Yakobho aranonka abhamura bhaaye
49
Nho,
Yakobho akabhirikira abhaana bhaaye,
akabhakeerya ega,
“Mwikumanʼye bhonsego mbakeerye ganú garibhanyoora,
kuginsiku ginú giraaja.
2 “Bheenyu abhaana bha Yakobho,
mwikumanʼye mwigwe,
munyitegeerere eseweenyu Isiraeri.
3 “Uuwe Rubheni,
nuuwe omutangi waani,
eginguru gyani,
na erisumo ryani rya okwamba rya eginguru gyani.
Uuwe okiriri abhamura bheenyu bhonsego kwa obhukuru na eginguru.
4 Uuwe m-musikya kya amanji ga obhusiki,
otakubha omukuru kweki,
kwa okubha waariina kubhuriri bhwani,
oni eseweenyu na okaraara na mukaani!a
5 “Simeoni na Raawi m-bamwi kukukora amabhiibhi,
egimpanga gyabho m-bigwato bhya okukorera amabhiibhi.b
6 Nawe,
oni ntahimbane hamwi nabho kuniku yaabho,
ntagwatane na ebhiikaro bhyabho,
kwa okubha,
kwa enkoro yaabho bheeta abhantu,
na kwa obhurabhankanu bhwabho,
bhaabhutura emiki gya egingʼombe.
7 Enkoro yaabho ihiimwe,
kwa okubha yaaringa enhaari bhukongʼu,
na enkoro yaabho etaana ekyabhira.
Ndibhagabhanʼya na okubhanyaraganʼya mukyaro kya Isiraeri.
8 “Uuwe Yuda!
Abhamura bheenyu bharikugungya,
orirwana na abhasigu bhaaho na okubhahiga.
Abhamura bheenyu bharikutemera ebhiru,
bhakuhiinyire obhusu bhukahika hansi.
9 Yuda omwana waani,
uuwe n-kya omwana wa endwi
unú amariri okurya entyenyi na okwimuka.
N-kya endwi inú arajobha na okwiraarya hansi,
N-kya endwi enkari,
niwi araasakye okuibhuukya?
10 Engʼimbo ya obhukama etarirwa ku Yuda,
na engʼimbo ya obhutungi eritama kwikabhira ryaye,
okuhikira hanú ariija omukama,
unú ebhyaro bhyonsego bhirimwigwa.
11 Aribhoha entikiri yaaye kumujabhibhu,
na ekimoori kya entikiri kwisagi rya omujabhibhu erinyeregetu.
Arifura emyenda gyaye kwa amanji ga edivai,
na eginkanju gyaye kwa edivai enkangaaru.
12 Ameeso gaaye garibha amakangaaru kwa edivai.
Na ameeno gaaye garibha amarabhu kwa amabheere.c
13 “Jabhuroni arimenya kumurambo gwa enyanja,
na ahasi hayo,
haribha ekigobho kya amaato,
na orutunga rwaye ruribhanga rubhateeni na ekyaro kya Sidoni.
14 “Isakari n-kya entikiri ya obhuturo,
ereeraarya gati ya emijigo gyaye.
15 Arirora ega,
ahasi ha okumuunyira n-hajomu,
na ega,
ekyaro n-kijomu,
arihiinya eririko rwaye okugega emijigo,
aribhanga omukori wa emirimu emikongʼu.
16 “Daani aribha omubhuturi wa ekiina wa abhantu bhaaye,
kya oumwi wa amakabhira ga Isiraeri.
17 Daani aribha omuke kya enjoka ya obhusungu,
embarika wa enjira,
inú eraruma ebhisugururo bhya egifaraasi,
naho unú ariiniri kugifaraasi agwe bhugarame.
18 “Ee OMUKURU,
ndaganya obhutuurya bhwaho.
19 “Gadi arirwanibhwa na omuganda gwa abheeti,
nawe,
weeki aribharwira enyuma,
na abharwanʼye na okubhahiga.
20 “Ekyaro kya Asheri kiriruusya ebhyakurya ebhyaru na ebhijomu bhukongʼu,
wonse aribhanga araruusya ebhyakurya ebhijomu bhinú bhirangʼarira omukama.
21 “Nafutari n-kya ekibharahe ekikari,
kinú kireeyagaara,
kyeki kireebhura abhaana abhajomu.
22 “Yusufu n-kya omuti gunú guraama emisumo,
embarika wa ekisekaani,
amasagi gaaye gararanda kundigi.
23 Abharasi bha emisimu bharimurwanʼya bhukongʼu,
bharimurekerera emisimu na okumunyankya.
24 Nawe,
obhuta bhwaye bhuritama bhukyanagiri,
na amabhoko gaaye garyongeribhwa eginguru,
kwa obhuturo bhwa Waryubha wa Yakobho,
kuriina rya omuriisya,
Eritare rya Isiraeri,
25 kwa ekisigo kya Waryubha wa eseweenyu unú arakubheera,
Waryubha wa Obhuturo bhonsego arikunonka,
onyoore enonkwe ya embura okurwa murwire,
enonkwe ya amanji ga munsi wa erirobha,
enonkwe ya amabheere na enda ya orwibhuro.
26 Enonkwe ya eseweenyu ni-nene okukira eginkuku gya koko.
Eginonkwe gyani gibhe eguru yaaye,
weeki omutungi gati ya abhahiiri bhaaye.
27 “Bhenjamini n-kya ensuuji enduru ya mwisisi
nyenkyo erarya bhinú ebhwimiri,
na kumugoroobha eragabhanʼya bhinú egwatirye.”
28 Gayo ngʼo amakabhira ekumi na gabhiri ga Isiraeri.
Gayo ngʼo Yakobho yaabhakeerya hanú yaaringa arabhanonka bhonsego,
akahaana kira oumwi enonkwe kya ego yeenderwanga.
Oruku rwa Yakobho
29 Kimwi,
Yakobho akaragirirya abhaana bhaaye ega,
“Oni ndingi haangʼi okukwa na ngwatane na bhajaaji bhaani.
Mumbiike hamwi na bhataata,
mwisana rinú riringi mumugunda gwa Efuroni Omuhiti,
30 mumugunda gwa Makipera,
haangʼi na Mamure,
mukyaro kya Kanaani.
Erisana riyo,
ndyo Abhurahamu yaagura ku Efuroni Omuhiti,
naho abhenga arabhiikira-mo abhantu bhaaye.
31 Mwisana muyo,
mmo Abhurahamu na omukari waaye Saara,
bhaabhiikwa,
na mmo Esaaka na omukari waaye Rebheka,
bhaabhiikwa.
Kweki mmo naabhiika Reya.
32 Omugunda guyo,
na erisana ryendemo bhyagurwa ku Abhahiti.”
33 Yakobho hanú yaamara okuragirirya abhaana bhaaye,
akahunjukya amaguru gaaye kubhuriri,
akakwa na okuhimbana hamwi na bheesewaabho.