Ekitabho kya
Ruuti
Obhukangati
Ekitabho kinu kiheerwe eriina rya omukari unú yaabhirikirwanga Ruuti. Weeki yaaringa Omumoabhu. Abhamoabhu, bhaaringa abhamenyani bha abhantu bha Isiraeri. Eramaahikana ega, eribhaga riyo, bhwaringa-ho obhwigwirani obhujomu gati ya ebhyaro bhiyo. Erigano rya ekitabho kinu, riina amangʼana ganú gaakorwa na okwibhuka eribhaga rinú abhabhuturi bha ekiina bhaaringa bharatunga Abhaisiraeri (kumyaka gya 1375-1050 eribhaga Yeesu atareebhurwa). Kwibhaga riyo, ekyaro kya Abhaisiraeri kyaringa kitaratungwa na abhakama. Abhabhuturi bha ekiina bhaaringa abhantu bhanú bhaasorwa na Waryubha, naho, okubhoorokererya Abhaisiraeri okurwana eriihe. Kweki, bhaaringa bharatanʼya ebhiina ebhyaru ku Bhaisiraeri (maaha mukitabho kya Abhabhuturi bha Ekiina 2:10-19).
Ameehigiryo amanene ganú tureehigira okurwa mukitabho kya Ruuti, niiga, eriruguto rya Waryubha n-kubhantu bha ekyaro kyonsego. Waryubha yaamunonka Ruuti na okumukora okubha omwibhuri wa okwamba kuruganda rwa abhakama. Murwibhuro muyo, mmo omukama Daudi yaarwira, eribhaga eritambi hake Yeesu Kiristu wonse akeebhurwa. Mukitabho kinu, obhunyoohu na obhusuuku bhwa Ruuti kuruganda rwa omusaaja waaye bhumanyikeeni. Kweki, m-bujomu bhwa obhuheene bhwa Waryubha kwa okubhatuga abhantu bhaaye eribhaga rya enyanko na okubhahaana eginguru bhanú bhaaringa bharanyanka.