Jakob
1
Mui Jakob, Itchioror ar Probu Jisu Kristor banidaji. Jadtuno sere baro jad settera oionde sigunore mui salam janei nei legongor.Dug-hosto Ar Bhulona
2 Oh bheilog, tumi nanan dhoronor porikkiet porilie, sieni begkani hujhi hoda bili mone gorsio. 3 Tumi hobor po tomar bischiaschan porikkiet porilie dhorjio ane. 4 Tumi puro obartei ar puripunnuo obartei, dhorjiogane tar haman purei pebo. Sebeden tomar hitchu pora odo noi. 5 Tomartun judi huno jone gyen pora oi, the Itchiorottun magok, no gobpie gori Itchiorbuoi begkunore alajhala gori dede sibiei sien tare dibo. 6 Monot shiongshama gori no maginei hintu the bischias gorinei magok. Haron jar monot shiongshama thai, the olode sagoro pani-tubolan boiere jindi pai nejaidie sieno dogkie. 7 Je shiongshamagan monot ragai, the Probuttun huno ekkan pebo gori no bhabibo. 8 Sei manuschune jar dien mon, the jien gorto sat thik noi.
9 Jei bheibuo niroit, the dangor podobi phele bhaggottie bili nijore-nije mone gorog. 10 Ar thagoiebuoi niroit oleio hujhi ok. Haron thagoiegun jharbuo phul phudinei jhuri poronde dogkie obak. 11 Haron belan gorom gori udiboio herani shugei pelai ar phulun jhuri poron. Sebeden phulunor doulan nosto oi jai. Sedogkie gori thagoie manuschuneio tharar hamanot nosto obak. 12 Je porikkiegan thori thei pare, the hoballie. The thori thei parsie hinottei, the jibono raj-tukkuo pebo, Probuie soittio dede jigune tare hos pan, sigunore siennie raj-tuk dibode sibie the pebo.
13 Pabo bhulot pole huno jone no hodok, “Itchiore more pabot pheleibartei bhuleie.” Haron Itchiore harore bojonggoi pabot pheleibartei bhulei no pare, ar the nijeio harore pabot pheleibartei no bhuloi. 14 Hintu prottiek jone pabo bhulot poronde sien olode, jokkene tharar nijor lubbogane tani nejai ar sebeden dhora poron. 15 Lubbogan jormeile, siene pabpan jormei de. Ar pabpan dangor ole, moranagan dage.
16 Oh mor agojor bheilogkun, tomare huno jone no thogadok. 17 Prottiek gom boksit ar puripunnuo dan ugurottun eje. Sieni sorgo phoranir Babpuottun lamonnie eje. Shaba dogkie the huno din no bodole. 18 Soittio hodagano darai tar nijor ischiei Itchiore amare jormo die. The sristi gorsiede sienor ek dhoronor polim pholluo ami obartei the amare jormo die.
Sunona Ar Gorana
19 Oh mor agojor bheilogkun, senottei, jhadi suinnio, lare gori mattio, ar jhadi rak no tullio. 20 Haron rakkandoi Itchioro pobitrogan ham no sole. 21 Senottei, beg gom noi ani ar odorbara bojongani ek huredi tho. Niroit oinei tomare bhoreidie hodagan lo. Sei hodagane tomar aptagun rokkie gori paribo.
22 Bana hodagan suninei no gorilie, tumi nije-nije thogiba. Hodagano doge-dogeio gorsio. 23 Ek jone judi hodagan suninei sei doge-doge no gore, the olode ek jon manjie tar jormo lokke elode muon anat saidie dogkie. 24 The tar muon seinei jeiegoio tar dogkan the puri phellie. 25 Hintu je shadin paidie puripunnuo nioman seinei eksottie palai, ar the suninei puri no pelai, hintu haman gore, the gorede hamanit the hujhi obo.
26 Tomar moiddiettun ek jone judi the dharmig holai, hintu the tar jilan no domai, sei Manuschuoi tar monanore thogai. Tar dhormogan moillio nei. 27 Hintu je bab-ma mora-shawh ar rani-miliegunore tharar hosto lokke sai, ar the songsaro bodnam-binnamortun sarsie gori thai. Bab Itchiorbuoi edogkie dhormo hati ar bojong sibier nei bili maniloi.