Kristor Jiei Uduonagan
15
Bheilog, mui tomar idu prosar gorinei tumi jien loinei dori agode gom hoboran tomare idot tuli dibar sang. 2 Ei gom hoborano darai tumi mukti peio. Judi mui tomar idu prosar gorsiongge hodagan shokto gori dori no thago, tumi bischias gorsiode sien brithai obo.3 Haron mui peiongge sien tomare begkunore mui proman duong. Sien olode Sastroie hoiede doge Kristo amar pabpanittei morsie. 4 Ar Sastro doge tare gareion, ar tin dino dijiet tare aro jiei tulo oie. 5 Kepha sidu ar baro jon apostolo sidu the dega diegoi. 6 Sei porendi, ekkubare pas shot jonottun bes bheilogkuno sidu dega diegoi. Tharar moiddiettun beg bhag ejosong baji agon, ar hoiek jon ghum jeion. 7 Sei porendi, Jakobo sidu The dega diegoi. Sebeden beg apostoluno sidu The dega diegoi. 8 Bego jere, the mor iduio dega diegi, be-somoie jormeiongge sibie idu.
9 More apostol daganaio lak noi. Haron Itchioro mondolire mui dug-hosto lageiong hinottei, beg apostolunottun bes aw-gunorbuo olungge mui. 10 Hintu Itchioro doyet darai mui edogkie olung. The more doye gorsiede sien brithai no oi. mui tharar begkunottun bes hadoni gorsiong. Hintu hadoni gorsiebuo mui noi, Itchioro doyegan mor loge hadoni gorsie. 11 Senottei, jei odosat, mui ong bah thara odog prosar gorsei ar tumi sien bischias gorsio.
Mora Manuschunor
Jiei Uduona
12 Morattun Kristore jiei tulona-gan ami prosar gori. Ami prosar gorilie io, tumi hoiek jone morattun jiei no udibag hingori ho? 13 Hintu judi morattun jiei uduonagan no thele, salen, Kristoreio jiei tulo no oi. 14 Kristore judi jiei tulo no odo, salen amar prosaran labnei, ar tomar bischiaschano lab nei. 15 Sei bara, Itchioro sombonde ami shakki dilongge Kristore jiei tulo oie. Hintu judi moragun jiei no uduon, salen Itchiore Kristore jiei no udilun. Sien judi soittio ole, salen manjie hobor pebakke Itchioro sombonde ami mijie shakki dir. 16 Haron judi moragun jiei tulo no ole, salen Kristoreio jiei tulo no oi. 17 Judi Kristore jiei tulo no oi, tomar bischiaschan moillio nei ar tumi ejosong pabot pori ago. 18 Ar Kristo iot jigun morsion thara nas oion. 19 Bana ei hale judi Kristo iot amar asha thai, salen ami begottun sitpure para.
20 Hintu ikkie Kristore morattun jiei tulinei, ghum jadonde sigunor polim pholluo olo. 21 Ek jono darai moranagan ejchie hinottei, morattun jiei uduonagano ek jono darai ejchie. 22 Adamor iot beg manuschun morsionde dogkie, Kristo ioto beg manuschunore jeda gora obo. 23 Hintu prottiek jone nijor doge udibag. Kristo olode polim pholluo. Sei porendi jokke Kristo ebo, je tar manus, sigune jiei udibag. 24 Sebeden thuman ebo, jokke the rejjiogan Bab Itchiorbuore gojei dibo. The beg sason ani, beg odhiharani ar hemodagani thum gori dibo. 25 Haron beg sottrugun the tar thengot tole thoi song The sason gori pebo. 26 Jero sottrubuo dongso obode sibie olode moranagan. 27 Haron “Itchiore begkani Kristor thengo odinot tole thoidie.” (Judio the nijore-nije “begkani Kristo odinot thole thoie” hintu ien poriskar je Itchiore nijore Kristor odinot no thai.) 28 Jokke Itchiore begkani Puobuor odinot thoie die, sebeden puobuoio the nije tar sidu gojei dibo. Itchiorbuo olode Puobuore begkani odinot tole thoidiebuo. Itchiore je huno iet The begkanit oi para goribuo.
29 Anole, jigune mora manjior azai baptisma gorsion, judi morattun shobai jiei no udile, thara hi goribak? Salen a hittei thara mora manjior azai baptisma gorsion? 30 Ar ami hittei sob somoi bipodot portong? 31 Amar Probu Jisu Kristo iot tomar sombonde mor jei bar goribar age, siendoi mui soittio gorongge mui din bagene morono dojad porong. 32 Ephesi sohorot jharbuo jonturloi mui judduo gorsiong. mui judi manjior ischieloi judduo gortung mor hi lab olun? Mora judi jiei no udile, ien hoi:
“Hellie moribong hinottei, baza ludi hei.”
33 Thoga no heio. “Bojong somarsiei gom sobhab nas gori duon.” 34 Dharmig gori jhagoron aw, pab no gorsio. Haron hoiek jonor Itchioro gyenan nei. Tumi lajo para mui ei hodagan hongor.
Itchiore Jiei tullie Heyegan
35 Hintu hoiek jone hobak, “Mora hingori jiei udibag? Hedogkie heyeloi thara ebag?” 36 Behup! Tui jien shidos sien mori no gele jeda no oi. 37 Ar tui jokke shidos heyegan obartei tui no shidos, bana bijigun shidos. Sigun gom bah oinnio biji oi pare. 38 Hintu Itchiore tar ischie mote bijibuot heyegan de. Prottiek biji bagene sidibar nijor heyegan the de. 39 Beg heyegani ekkoi noi. Manjior ek doronor heye age, poshugunor ek doronor heye age, major ek doronor heye age ar phegor ek doronor heye age. 40 Sorgo heye ar pittimi heye theleio hintu sorgo heyet dolani ar pittimi heyet dolani judo-judo. 41 Belor ek doronor shodok age ar junanor ek doronor shodok age. Taragunor ek dogkie shodok age. Ekkuo tharar shodokkanottun aro ekkuo tharar shodokkan judo.
42 Morattun jiei uduonagano sedogkie. Garande heyegan poji jei pare, ar jiei udibode heyegan poji no jai. 43 Aw-mannio gori heyegan gara oi, ar sien oborug gori jiei tulo oi. Heyegan shokti nei gori gara oi, ar sien hemoda dinei jiei tulo oi. 44 Munischioror heyegan gara oi, sei heyegan aptar heyeloi jiei ude. Munischioror heyeio ar aptar heyeio age. 45 Sien Sastroie hoidie doge, “Polim manuschuo Adame poran-bola manus olo,” ar sejo Adame jibon die apta olo.
46 Hintu polim manuschuo aptar manus noi. The olode munischioror heye-bola manus. Sei porendi aptar Manuschuo ejchie. 47 Polim manuschuo pittimittun, madiloi baneie. Jero Manuschuo olode Probuie sorgottun. 48 Madittun baneie manuschun madittun ejchiede manuschuo dogkien. Sorgottun ejchionde manuschun Sorgottun ejchiede Manuschuo dogkie. 49 Madir manuschuo subhibuo dogkien gori, sorgottun ejchie Manuschuo subhibuor dogkien ami obong 50 Bheilog, ikkie mui ien hongor, manjior heye ar loloi Itchioro rejjiogan pedo noi. Thik sedogkie gori, poji jaidie siene poji no jaidie sien pedo noi.
51 Suno, mui ekkan tomare oghur gubono hoda hong. Ami begkun mortong noi, hintu Itchiore amare begkunore bodoli dibo. 52 Jhimidot sotte, sog thebot sotte, jero begolo robuot ami bodolibong. Haron begol bajilie, morattun poji no jan para jiei tulo obo ar amare bodolei die obo. 53 Haronan olode, ei poji jei parede heyegane poji no parede sien lo poribo. Ei mori jei parede heyegane mori jei no parede sien lo poribo. 54 Ei poji jei parede heyegane poji jei no parede sien lobo. Ar ei mori jei parede heyegane mori jei no parede sien lobo. Sien ole, Sastrot hoiede sien puron obo, “Jidenagane moranagan gillie”
55 “Oh Padalan, tor jidenagan hudu? Oh Moranagan, tor bischan hudu?”
56 Moranagano bischan olode pabpan. Pabpano hemodagan olode Nioman. 57 Hintu amar Probu Jisu Kristor darai amare jidenagan dede Itchiorbuor donniobad ok.
58 Senottei, Oh mor agojor bheilogkun, shokto gori thago, no lorsio, onsur Probur hamot puro-puri lagi thago. Tumi hobor po, Probur iot tomar hadonigan panit no poribo.