Apostolune Paulare
Mani lolak
2
Sebeden soiddio bojor porendi, Barnaba somare mui aro Jerusalem song jeiong. Mor loge Titareo mui nejeiong. 2 Prosar gori mui jeinei, Be-jadtunor moiddie mui prosar gorongge gom hoboran tharare janei duonggoi. Hintu mui sien murubbigunor sidu gubone janei duonggoi, adikkie mui brithai gori dumursiong bah brithai gori dumurong bilinei. 3 Tobuio, mor loge elode Tita, the Grik manus oi theleio, tare sundu-sam habi dena baddio no goron. 4 Ien oiede haronan olode hoiek jon nogoli bheilogkun gubone bhoreiondi. Thara guptosor ijebe sube-sabe einei, Kristor Jisur iot amar shadinan seiondi jene thara amare bondit phelei paron. 5 Ami tharar sidu ek ghontaio gojei no di, jene gom hoborano soittiogan tomar iot onsur thai.6 Hintu murubbi gujoror sigunottun ole, thara jei odak sat, mortei huno eitzabor nei. Itchiore harore nijor aguttiegan no degai. Murubbi gujoror sigune more hitchu baledo hoda barei no duon. 7 Hintu sei bodoli, sundu-sam happieguno sidu prosar goribartei Pitorore die oiede dogkie gori, sundu-sam no happieguno sidu gom hoboran prosar goribartei more die oiede thara degkuon. 8 (Haron sundu-sam happieguno sidu Pitoror apostolo haman je gorsie, sieno dogkie gori Be-jadtuno sidu mor iot the ham gorsie.) 9 Jakobe, Kepha ar Johone jigun olakke haam, thara bujilakke doyegan more die oie. Thara more ar Barnabare song pora-porir den adtan amare duon, jene ami Be-jadtuno sidu jei para ar sundu-sam happieguno sidu thara jan para. 10 Tharattun mone hoiede ami bana goribpunore monot rageidong, ar sien goribar mortunio baari mone hoi.
Paulai Pitoror Biruddie Olo
11 Pitore jokkene Antiok sohorot lungilogi, mui tar biruddie thiei udilung, haron tare duj dibar goribar age. 12 Haron Jakobottun hoiek jon ebar agendi, the Be-jadtuno somare haba-daba gorto. Hintu thara einei, sundu-sam happiegunore dorenei the tharattun jeinei nije-nije pharok gori roiegoi. 13 Ar bagi Judai manuschuneio tar phagaraganot mijeilak. Senottei Barnabareo tharar phagarane thani nejeilo. 14 Hintu gom hoborano soittioganot thara uju gori no solon bili mui deginei, tharar begkuno mujungot Pitorore mui holung, “Tui Judai manus oineio tui judi Be-jadtuno doge thas, ar Judai manjior doge no thas, Be-jadtunore hittei tui Judai manuschuno doge tha bajei duos?
15 “Ami daw eneio Judai manus, ar Be-jadtunor pabi noi. 16 Ami hobor pei, jei ek jon manus hamor niomo onusare dharmig gona no oi, hintu Jisu Kristo iot bischiaschano darai dharmig gona oi. Hamo niomo darai noi, hintu Kristo iot bischiaso darai dharmig gona obartei amio Jisu Kristore bischias gorsei. Haron hamo niomo onusare harore dharmig gona no obo. 17 Kristo iot ami dharmig gona obartei togeir hinottei, ami nijeio pabi bili hobor pelong. Senottei, Kristo pabir dajibuo ni na? Hamakkai noi. 18 Haron mui bhangi phellie jinijchani mui judi aro banang, mui nije niom bhonggo gorie om. 19 Haron Itchiorottei mui bajong para, niomo onusare niomanottei mui morsiong. 20 Kristo somare more krosot die oie, ikkie baji agongge sibie mui noi ar, hintu Kristo mor iot baji age. Heyedi ikkie baji agongge jibonan olode, more hos peinei the nije mortei dede Itchioro Puobuo iot bischiaso darai baji agong. 21 Itchioro doyegan mui ek huredi no thong. Haron judi dharmigkan niomo darai eje, salen Kristo brithai gori morsie.”
Bischias,