Obhwambiro 48

Yakobho aranonka abhaana bha Yusufu

Hanú gayo gaahwa, Yusufu akakeeribhwa ega, “Eseweenyu m-murweri.” Ego, akagega abhaana bhaaye bhabhiri, Manase na Ifurahimu, akagya nabho hamwi kwisewaabho.

2 Hanú bhaahika, Yakobho akakeeribhwa ega, “Omwana waaho Yusufu, yaajiri okukurora.” Nho, akeekongʼererya, akeekara kubhuriri. 3 Akakeerya Yusufu ega, “Waryubha wa Obhuturo bhonsego, yaanyibhukira hanú naaringa Ruju, mukyaro kya Kanaani, akannonka. 4 Akankeerya ega, ‘Maaha, ndikukora obhe na orwibhuro orwaru, na ndiroongerya okuhikira rubhe ebhyaro ebhyaru. Orwibhuro rwaho rurigabha ekyaro kinu koko!’” 5 Yakobho akagendererya okugamba ega, “Abhaana bhaaho abhabhiri Ifurahimu na Manase, bhanú weebhurira Misiri hanu, eribhaga ntaraaja, ndabhabhara okubha abhaani kya Rubheni na Simeoni. 6 Nawe, abhandi bhanú oriibhura, bhayo mbo bharibha abhaaho. Na engabho yaabho erirwa ku Ifurahimu na Manase abhamura bhaabho. 7 Hanú naahunjukanga okurwa Padani-Aramu, nkagwatwa na ekisurumbaro, kwa okubha ngʼina weenyu Raheri, yaakwira kunjira mukyaro kya Kanaani. Eribhaga riyo, twaringa haangʼi okuhika mumugi gwa Efurata. Nho nkamubhiika embarika wa enjira ya okugya Efurata.” Eginsiku ginu omugi guyo, gurabhirikirwa Bhetereheemu.

8 Mbe, Yakobho hanú yaabharora abhaana bha Yusufu, akamubhuurya ega, “Bhanu m-bawi?” 9 Yusufu akamukyukya ega, “Bhanu m-baana bhaani, bhanú Waryubha yaangʼaana enu.” Yakobho akagamba ega, “Bhasuntarye hanu, ndeenda okubhanonka.” 10 Ameeso ga Yakobho gataaringa gararora bhwaheene, kwa okubha yaaringa agoteri. Yusufu akasuntarya abhaana bhaaye kwisewaabho, kimwi Yakobho akabhabhusu na okubhahumbata. 11 Kimwi akakeerya Yusufu ega, “Omwana waani, ntaamanyanga ega, nkaakuruuji kweki, nawe bhoono, Waryubha yangʼeeri omweya okurora kora abhaana bhaaho.”

12 Nho, Yusufu akaruusya abhaana bhaaye okurwa kumaru ga Yakobho, kimwi akatema hansi ebhiru, akahiinya obhusu bhukahika hansi, kwa obhusuuku. 13 Yusufu akagega kweki abhaana bhaaye abhabhiri bhayo, Ifurahimu mukubhoko kwaye kwa obhuryo, akamubhatya kukubhoko kwa obhumosi kwa Yakobho na akagega Manase na okubhoko kwaye kwa obhumosi, akamubhatya kukubhoko kwa obhuryo kwa Yakobho. Akabhasuntarya kujaaji waabho. 14 Nawe, Yakobho akeenura okubhoko kwaye kwa obhuryo, akakutuura kumutwe gwa Ifurahimu, onyoora ngʼo yaaringa omuke. Na okubhoko kwaye kwa obhumosi, akakutuura kumutwe gwa Manase, onyoora ngʼo yaaringa omutangi.

15 Nho, Yakobho akanonka Yusufu, aragamba ega,

“Waryubha unú bhataata, Abhurahamu na Esaaka bhaaringa bharamusuuka,

Waryubha unú yaabha omwangarariri wa obhumenyi bhwani okuhikira reero,

16 Maraika uyo, unú yaantuurya kumabhiibhi gonsego,

weeki abhanonke abhamura bhanu.

Bhabhenga bharabhirikirwa kwa eriina ryani,

na kwa amariina ga bhataata, Abhurahamu na Esaaka.

Bhaaruhe bhukongʼu mukyaro.”

17 Yusufu hanú yaarora esewaabho aratuura okubhoko kwaye okuryo kumutwe gwa Ifurahimu, ateeyigwa bhwaheene. Ego, akagwata okubhoko kwa esewaabho, akakuruusya kumutwe gwa Ifurahimu, naho akutuure kugwa Manase. 18 Akakeerya esewaabho ega, “Taata otakora ego, unú aringi obhuryo ngʼo omutangi. Ndakukomererya, otuure okubhoko kwaho kwa obhuryo, kumutwe gwaye.” 19 Nawe, esewaabho akaanga, akagamba ega, “Mmanyiri omwana waani, mmanyiri. Orwibhuro rwa Manase ronse ruribha orwaru, na wonse aribha omukuru. Nawe, Ifurahimu omuke wa Manase, aribha omukuru okumukira. Na orwibhuro rwaye, ruribha ebhyaro ebhyaru.” 20 Kwa ego, orusiku ruyo, Yakobho akabhanonka aragamba ega,

“Abhantu bha Isiraeri bharibhanga bharanonka abhantu kwa amariina geenyu,

Bharigambanga ega, ‘Waryubha akukorere amajomu kya Ifurahimu na Manase!’”

Kwa amangʼana gayo, Yakobho yaamukora Ifurahimu, abhe omukuru okukira Manase.

21 Nho, Yakobho akakeerya Yusufu ega, “Omwana waani, ndingi haangʼi okukwa, nawe, Waryubha aribhanga hamwi na bheenyu, aribhahunjukya mukyaro kya bhajaaji weenyu. 22 Bhoono uuwe, ndakuhaana ahasi ahamwi ahandi, okukira abhamura bheenyu. Ndakugabhira ekyaro kinú naaruusya Abhaamoori kwa egimpanga na obhuta bhwani.”