Kristor Thiek shigaran
Leik Adana
2
Senottei, Kristor iot judi tomar utsaho thai, hospanar darai shantonagan thai, Aptabuoloi song pora-pori thai, hos pa-pi thai, ar sit puro-puri thai, 2 ekkui mon oinei, ekkui hospanaloi, ega mone ega sintie mor hujhigan purei duo. 3 Aguttie monandoi bah phodaniloi hitchu no gorsio. Hintu apta doye monandoi ek jone aro ek jonore sorman gora-gori gorsio. 4 Prottiek jone bana nijor labpan no togeinei, hintu oinnio jonor labpanio togei duo.5 Jisu Kristor monan tomareo tha poribo. 6 The Itchioro allien-gandoi elo. Itchiorloi soman obartei sien hari lona mone no gore. 7 Hintu the nije tar shobidieni gorinei, banidaji dogkie oinei the shadoron manjior dogkie oinei ejchie. 8 Ar manjior dogkie oinei the nije niroit oie. More song hoda manie oinei kroschanotio morsiegi. 9 Senottei, Itchiore tare shanggadik mohima gorinei tare ekkan nang thoi die, jien begkunor nanganittun dangor. 10 Senottei, Jisur nange sorgot, pittimir ar norogot agonde begkune adhu pari pebak. 11 Ar prottiek manjior jilaniloi Jisu Kristo Probu bili haam heinei Bab Itchiorore baini goribak.
Songsarot Thara
Dogkie Jolana
12 Senottei, Oh mor agojorun, bana mor mujungot noi hintu mor abitjoneio onsur mor hoda tumi mano hinottei, dore girgirei-girgirei tomar nijor muktigan hameio. 13 Haron Itchiore tomar iot tar ischie doge ar the gom paidie doge ham gora bajei de. 14 No budbudeie gori ar torga-torgi no gorsie gori begkani goro, 15 jene tumi duj di no parsie ar hoti no gorsie oinei, ei bojong ar pabi jugkuot duj di no parsie oinei Itchioro puo awh para. Tumi tharar moiddie songsarot potpottie thara dogkie joliba. 16 Mui magana magana no adong bah hadoni no gorong bili Kristor dinnuot mui hujhi ong para Jibonor hodagan shokto gori dori thago. 17 oi, judio more haidie jinij dali pujot duonde dogkie gori dileio ar tomar Bischiasor hamot lagei dileio, mui hujhi ar mui tomar begkuno ugure hujhi. 18 Thik sedogkie gori, tumio hujhi oinei mor ugure hujhi awh.
Timothi Ar Epaphrodita
19 Probu Jisur iot mor asha age jei mui tomar sombonde hobor pebartei Timothire tomar idu jhadi gori padei dim, jene mui tomar obostani hobor phele, mor utsaho bare. 20 Haron Timothi dogkie tomar sombonde gome-dalei sintie gorie mor huno jon nei. 21 Jisu Kristor hamanir sintie no gorinei, begkune nijor sintie goron. 22 Hintu tumi tar sorittrogan proman peio. Haron gom hoboranot the babo loge puoi ham gorede dogkie gori ham gorsie. 23 Senottei mor hi oi seinei, mui tare jhadi gori tomar idu padei dim. 24 Probu iot mor asha age, mui nijeio jhadi gori tomar idu eim.
25 Hintu mui mone gorong, Epaphroditare tomar idu padei dena dorkar. The mor bhei, eksomare ham gorie ar mor loge eksomare soinnior ham gorie. The olode tomar hoborbuo ar mor dorkarieni gori diebuo. 26 The tomar begkunore dhap gori-gori age. The aw-sug oie bili tumi suinnio hinottei the sintiet porsie. 27 Haron the aw-sug oinei perai moribar oie. Hintu Itchiore tare doye gorsie, bana tare noi, moreio, a no ole mor mono dugo ugure dug olun. 28 Senottei bes mui tare aghos gori padei dilung, jene tumi tare degilie hujhi awh para ar mui hom mono dugot no thang para. 29 Senottei Probu iot tare hujhi gori gojhi loio, ar tar dogkie manjiore sorman gorsio. 30 Haron the tar jibonan jotton no gorinei, the mor pokke tomar bagi haman gori didede Kristor hamanottei the perai moribar oie.