Yakobho arabhiikwa
50
Nho,
Yusufu akeerekera kumubhiri gwa esewaabho,
akaguhuumbata na okugubhusu enu arakuura.
2 Kimwi Yusufu akakeerya abharaguri bhaaye ega,
bhahake omubhiri gwa esewaabho eryogo,
naho gutasarika,
bhonse bhakaguhaka.
3 Yaaringa enteemo ya Abhamisiri okuhaka omuku eryogo naho atasarika,
kwa ego bhaamuhaka kwa eginsiku mirongo ena kwa okubha ngyo gyeenderwanga.
Abhamisiri bhaamufumbira oruku kwa eribhaga rya eginsiku mirongo muhungati.
4 Hanú eginsiku gya okufumba oruku gyahwa,
Yusufu akakeerya abhatongeri bha omukama wa Misiri ega,
“Nyoore muraanyikiririrye,
ndabheesasaama muhaire na omukama eguru yaani.
Mumukeerye ega,
5 ‘Taata yaandiira emuuma akagamba ega,
“Oni ndingi haangʼi okukwa.
Na hanú ndikwa,
oreenderwa umbiike mumbihira inú naasimba mukyaro kya Kanaani.”
Mbe,
ndakusabha unyikiririrye ngye okubhiika taata mmare nhunjuke.’”
6 Omukama akakyukya ega,
“Nuugye obhiike eseweenyu kya ego yaakuriira emuuma.”
7 Mbe,
Yusufu akagya okubhiika esewaabho.
Akagya hamwi na abhakori bha emirimu bhonsego bha omukama na abhatongeri bhonsego bha omukama,
hamwi na abhakaruka bha mukyaro kyonsego kya Misiri.
8 Egoego,
Yusufu akagega abhantu bha owaaye bhonsego,
abhahiiri bhaaye,
hamwi na abhantu bha owa esewaabho.
Abhaana na egintugo ebhyenego,
mbyo bhyatama Gosheni.
9 Kweki,
bhakasoorana na abhariini bha kugifaraasi na egimatoka gya okurutwa na egifaraasi,
bhaaringa omuganda omunene bhukongʼu.
10 Hanú bhaahika kukibhuga kya okuhuurira obhuro,
kinú kyabhirikirwanga Atadi,
ngʼambu ya oruuji rwa Yorodani,
bhonsego bhakabha bharamukuurira Yakobho kwa obhururu bhukongʼu.
Yusufu akafumbira esewaabho oruku,
kwa eribhaga rya eginsiku muhungati.
11 Abhakanaani bhanú bhaaringa bhamenyeri hayo,
hanú bhaarora kya ego oruku rwaringa rurakoreka kukibhuga kya Atadi,
bhakagamba ega,
“Obhufumbi bhwa oruku rwa Abhamisiri bhunu,
n-dunene bhukongʼu!”
Ego,
ahasi harya bhakahatoga ega,
Abheri-Abhamisiri,
a haringi ngʼambu ya oruuji rwa Yorodani.
12 Kwa ego,
abhaana bha Yakobho,
bhaamukorera esewaabho kya ego yaaringa abharagiriirye.
13 Bhaamuhira mukyaro kya Kanaani,
na okumubhiika mwisana rinú ryaringa mumugunda gwa Makipera,
haangʼi na Mamure.
Omugunda guyo,
Abhurahamu yaagugura ku Efuroni Omuhiti,
naho habhenga ahasi ha okubhiikira abhantu bhaaye.
14 Yusufu hanú yaamara okubhiika esewaabho,
akahunjuka Misiri na abhahiiri bhaaye hamwi na abhantu abhandi bhonsego.
Yusufu arateremya abhamura bhaabho
15 Hanú obhufumbi bhwa oruku rwa esewaabho rwahwa,
abhamura bhaabho Yusufu bhakeegambira ega,
“Hamwi Yusufu araatujimire kumabhiibhi ganú twamukorera,
na areende okuriha ekisiiyomba!”
16 Kwa ego,
bhakatumira Yusufu amangʼana ega,
“Hanú taata yaaringa akyari okukwa,
yaaragirirya ega,
17 ‘Mukeerye Yusufu ega,
ndakwisasaama waabhire abhamura bheenyu,
amabhiibhi gonsego ganú bhaakukorera.’
Bhoono,
turakwisasaama otwabhire obhusarya bhwetu,
abhagaya bha Waryubha wa eseweenyu.”
Hanú Yusufu yeegwa amangʼana gayo,
akakuura.
18 Kimwi abhamura bhaabho bhakamuseeta,
bhakeehiinya okuhikira hansi,
bhakagamba ega,
“Maaha,
bheetu m-bagaya bhaaho!”
19 Nawe Yusufu akabhakyukya ega,
“Mutoobhoha,
oni ntaringi Waryubha.
20 Bheenyu mweendanga okunkorera amabhiibhi,
nawe Waryubha yeendanga gakorwe amajomu,
naho abhantu abhaaru bhatuuribhwe kya ego reero murarora.
21 Mbe,
bhoono mutoobhoha!
Oni ndaabhahaanenga ebhyakurya hamwi na abhaana bheenyu.”
Akabhahorisya na okuhaira nabho bhwaheene.
Oruku rwa Yusufu
22 Yusufu akagendererya okwikara Misiri hamwi na orwibhuro rwa esewaabho ronsego.
Weeki yeekara emyaka egana rimwi na ekumi.
23 Akarora abhaana bha Ifurahimu okuhikira ebhiijimbiri.
Kweki akarora abhaana bha omwijukuru waaye Makiri,
omwana wa Manase.
24 Kimwi,
Yusufu akakeerya abhahiiri bhaaye ega,
“Bhoono oni ndingi haangʼi okukwa.
Nawe,
maheene Waryubha ariija okubhabheera okurwa mukyaro munu,
na okubhahira mukyaro kinú yaaraga okuhaana bha Abhurahamu,
Esaaka na Yakobho.”
25 Nho Yusufu akabhariira emuuma abhaana bha Isiraeri ega,
“Maheene Waryubha aribhabheera,
na bheenyu muriija okugega amaguha gaani okurwa enu.”
26 Ego,
Yusufu akakwa,
yaana emyaka egana rimwi na ekumi.
Bhakahaka omubhiri gwaye eryogo naho gutasarika.
Bhakagutuura mwisandiko Misiri eyo.