Gālātio
1
Mui apostol Paula, manjiortun ar manjior darai mui apostol noi, hintu Jisu Kristor darai ar Jisure morattun jiei tulliede Bab Itchioro darai mui olungge ek jon apostol. 2 Mor loge agonde beg bheilogkundoi, Galatia rejjiot agode mondoligunore legongor.3 Bab Itchiore ar amar Probu Jisu Kristoi tomare doye ar shanti duok. 4 Amar Bab Itchioro ischie doge, ei bortoman bojong jugkuottun The amare uddhar goribartei, amar pabpanittei Jisu Kristoi the nijore-nije die. 5 Amar Bab Itchiorbuor umore-umor mohima ok. Amen.
Oinnio Gom Hobor
Sombonde Uijkar
6 Kristor doyeganot tomare dakkiede Sibiettun tumi edok jhadi gori judo gom hoboranot pharok oi joulloi bili mui asarjio olung. 7 Sien judo noi, hintu hoiek jone tomare jagulug gorton. Thara Kristor gom hoboran bodoli didak san. 8 Hintu judi ami oi bah sorgottun sorgo-dude ok, ami tomare prosar gorsei die bara aro oinnio gom hobor tomar idu prosar gorilie the obisab hok. 9 Agendi ami tomare hoieidie doge mui aro hongor, tumi peiode gom hoborano bara oinnio gom hobor tomar idu prosar gorilie the obisab hok.
10 Haron mui manjiore mana bajei duongor, nahi Itchiorore mana bajei duonggotte? Nahi mui manjiore hujhi goribar sangge? Haron mui judi ejosong manjiore hujhi goribar sang, mui Kristor banidaji odung noi.
Apostol Obartei
Paulare Daga Oie
11 Bheilog, mui tomare janei duong, mui prosar gorsiongge gom hoboran manjior doge noi. 12 Haron ei gom hoboran manjiortun mui no pang. Manjieio more ien no shigan, hintu ei gom hoboran Jisu Kristoi dega denar darai mor idu ejchie. 13 Haron mui agendi Judaiunor dhormot thagode jei ijebe roiong sieni tumi sunnio. Itchioro mondolibuore mui shanggadik uttiesar gorsiong ar sien dongso goribartei sesta gorsiong. 14 Mor amolot nijor jadot onek manjiortun bes gori mui Judaiunor dhormot akkol elung. Mor Purbo-puruschununor dosturani adeibartei mui shanggadik utjogi elung. 15 Hintu Itchiore more mar gorbhottun nokbhaj gorsie. Tar doyer darai the more dakkie. 16 Be jadtunor sidu tar sombonde mui prosar goronggoi para, tar Puobuo mor iot degeie. Sien jogon-togon manjiorloi mui alab no gorong. 17 Mor agendi apostol elakke sigundoi alab goribartei mui Jerusalem sohorot no jang. Hintu Arabia dejot jeiong ar sittun Damaska sohorot aro phiri ejchuong. 18 Sebeden tin bojor porendi, Pitorloi dega obarlottei mui Jerusalem sohorot jeiong ar tar loge pondoro din roionggoi. 19 Probur bheibuo Jakob bade oinnio huno jon apostol mui no degonggoi. 20 Ikkie mui tomare legongotte sienir sombonde sawh, Itchioro mujungot mui gal no madongor. 21 Sei porendi, Syria ar Kilikia rejjioganit mui jeiong. 22 Judea dejot, Kristo iot elakke mondoligune mor muon no degon. 23 Bana thara mor sombonde suinnionde, “Agendi amare uttiesar gorsiede sibiei the ekbar dongso goribar sesta gorsiede bischiaschan, ikkie the prosar gorer.” 24 Mortei thara Itchiorore baini gorsion.