani, muhunjuke iika oweenyu, kwaki muranseeta? Oni ntaature okunyoora abhaana abhandi, bhanú bharaabhe abhasaaja bheenyu! 12 Bhahara bhaani, muhunjuke iika kwa okubha oni naagoteri, ntakunyoora omusaaja kweki. Kora nkaagambiri, ndeesiga ega, ndanyoora omusaaja obhutiku bhunu na okwibhura abhaana bha ekisaaja, 13 mukaaganyiri okuhikira bhakiine bhabhe abhantu abhagima? Tiigo-ha, bhahara bhaani! Ndarora obhuturo bhwa OMUKURU bhutaringi hamwi na oni. Kwa ego, niina obhururu bhukongʼu okubhakira bheenyu.”
14 Kweki, abhakamwana bhakaamba okukuura kwa eriisi. Nho, Oripa akamuhumbata ngʼinabhyara waabho akamara akamuraga na okuhunjuka owaabho, nawe Ruuti akamuhumbata na ataamutiga Naomi.
15 Mbe, Naomi akamukeerya Ruuti ega, “Maaha, omukari omurikyaho ahunjukiri kubhantu bhaaye na kumukuru waaye.b Uuwe wonse, omuseete.”
16 Nawe, Ruuti akamukyukya ega, “Otantongera nkutige, kasi ntige okukusoorana! Nawe, kira ahasi hanú oraagye, nho nonse ndagya. Na hanú oreekare, nho nonse ndeekare. Abhantu bhaaho bharibha abhantu bhaani, na Waryubha waaho aribha Waryubha waani. 17 Hanú orikwira na okubhiikwa, nho nonse ndikwira na okubhiikwa. OMUKURU yambuturire ekiina bhururu, hanú ndisarya emuuma yaani. Kitariho ekisigo kinú kiraature okuntanʼya oni na uuwe, hamwi oruku!”
18 Naomi hanú yaarora ega, Ruuti yaamwiri okusoorana nawe enu aragya, akatiga okumutongera ega, ahunjuke. 19 Kwa ego, abhakari abhabhiri bhayo, bhakagenda orugendo, okuhikira bhakahika Bhetereheemu. Hanú bhaahika eyo, abhantu bhonsego bha Bhetereheemu bhakaruguura. Abhakari bhakabhuuranʼya ega, “Heene unu n-Naomi?”
20 Naomi akabhakeerya ega, “Mutige okumbirikira Naomic kweki, naho mumbirikire Mara,d kwa okubha Waryubha wa eginguru yaankoreeri amangʼana ga obhururu bhukongʼu. 21 Eribhaga neemuka hanu, naaringa na ebhintu ebhyaru bhukongʼu. Nawe bhoono, OMUKURU yanhunjukirye amabhoko masa. N-kwaki mumbirikire Naomi, nyoore OMUKURU yaankoreeri amangʼana ga obhururu, na Waryubha wa eginguru yaanyakirye?”
22 Kwa ego, Naomi yaahunjuka hamwi na Ruuti Omumoabhu, omukamwana waaye. Bhaahika Bhetereheemu kubhwambiro bhwa obhugesi bhwa egishayiri.